ورال قالاسى پروكۋراتۋراسى 2017 جىلدىڭ 4 ايىنا تالداۋ جاساپ, «قالالىق جەردە ۇرلاناتىن ءاربىر ءۇشىنشى زات – ۇيالى تەلەفون ەكەن» دەگەن تۇجىرىمعا كەلگەن. ورالدا جىل باسىنان بەرى وسىنداي 486 ۇرلىق تىركەلىپتى. «وتكەن جىلعىمەن سالىستىرعاندا مۇنداي ۇرلىق سانى ءسال ازايعانىمەن, تەلەفون مەن كومپيۋتەرلىك تەحنيكا ۇرلىعى پروپورتسيونالدى تۇردە ۇلعايىپ كەلەدى», دەپ حابارلادى باتىس قازاقستان وبلىستىق پروكۋراتۋراسىنىڭ ءباسپاسوز قىزمەتى. ءبىر وكىنىشتىسى, مۇنداي ۇرلىقتىڭ كوبى اشىلماي قالادى. جوعارىدا ايتىلعان ۇرلىق وقيعالارىنىڭ 22%-ى عانا اشىلعان. «ساقتانساڭ – ساقتايمىن» دەگەن ناقىلدى ەسكەرىپ, ۇيالى تەلەفون كوبىنەسە قاي جەردە, قاي ۋاقىتتا, قالاي ۇرلاناتىنىنان حاباردار بولىڭىز. تومەندەگى تسيفرلار ورال قالاسىنداعى بيىلعى 4 ايدىڭ دەرەكتەرى: 157 تەلەفون – قوعامدىق ورىندا, 72 تەلەفون – پاتەر, ءۇي-جاي, جاتاقحانالاردا, 64 تەلەفون – ساۋدا-ساتتىق ورىندارىندا, 32 تەلەفون – تۇنگى كلۋبتار مەن مەيرامحانالاردا; 17-ءسى – اۆتوكولىكتە, 9-ى – وقۋ ورىندارىندا, 5 تەلەفون مەديتسينالىق مەكەمەلەردە ۇرلانعان. 58 تەلەفوندى ۇيگە كەلگەن قوناق ۇرلاپتى. ورالداعى پاتەر ۇرلىعىنىڭ ءاربىر بەسىنشىسى – ءدال وسى ۇيالى تەلەفون ۇرلاۋمەن بايلانىستى. قالتافونداردىڭ 32,3%-ى قوعامدىق كولىكتە قولدى بولادى ەكەن. ۇرلانعان ۇيالى تەلەفونداردىڭ 69%-ى جابىرلەنۋشىلەردىڭ قالتاسىنان ۇرلانعان. 17 تەلەفون اۆتوكولىكتەن ۇرلانعان, ونىڭ 8-ىندە كولىكتىڭ ەسىگى كىلتتەنبەگەن ەكەن. قوعامدىق كولىكتە ۇيالى تەلەفون ۇرلىعى جۇمىس كۇندەرى, اۆتوبۋس سالونىندا ادام كوپ كەزدە, ياعني تاڭەرتەڭگى 8.00 مەن 10.00 ارالىعىندا, كەشكى 16.00 مەن 20.00 ارالىعىندا جاسالعان. ۇرلانعان تەلەفونداردىڭ 169-ىنىڭ قۇنى 50 مىڭ تەڭگەگە دەيىن, 199-ى 50 مىڭ تەڭگەدەن 100 مىڭ تەڭگەگە دەيىن, ال 100-ءى 100 مىڭ تەڭگەدەن جوعارى بولىپتى. تەلەفون ۇرلاتقانداردىڭ 66,6%-ى (324 وقيعا) ايەل ادام ەكەن. ودان كەيىنگى ورىندا – مەكتەپ وقۋشىلارى. ۇرىلار تەپسە تەمىر ۇزەتىن ەر ادامنان اينالىپ وتەتىن سىڭايلى. جوعارىداعى مالىمەتتەردى ورتاعا سالعان ورال قالاسىنىڭ پروكۋرورى ا.راشيدوۆ جەرگىلىكتى اتقارۋشى جانە قۇقىق قورعاۋ ورگاندارى باسشىلارىن, ۇيالى وپەراتورلار وكىلدەرى مەن تەلەفون ساتۋ, ايىرباستاۋمەن شۇعىلداناتىن ساۋدا نۇكتەلەرى يەلەرىن قالتافون ۇرلىعىن توقتاتۋ, الدىن الۋ ءۇشىن بىرلەسە جۇمىس ىستەۋگە شاقىرىپ وتىر.
قازبەك قۇتتىمۇرات ۇلى, «ەگەمەن قازاقستان» ورال