تاڭ سارىدەن ۇمىتتەرىن ۇكىلەپ وقۋشىلار سارايىنا اعىلعان 538 قاتىسۋشى ادىلقازىلار القاسىنىڭ الدىندا قازاقشا, ورىسشا, اعىلشىنشا, قىتايشا جانە وزگە دە تىلدەردە دە ءان سالىپ, باقتارىن سىنادى. «باق سىنادى» دەپ ايتقانعا جەڭىل بولعانىمەن, تەك جارقىن بولاشاقتان ءۇمىت كۇتەتىن, كەڭ اۋقىمدى بايقاۋعا العاش رەت قاتىسىپ وتىرعان بالا كوڭىل ءۇشىن بۇل بايقاۋ تولقىنىسقا تولى ماڭىزدى ءسات ەكەنى ايتپاسا دا تۇسىنىكتى. ءار بۇرىشتا دايىندىق جاساپ, داۋىسىن جاتتىقتىرىپ جۇرگەن 7 مەن 13 جاس ارالىعىنداعى بالالاردى جەتەكتەي جەتكەن اتا-انادان باستاپ, ولارعا قولداۋ ءبىلدىرىپ كەلگەن تۋعان-تۋىس قاۋىمىن قوسقاندا, وقۋشىلار سارايى ءبىر ساتكە ۇلكەن مەرەكە الاڭىنا اينالىپ كەتكەندەي ەدى. ءدۇبىرلى بايقاۋعا تەك وڭتۇستىك شاھاردان عانا ەمەس, وزبەكستان مەن قىرعىزستاننان دا ات ارىتىپ جەتكەن كىشكەنتاي دارىندار ءوز قابىلەتتەرىن كورسەتۋ ءۇشىن بارىن-اق سالدى. البەتتە, ادىلقازىلار القاسىن ايرىقشا داۋسىمەن ءتانتى ەتكەن تالاي تالانتتىڭ بار ەكەنى راس. دەگەنمەن, 9 جاسار نۇرلىبەك ساپارباي مەن 11 جاسار جانەل قاسەنوۆا ءجۇزدىڭ ىشىنەن جۇيرىك شىعىپ, قالالىق ىرىكتەۋ كەزەڭىنىڭ قورىتىندىسى بويىنشا جەڭىمپاز اتاندى. «مەن بۇرىن مۇنداي ءان بايقاۋلارىنا قاتىسىپ كورگەن ەمەسپىن, بىراق جەڭىمپاز اتاناتىنىما سەندىم», دەيدى قۋانىشتان ءجۇزى بال-بۇل جانعان نۇرلىبەك. ال قاتتى تولقىپ, قۋانىشتان كوزىنە جاس ۇيىرىلگەن جانەل: «بايقاۋعا قاتىسۋعا كەلگەن وسىنشاما بالانى كورگەندە جەڭىس ماعان بۇيىرا قويمايتىن شىعار دەپ ويلادىم. بىراق بار كۇشىمدى جيناپ, ىرىكتەۋدىڭ بارلىق كەزەڭدەرىندە ءوزىمدى سەنىمدى ۇستاۋعا تىرىستىم. جەڭىسكە جەتكەنىمە قاتتى قۋانىپ تۇرمىن!», دەدى. ايتا كەتسەك, وسىمەن ەكىنشى رەت وتكىزىلىپ جاتقان «بالا داۋىسى» ءان بايقاۋى بيىلعى جىلدىڭ 12 مامىرىندا پاۆلودار قالاسىندا باستالعان بولاتىن. پاۆلودار جانە شىعىس قازاقستان وبلىستارىنان قاتىسقان 347 بالانىڭ ىشىنەن 2 قاتىسۋشىنى ىرىكتەپ العان شىعارماشىلىق توپ ات باسىن الماتىعا تىرەگەن ەدى. 23 ماۋسىمعا دەيىن سوزىلاتىن ىرىكتەۋ كەزەڭى ارالىعىندا بۇلبۇل داۋىستى بالا انشىلەردى تابۋ ماقساتىندا «بالا داۋىسى» ەندى ەلىمىزدىڭ قالعان وبلىستارىن ارالاپ شىقپاق. 16 ايماقتان 16 جەڭىمپاز انىقتالعان سوڭ جەتكىنشەكتەر تولقىن زابيروۆا, مەدەۋ ارىنباەۆ, ءمادينا سادۋاقاسوۆا, مارجان اراپباەۆا, ءمولدىر اۋەلبەكوۆا, جۇبانىش جەكسەن ۇلى سىندى تانىمال تالىمگەرلەردەن, كاسىبي مۋزىكانتتاردان, حورەوگراف, ستيليستەردەن مۋزىكا مەكتەبىندە ءبىر اي ءتالىم الاتىن بولادى. ال قازان ايىنىڭ 27-29 جۇلدىزى ارالىعىندا «الماتى ارەنا» مۇز سارايىندا كتك تەلەارناسى ارقىلى تىكەلەي ەفيردە وتەتىن «بالا داۋىسىنىڭ» سۋپەر-فينالىندا كاسىبي قازىلار القاسى مەن سمس-داۋىس بەرۋ ارقىلى تەلەكورەرمەندەر جۇرەگىن جاۋلاي بىلگەن حاس تالانت پاريجدىك ديسنەيلەندكە تەگىن قىدىرىپ قايتۋ جولداماسىنا جانە قازاقستانداعى ەڭ ۇزدىك مۋزىكالىق وقۋ ورىندارىنىڭ ءبىرىنىڭ گرانتىنا يە بولماق.
ميرا بايبەك, «ەگەمەن قازاقستان»
الماتى