مامىر ايىنىڭ 25-31 ارالىعىندا وسكەمەندە ۆولەيبولدان قىزدار اراسىندا كلۋبتىق ازيا چەمپيوناتى وتەدى. حالىقارالىق ەكسپو-2017 كورمەسىنىڭ قارساڭىندا جالاۋى جەلبىرەيتىن ءدۇبىرلى دوداعا سارى قۇرلىقتىڭ سەگىز مەملەكەتىنەن تاڭداۋلى سپورتشىلار كەلىپ قاتىسادى. بايراقتى باسەكەدە ەل نامىسىن قازاقستاننىڭ ەكى دۇركىن چەمپيونى, وسكەمەننىڭ «التاي» ۆولەيبول كلۋبى قورعايتىن بولادى.
ۆولەيبول سپورتى بويىنشا مۇنداي جوعارى دەڭگەيدەگى سايىس شىعىس قازاقستان وبلىسىنىڭ عانا ەمەس, ەلىمىز تاريحىندا تۇڭعىش رەت ۇيىمداستىرىلعالى جاتقاندىقتان ەرەكشە دايىندىق جۇرگىزىلدى. جارىسقا ازىرلىك بارىسىن, ۇيىمداستىرۋ جۇمىستارىن وبلىس اكىمى دانيال احمەتوۆتىڭ ءوزى ءجىتى قاداعالاۋدا ۇستادى.
چەمپيونات ويىندارى وتەتىن بوريس الەكساندروۆ اتىنداعى سپورت سارايىنا كەشەندى جوندەۋ جۇرگىزىلىپ, باسەكەنى تىكەلەي ەفيردە كورسەتۋگە, بەينەجازبانى وڭدەپ, كوپفۋنكتسيالى قايتالاۋ جۇيەسىن قولدانۋعا مۇمكىندىك بەرەتىن زاماناۋي قۇرىلعىلار ورناتىلدى. بۇگىندە بۇل جەردە كەز كەلگەن الەمدىك دەڭگەيدەگى جارىستاردى ۇيالماي وتكىزۋگە مۇمكىندىك بار. وسكەمەندە وتەتىن ءدۇبىرلى دودانى قالالىقتار مەن شاھار قوناقتارى تەگىن تاماشالايتىن بولادى.