بايقاۋعا « ۇلىتاۋ» توبىنىڭ ءسوليسى ەرجان الىمبەتوۆ باستاعان دومبىراشى نۇركەن ءاشىروۆ, شەرتپە كۇيشى قايرات ايتباەۆ, شەجىرەشى رامازان نۇرعاليەۆ, جاياۋ مۇسا اتىنداعى باياناۋىل بالالار ونەر مەكتەبىنىڭ حالىق اسپاپتار ءبولىمىنىڭ ۇستازى ەرنات موتىشەۆتار قازىلىق ەتتى. بايقاۋدىڭ اشىلۋ سالتاناتىندا اۋدان اكىمى ورازگەلدى قايىرگەلدينوۆ ءسوز سويلەپ, قازاقتىڭ وتباسىندا دومبىرا ۇستاپ ءان سالمايتىن, كۇي كۇمبىرلەتپەيتىن بالا جوق ەكەنىن العا تارتىپ, ۇمىتتەرىن ۇكىلەگەن ونەرلى ورەندەرگە ساتتىلىك تىلەدى. بايقاۋدىڭ ءبىر ەرەكشەلىگى, ەكى كەزەڭنەن تۇرعان قۇرمانعازىنىڭ «ماشينا», «بالقايماق», تاتتىمبەتتىڭ «سىلقىلداق», دينانىڭ «سەگىزىنشى مارت», ر.وماروۆتىڭ «جاستىق شاق», م.ءحامزيننىڭ «بەلگىسىز سولدات» كۇيلەرى ءجيى ورىندالدى. بايقاۋ ءۇش جاس ەرەكشەلىگى بويىنشا باعالاندى. ءار ونەرپاز ءوز الىنشە شەبەرلىگىن تانىتتى. ونەرلى ۇرپاقتارى باردا ەلىمىز رۋحاني دامۋ جولىنا تۇسە الاتىنىن بايقادىق. اتا-بابا جولىن جالعاپ, ۇلتتىق ونەرىن قۇدىرەت كورگەن بالاۋسا بۋىن ۇل-قىزدارىمىزعا بۇكىل كورەرمەن ريزا بولدى. بايقاۋ قورىتىندىسىندا باياناۋىل اۋدانىنىڭ اكىمى ورازگەلدى قايىرگەلدينوۆ تابىستاعان باس جۇلدە شىعىس قازاقستان وبلىسى اباي اۋدانى جانىبەك كارمەنوۆ اتىنداعى مۋزىكا مەكتەبىنىڭ وقۋشىسى ەسبول حاپانعا بۇيىردى. حالىق ءارتىسى ماعاۋيا حامزين اتىنداعى ارنايى جۇلدەنى ورتا توپتا ونەر كورسەتكەن پاۆلودارلىق ايگەرىم ورازباي يەلەنسە, «توكپە كۇيدە ءوز شەبەرلىگىن كورسەتكەنى ءۇشىن ارنايى جۇلدە» سەمەيلىك نۇرجان نۇرلانعا تابىس ەتىلدى. ءسويتىپ, باياناۋىل حالقى بالعىن تالانتتار شەرتكەن تاماشا كۇيلەردى تىڭداپ, تاڭدانىسىپ, كۇمبىرلەگەن دومبىرا ۇنىمەن قيماي قوشتاستى. سان عاسىرلىق تاريحى بار ۇلتىمىزدىڭ ۇلى ونەرى عاسىرلار قويناۋىنا ەنگەن سايىن قۇدىرەتى ارتىپ, ايشىقتالىپ كەلەدى. ەلىمىزدەگى مۋزىكالىق جانە ونەر مەكتەپتەرى اراسىندا وتكەن وسى «كۇي-قۇدىرەت» بايقاۋى سونىڭ ايقىن كورىنىسى.
ەلامان قابدىلاشىم
پاۆلودار وبلىسى, باياناۋىل اۋدانى