جالپى, بيىل وڭىردە 4744,8 گا القاپقا تۇقىم سەبۋ جوسپارلانعان. سونىڭ ىشىندە 4338,3 مىڭ گا ءداندى داقىلدار. بۇدان باسقا, 142,2 مىڭ گا جەرگە ازىقتىق جەم ءوسىرۋ قولعا الىنباق. الايدا استراحان, ارشالى, ەرەيمەنتاۋ جانە جارقايىڭ اۋداندارىنان وزگەلەرىندە جەمدىك داقىلدار كولەمى ازاياتىنى بايقالىپ وتىر. اسىرەسە, بۋراباي اۋدانىندا ونىڭ كولەمى 8,2 مىڭ گەكتارعا قىسقارادى دەپ كۇتىلۋدە. قازىر مال باسىنىڭ ارتىپ كەلە جاتقاندىعىن قاپەرگە العان وبلىس باسشىلىعى جەرگىلىكتى اكىمدىكتەردەن جەمدىك داقىلدار كولەمىن ارتتىرۋ قاجەتتىگىنە نازار اۋدارۋدى تالاپ ەتىپ وتىر. بۇعان مۇمكىندىك جەتەرلىك. وبلىس اكىمىنىڭ ورىنباسارى ە.كاپپەلدىڭ مالىمەتىنە قاراعاندا, اۋىلشارۋاشىلىق تاۋارلارىن وندىرۋشىلەردىڭ تۇقىم سەبۋ جۇمىستارىن جۇرگىزۋى ەكىنشى دارەجەلى بانكتەردىڭ كەپىلدەمەسىمەن جانە م ۇلىكتى كەپىلگە قويۋ ارقىلى جۇزەگە اسىرىلادى. وسىعان وراي بيىل وبلىستا تەك 49 ءاشتو 265,4 مىڭ گا القاپقا ەگىن ەگەتىندىگى تۋرالى تاپسىرىس بەرگەن. سونىڭ تەك 9-ى عانا نەسيەگە قول جەتكىزىپتى. سوندىقتان دا وبلىس باسشىلىعى وسىمدىك شارۋاشىلىعىنا ۇساق جانە ورتا شارۋاشىلىقتاردى تارتۋ ارقىلى اۋىل شارۋاشىلىعى كووپەراتيۆتەرىن قۇرۋعا جۇمىلدىرۋدى كوزدەپ وتىر. سوندا ولار دا نەسيە الا الادى ەكەن. سونداي-اق, بيىل 241,5 مىڭ گا القاپقا مايلى داقىلدار ەگىلمەك. بۇل وتكەن جىلمەن سالىستىرعاندا 21 مىڭ گەكتارعا ارتىق. وڭىردە مايلى داقىلداردان گەكتارىنا 10-12 تسەنتنەردەن ءونىم الىپ, جالپى كولەمدە ونىڭ مولشەرىن 240-260 مىڭ تونناعا جەتكىزۋ كوزدەلىپ وتىر. سونداي-اق, الداعى ۋاقىتتا 18,4 مىڭ گا جەرگە كارتوپ جانە 4,3 مىڭ گا القاپقا جەمىستەر وتىرعىزىلادى. بۇل رەتتە كارتوپ پەن جەمىستەر وتىرعىزۋ كولەمى بىلتىرعى دەڭگەيدە قالاتىندىعىن ايتا كەتكەن ءلازىم. تولىقتاي العاندا, مۇنداي قادام وسىعان دەيىن اۋىل شارۋاشىلىعى مينيسترلىگى مەن وبلىستىق اكىمدىك اراسىندا جاسالعان ەگىستىك القاپتاردى ءارتاراپتاندىرۋ جونىندەگى مەموراندۋمعا سايكەس كەلەدى. جالپى, ءوڭىر اۋىلشارۋاشىلىق داقىلدارىمەن تولىق قامتاماسىز ەتىلگەن. قازىرگى تاڭدا 522 مىڭ توننا تۇقىم سەبىلگەن. بۇل ورايدا 1 جانە 2 كلاستى تۇقىمدىقتىڭ 86 پايىزى ەگىستىك ستاندارتىنا ساي. بۇدان باسقا, وڭىردە بيىلعى تۇقىم سەبۋ جۇمىستارىنا قولدانىلاتىن اۋىلشارۋاشىلىق تەحنيكالارى بارىنشا ساقاداي-ساي تۇر. ناقتىراق ايتقاندا, وبلىس بويىنشا جالپى ماشينا-تراكتور پاركىنىڭ دايىندىعى 91 پايىز دەپ باعالانۋدا. ءوڭىر باسشىسى ورىنباسارىنىڭ سوزىنە قاراعاندا, بيىل ءبىرىنشى توقساندا 10 دانا تراكتور, 55 دانا تۇقىمسەپكىش جانە 1 دانا ەگۋ كەشەنى ساتىپ الىنعانىمەن, ءبارىبىر تەحنيكانىڭ جەتىسپەۋشىلىگى بايقالۋدا. ويتكەنى, وبلىس بويىنشا اۋىلشارۋاشىلىق تەحنيكالارىنىڭ توزىعى 66 پايىزدى قۇرايدى. سونىڭ ىشىندە تراكتورلار – 72 پايىز, ال سەبۋ كەشەندەرى 11 پايىز. دەيتۇرعانمەن, بيىلعى ەگىن ناۋقانىنا 17 مىڭ دانا تۇقىم سەبەتىن قۇرىلعى مەن 1145 دانا ونىكتى ەگۋ كەشەنى جۇمىلدىرىلماق. ال كوكتەمگى-ەگىس جۇمىستارىن جۇرگىزۋگە قاجەتتى جانار-جاعارماي تۋرالى ايتقاندا, ديزەل وتىنى – 79,2 مىڭ توننانى, بەنزين – 7,4 مىڭ توننانى جانە جاعارماي 4,6 مىڭ توننانى قۇرايدى. ەنەرگەتيكا مينيسترلىگى كوكتەمگى-ەگىس جۇمىستارىن جۇرگىزۋ ءۇشىن وبلىسقا كەپىلدەندىرىلگەن اۋقىمداعى 65 مىڭ توننا ديزەل وتىنىن بولگىزىپ بەرگەن كورىنەدى. پاۆلودار مۇناي-حيميا زاۋىتىنان ديزەل وتىنىنىڭ 55 مىڭ تونناسى بوساتىلسا, ال قالعان بولىگىن اتىراۋ مۇناي وڭدەۋ زاۋىتى بەرەتىن بولىپ شەشىلگەن. ناۋرىز ايىندا سونىڭ 30 مىڭ تونناسى جانە ساۋىردە 20 مىڭ تونناسى جەتكىزىلسە, مامىردا قالعان 10 مىڭ تونناسى جەتكىزىلەدى دەپ كۇتىلۋدە. بيىل وڭىرگە مينەرالدى تىڭايتقىشتار 47,3 مىڭ توننا كولەمىندە اكەلىنسە, بۇل وتكەن جىلدىڭ كورسەتكىشىنەن ەكى ەسەگە جوعارى ەكەن. ولاي دەيتىنىمىز, وتكەن جىلى بار-جوعى 22,4 مىڭ توننا مينەرالدى تىڭايتقىش جەتكىزىلىپتى. بيىل سونىمەن قاتار, مەملەكەت وسىمدىك شارۋاشىلىعىن دامىتۋعا سۋبسيديا تۇرىندە 10,7 ميلليارد تەڭگەدەن استام قارجى بولگەن. تۇقىم شارۋاشىلىعىن قولداۋ ماقساتىندا 582,5 ميلليون تەڭگە كوزدەلگەنىمەن, قوسىمشا 660 ميلليون تەڭگە قاجەت ەكەندىگى دە اشىپ ايتىلدى.
اسقار تۇراپباي ۇلى, «ەگەمەن قازاقستان» اقمولا وبلىسى