وسى كۇنى ادام ءومىرىن عالامتورسىز ەلەستەتۋ مۇمكىن ەمەس. جاسى دا, كارىسى دە ينتەرنەتكە «ماتاۋلى». مۇنىڭ زيانى دا, پايداسى دا بار. زيانىن ايتىپ, زار يلەپ قايتەمىز. پايداسىنا توقتالايىق. قازىر اتىڭدى شىعارىپ, جۇرتقا تانىلۋدىڭ توتە جولى – الەۋمەتتىك جەلىدە بەلسەندى بولۋ. تەك سول جولدى دۇرىس پايدالانا ءبىلۋ قاجەت. ياعني, جەكە باستىڭ ەمەس, قوعامنىڭ مۇددەسىنە باعىتتاساق بولعانى. ماسەلەن, جارىس دەسە, دەلەبەسى قوزىپ, بارعان باسەكەسىنەن قورجىنىن جۇلدەگە قامپايتىپ قايتاتىن سپورتشى قاۋىمنىڭ جەتىستىگىن نەگە ناسيحاتتامايمىز؟ قازىرگىنىڭ چەمپيونى – بۇرىنعىنىڭ باتىرى. ەندەشە, كوپشىلىك قاھارمانىن ءبىلۋى كەرەك قوي. وكىنىشكە قاراي, ءبىزدىڭ وبلىستا وسى جاعى كەمشىن. جەكە فەدەراتسيالار مەن قاۋىمداستىقتاردىڭ جۇمىسىن ءسوز ەتپەي-اق قويالىق. ءوڭىر سپورتىنىڭ ەكى تىزگىن, ءبىر شىلبىرىن ۇستاپ وتىرعان وبلىستىق دەنە تاربيەسى جانە سپورت باسقارماسىن مىسالعا الساق جەتكىلىكتى. سونىمەن, بۇل باسقارما ينتەرنەتتى قانشالىقتى دۇرىس پايدالانۋدا؟ الەۋمەتتىك جەلىدە بەلسەندى مە؟ باسقارمانىڭ رەسمي سايتىنا (http://oblsport-pavlodar.gov.kz/ru/) كىردىك. جاڭالىقتار ءبولىمى سوڭعى رەت 5 ناۋرىزدا جاڭارتىلعان. وسى ارالىقتا ءبىزدىڭ سپورتشىلار نە جارىسقا قاتىسپاعان, نە بارعان جەرىنەن سىمپيىپ بوس قايتقان. مەكەمەنىڭ رەسمي سايتىنا كىرگەن ادام وسىنداي وي تۇيەدى. جارايدى, بۇل رەسمي سايت دەلىك. اقپاراتتى تاڭداپ سالادى. نەگىزگىلەرىنە نازار اۋدارادى. بىراق, ءوڭىر سپورتشىلارىنىڭ جەتىستىگىن جالپاق جۇرتقا جاريالاپ, جار سالۋدىڭ باسقا دا جولدارى بار ەمەس پە..؟ جەرلەستەرىمىزدىڭ جەتىستىگىن العاش بولىپ ەستيتىن وسى باسقارمانىڭ ماماندارى. ەندەشە, سول ءبىر ءسۇيىنشى حاباردى كوپشىلىكپەن ءبولىسىپ وتىرۋ ءۇشىن نەلىكتەن الەۋمەتتىك جەلىلەردەن مەملەكەتتىك مەكەمەنىڭ رەسمي پاراقشاسىن اشىپ قويماسقا؟ ءسوز جوق, جەلىگە «جابىسقانداردىڭ» دەنى سول پاراقشاعا ەشبىر جارناماسىز-اق جازىلار ەدى. سەبەبى, سپورت – بارىنە ورتاق. بۇل سالانى ءتۇسىنۋ جانە وڭاي. سونداي-اق, قىسقا-قىسقا سپورت حابارلارىن جۇرتشىلىق تەز قابىلدايدى. وكىنىشكە قاراي, وبلىستىق دەنە تاربيەسى جانە سپورت باسقارماسىنىڭ الەۋمەتتىك جەلىلەردەن بىردە-ءبىر پاراقشاسىن كورمەدىك. ماسەلەن, اقتوبە جانە وڭتۇستىك قازاقستان وبلىستارى باسقارمالارىنىڭ «فەيسبۋك» جەلىسىندە ءوز پاراقشالارى بار. سپورتشىلارىنىڭ جەتىستىگىن سول جەرگە جاريالاپ وتىرادى. باسقارماعا دا, جارىستان ولجالى ورالعان وعلانعا دا جارناما, ناسيحات ەمەس پە؟! نەگىزى بار عوي, ءبىر وڭىرگە ءبىر سپورت سايتى كەرەك. بۇل – بۇگىنگى كۇننىڭ تالابى. گازەت-جۋرنال شىعارۋمەن سالىستىرعاندا, سايتتى جۇرگىزۋ الدەقايدا وڭاي ءارى شىعىنسىز. ونىڭ ۇستىنە وقىرمانى دا كوپ. وسىنى ەسكەردى مە ەكەن, ماڭعىستاۋ (http://aktausport.kz/) جانە شىعىس قازاقستان وبلىستارى (http://vksport.kz/) وزدەرىنىڭ جەكە سپورت سايتتارىن اشتى. جاپ-جاقسى جۇمىس ىستەپ تۇر. بىزگە دە وسىنداي ءبىر سايت قاجەت. وسىنى وبلىستىق دەنە تاربيەسى جانە سپورت باسقارماسى قولعا السا, سايت جۇمىسىن دوڭگەلەتىپ اكەتەتىن ماماندار تابىلادى. بىراق, قايدام. بۇل باسقارما – ءبىزدىڭ وڭىردە ءباسپاسوز حاتشىسىن ۇستامايتىن مەملەكەتتىك مەكەمەنىڭ ءبىرى. باسقارمانىڭ ينتەرنەت جەلىسىندەگى جۇمىسىنىڭ اقساپ جاتقانى دا سوندىقتان بولار... وزگە سالالار سەكىلدى ەمەس, سپورت جاريالىلىقتى سۇيەدى. چەمپيونداردى ناسيحاتتاۋمەن ءوڭىردىڭ ءيميدجى قالىپتاسادى. وسىنى تۇسىنسەك ەكەن.
فارحات امىرەنوۆ, جۋرناليست
پاۆلودار