– اسكەري ءومىر ءسىزدى نەسىمەن قىزىقتىردى؟ بۇل سالاعا قالاي كەلدىڭىز؟ – اسكەري راديوبايلانىس سالاسىنا قىزىعۋشىلىق بالا كۇنىمنەن وياندى. مەكتەبىمىزدە بىرگە ءبىلىم العان 13 بالانىڭ تالابىن بايقاعان ۇستازىمىز البەرت كوۆونەشنيكوۆ ءبىزدى ۇنەمى العا قاراي تالپىندىرىپ وتىراتىن. راديوبايلانىس بويىنشا ءتۇرلى جارىستارعا قاتىسىپ, تالاي مارتە توپ جاردىق. سول كەزدە بۇكىل رەسپۋبليكا كولەمىندەگى جۋرنالعا شىقتىق. بۇل مەنى ودان ءارى قاناتتاندىرىپ, اسكەري ادام بولۋ اتتاي قالاعان ارمانىما اينالدى. بالا ارمان اقيقاتقا ۇلاسىپ, كەيىن وسى سالادا ءبىلىمىمدى تەرەڭدەتۋگە مۇمكىندىك تۋدى. كەمەروۆ اسكەري ۋچيليششەسىن, كەيىننەن لەنينگرادتاعى اسكەري بايلانىس اكادەمياسىن ويداعىداي اياقتادىم. ءسويتىپ, اسكەري ادام بولىپ شىعا كەلدىم. – تاۋەلسىزدىكتىڭ العاشقى جىلدارىنان باستاپ ەلىمىزدىڭ قورعانىس سالاسىندا قىزمەت ەتتىڭىز. بىرقاتار قۇرىلىمداردى باسقاردىڭىز. ءوزىڭىزدىڭ قىزمەتتىك جولىڭىزدى كوز الدىڭىزدان قايتا وتكىزىپ, سول جىلدارعا ءبىر ساپار شەگىپ كورسەك؟ – ماسكەۋدە كافەدرا مەڭگەرۋشىسى قىزمەتىن اتقارىپ جۇرگەن كەزىم ەدى. سول كەزدەگى ەلىمىزدىڭ تۇڭعىش قورعانىس ءمينيسترى ساعادات اعانىڭ شاقىرتۋىمەن ەلگە كەلىپ, ءتاي-ءتاي باسقان تاۋەلسىز مەملەكەتىمىزدىڭ يگىلىگى جولىندا قىزمەت ەتۋگە بىلەك سىبانا كىرىستىك. ءبىلىمىم مەن تاجىريبەمدى جوعارى باعالاپ, مەنى بىردەن جاۋاپتى قىزمەتكە تاعايىندادى. شىن مانىندە, ول كەزدەر ەندى عانا تاۋەلسىزدىككە قول جەتكىزىپ, ەڭسەمىزدى تىكتەپ كەلە جاتقان ەلەڭ-الاڭ شاقتار ەدى. سول كەزەڭ مەن ءدال بۇگىنگى كۇندى مۇلدە سالىستىرۋعا كەلمەيدى. بويىمىزداعى بار قاجىر-قايراتىمىزدى, ءبىلىم-بىلىگىمىزدى, ەرىك-جىگەرىمىزدى ۇلى وتانىمىزدىڭ تىنىشتىعى جولىنا ارناۋعا مىندەتتى ەدىك. سەبەبى, ءبارىمىزدىڭ ورتاق مۇراتىمىز وتانىمىزدىڭ تىنىشتىعى, وتانداستارىمىزدىڭ بەيبىت تە بەرەكەلى ءومىرى ەدى. وسى سالادا قىزمەت اتقارا ءجۇرىپ, ءبىلىمدى دە بىلىكتى كادر دايارلاۋ ماسەلەسىن الدىڭعى قاتارعا قويدىق. ويتكەنى, ول كەزدەردە ەل اۋماعىندا راديوبايلانىس سالاسى بويىنشا بىلىكتى كادرلار دايىنداپ شىعاراتىن وقۋ وشاعى اتىمەن جوق دەۋگە بولاتىن. وقيمىن دەپ تالاپتانعاندار ماسكەۋگە نەمەسە باسقا ەلگە سابىلاتىن. كوپتەن كوكەيدى كەرنەگەن ماسەلەنىڭ شەشىمىن تاۋىپ, «راديوەلەكترونيكا جانە بايلانىس اسكەري ينجەنەرلىك ينستيتۋتىن» قۇردىق. بۇگىنگى تاڭدا اتالمىش وقۋ ورداسى قاناتىن كەڭگە جايىپ, جىل سايىن قانشاما بىلىكتى مامانداردى قاناتتاندىرىپ وتىر. ءيا, ءوزىڭىز ايتقانداي, اسكەري سالادا ءومىر بويى ەڭبەك ەتتىم. جاۋاپتى قىزمەتتەر اتقاردىم. ونىڭ ءبارى وتان الدىنداعى بورىشىم دەپ ەسەپتەيمىن. ەڭبەگىمىز دە ەلەۋسىز قالعان جوق. ەلباسىمىزدىڭ قولىنان 1995 جىلى گەنەرال-مايور دەگەن شەن الدىم. وسىنىڭ بارلىعى مەنىڭ عانا ەمەس, وسى جولدا تاباندى تۇردە بىرگە قىزمەت ەتكەن ارىپتەستەرىمنىڭ دە ەڭبەگىنىڭ باعالانعانى دەپ بىلەمىن. – تاۋەلسىزدىك العان 25 جىل ىشىندە قازاقستان قارۋلى كۇشتەرى قانداي جەتىستىككە جەتتى. نە ۇتتىق؟ نەدەن ۇتىلدىق؟ – تاۋەلسىزدىك العان 25 جىل ىشىندە قارۋلى كۇشتەرىمىز اۋىز تولتىرىپ ايتارلىقتاي جەتىستىكتەرگە قول جەتكىزدى. رۋحى داۋىلداي, ايبارى الداسپانداي ايبىندى اسكەرىمىز قۇرىلدى. سوڭعى ۇلگىدەگى اسكەري تەحنيكالاردى يگەرىپ كەز كەلگەن مەملەكەتپەن يىق تىرەستىرە الاتىن جاعدايعا جەتتىك. ۋاقىت كوشىنە ىلەسىپ, زامانعا ساي دامىپ كەلەمىز. مۇنىڭ ءبارى بەرەكە مەن بىرلىكتىڭ, ەڭسەلى ەگەمەندىگىمىزدىڭ, ەلباسىمىزدىڭ كورەگەن ساياساتىنىڭ جەمىسى دەپ بىلەمىن. ەلىمىزدەگى اسكەري بولىمدەردىڭ ماتەريالدىق تۇرعىدا جابدىقتالۋىن, اسكەري قىزمەتكەرلەرىمىزدىڭ الەۋمەتتىك تۇرعىدا قورعالۋىن مەملەكەتىمىز ءاردايىم باستى نازاردا ۇستاپ كەلەدى. قازاق اسكەرى وزىندىك بەدەلىن قالىپتاستىرعان قۋاتتى اسكەرگە اينالدى. سوندىقتان, وسى 25 جىل ىشىندە ۇتقانىمىز, كوپ. – ءومىرىڭىزدى وسى سالاعا ارناعان ازامات رەتىندە ايتىڭىزشى, اسكەري ادامنىڭ ەڭ نەگىزگى ۇستانىمى قانداي بولۋعا ءتيىس؟ – وتان قورعاۋ, ەل تىنىشتىعىن قاداعالاۋ, ەردىڭ ەرىنە ارتىلاتىن مىندەت. وسى مىندەتتى موينىڭا العان ەكەنسىڭ, ونى اياعىنا دەيىن ابىرويمەن اتقارۋىڭ كەرەك. جولىڭدا تالاي كەدەرگىلەر مەن قيىندىقتار, ءتۇرلى توسقاۋىلدار تاپ كەلسە دە, ادىلەتتىڭ جىبىنەن اتتاماۋىڭ قاجەت. باتىرلىق كوزسىز ەرلىكتە عانا ەمەس, پاراساتتىلىق پەن ورىندى شەشىم قابىلداي بىلۋدە. وسىناۋ دارحان دالانى اتا-بابالارىمىز اق بىلەكتىڭ كۇشىمەن, اق نايزانىڭ ۇشىمەن امان ساقتاپ, كەيىنگى ۇرپاق مىنا بىزگە امانات ەتتى. «مالىم جانىمنىڭ ساداعاسى, جانىم ارىمنىڭ ساداعاسى» دەپ, ءولىپ بارا جاتساڭ دا نامىسىڭدى تاپتاتپاۋعا, يا بولماسا ەشكىمگە قيانات جاساماۋعا ۇيرەتتى. ياعني, ءبىزدىڭ قانىمىزدا بابالارىمىزدان ميراس بولىپ كەلە جاتقان تەكتىلىك پەن تازالىق بار. سول تازالىعىمىزدى جوعالتىپ الماۋىمىز قاجەت. اسكەري ومىردە قىزمەت ەتەتىن ادام تىم قاتال دا, تىم جۇمساق تا بولماۋى كەرەك. ەڭ باستىسى, ادىلەت پەن اقيقاتتىڭ اۋىلىنان الىستاماعانى ابزال. وتانىن, تۋعان جەرىن, ۇلتىن سۇيە الماعان ادامنان ۇلكەن ەرلىك كۇتۋگە بولمايدى. سوندىقتان ءاربىر ازامات, اسىرەسە, اسكەري ادام, وتانىنىڭ پاتريوتى بولۋعا ءتيىس دەپ ەسەپتەيمىن. ۇلتىن سۇيە بىلگەن جان – بۇكىل ادامزات بالاسىن دا سۇيە الادى. – ماڭگىلىك ەلدىڭ تىنىشتىعىن كىرپىك قاقپاي كۇزەتەتىن ءىزباسار ىنىلەرىڭىزگە قانداي تىلەك ايتاسىز؟ – قارۋلى كۇشتەرىمىز جىل سايىن قۋات الىپ, قازاقستانىمىزبەن بىرگە قارقىندى دامي بەرسىن. ەل ىرگەسى تىنىش بولسىن. تاۋەلسىز ەلىمىز ەكونوميكاسى دامىعان, مادەنيەتى باي, الەمنىڭ قورعانىسى قۋاتتى ەڭ وزىق ەلدەرىنىڭ الدىڭعى قاتارىنان كورىنسىن. بابالارىمىزدان ميراس بولىپ قالعان ۇلان-بايتاق جەرىمىز, جۇرەگى شۋاقتى, بىلەگى قۋاتتى ەرجۇرەك ەرلەرىمىز امان بولسىن! ماڭگىلىك ەلدىڭ كوك بايراعى كوك جۇزىندە جەلبىرەي بەرسىن! – اڭگىمەڭىزگە راحمەت.
اڭگىمەلەسكەن ارمان وكتيابر, «ەگەمەن قازاقستان» الماتى