يندۋستريا يگىلىگى
ەل ەكونوميكاسىنىڭ قارقىندى دامۋى تاۋەلسىز مەملەكەتىمىزدىڭ قاي سالانى دا تياناقتى يگەرۋىنە ىقپال ەتىپ وتىرعانى شىندىق. بۇرىندارى ءدارى-دارمەكتىڭ باسىم بولىگىن الىس-جاقىن شەتەلدەردەن الىپ كەلدىك. شىمكەنتتەگى جالعىز فارماتسەۆتيكا زاۋىتىنان باسقا وتاندىق ءدارى-دارمەك وندىرەتىن ءوندىرىس ورنى جوققا ءتان بولاتىن. ەلباسى حالىقتىڭ دەنساۋلىعىنىڭ مىقتى بولۋىن, جاسىنىڭ ۇزاق بولۋىن ويلاستىرۋى ناتيجەجەسىندە ءوزىنىڭ 2010 جىلعى قازاقستان حالقىنا جولداۋىندا «ءدارى-دارمەكپەن قامتاماسىز ەتۋدىڭ ءتيىمدى جۇيەسى ءۇشىن بارلىق بازالىق جاعدايلاردى جاسادىق. دارىلەردىڭ 50 پروتسەنتى ءبىزدىڭ ەلىمىزدە شىعارىلاتىن بولادى» – دەپ باتىل ايتۋى تەگىن ەمەس. مەملەكەت باسشىسى اسقان جاۋاپكەرشىلىكتى قاجەت ەتەتىن كىرپياز سالانى دامىتۋعا دا ەل ەكونوميكاسىنىڭ قۋاتى مەن عىلىمي ىزدەنىستىڭ مۇمكىندىگى جەتەتىنىنە سەنىم ءبىلدىردى. وسى جولداۋدا العا قويىلعان مىندەتتەردى جۇزەگە اسىرۋدىڭ ءتيىمدى باستامالارى, تياناقتى جوبالارى ومىرگە جولداما الا باستادى. فارماتسەۆتيكا سالاسىن دامىتۋدىڭ العاشقى قارلىعاشى رەتىندە اقتوبەدە اشىلعان «ۆەسەل اقتوبە LTD» جشس-ءنىڭ ءدارى شىعاراتىن زاۋىتىن ايتۋعا ابدەن بولادى. بۇل وسى سەرىكتەستىكتىڭ «اقتوبە» الەۋمەتتىك- كاسىپكەرلىك كورپوراتسياسىمەن بىرىگىپ جۇزەگە اسىرعان جوباسى.
ء–بىز اۋەلى وتكىزۋ رىنوگىنا ماركەتينگتىك زەرتتەۋ جۇرگىزدىك. سونىڭ ناتيجەسىندە ءبىز شىعاراتىن ءدارى-دارمەكتەردىڭ سۇرانىسقا يە ەكەنىن باعامدادىق. بۇل باتىس وڭىرىندە ءدارى وندىرەتىن بىردەن-ءبىر كاسىپورىن. مۇندا ءدارى شىعارۋ شيكىزاتتى وڭدەۋدەن باستاپ كاپسۋلا مەن قوراپتارعا ءتۇرىپ, تۇتىنۋشىعا جەتكەنگە دەيىنگى جۇمىستار جۇرگىزىلەدى. وندىرىستىك تەحنولوگيانى نەگىزىنەن ءوزىمىز جاسادىق. ارينە, مۇنداي تەحنولوگيا تمد ەلدەرىندە بار, الايدا, ءبىز وزىمىزشە جەتىلدىرىپ ورناتتىق,–دەيدى سەرىكتەستىكتىڭ ديرەكتورى گۇلنارا يمانالينا بىزبەن اڭگىمەسىندە.
كاسىپورىن باسشىسىنىڭ ايتۋىنشا, جوبا قۇنى 300 ميلليون تەڭگە تۇرادى. زاۋىتتا قازىردىڭ وزىندە جەتى ءتۇرلى ءدارى شىعارىلۋدا. اۋماعى 600 شارشى مەتردى الاتىن زاۋىت ءدارى وندىرىسىنە قاجەتتى شيكىزاتتى تۇگەلدەي باتىس ەۋروپادان, قىتايدان جانە ءۇندىستاننان الادى. كاسىپورىننىڭ وندىرىستىك تسەحتارى مەن قوراپقا سالۋ بولمەسىنەن باسقا شاعىن زەرتحاناسى بار. مۇندا شيكىزات پەن دايىن ونىمدەرگە زەرتتەۋ جۇرگىزىلەدى. دايىن ونىمدەر دارىلىك زاتتاردى ساراپتاۋدىڭ ۇلتتىق ورتالىعىنا جىبەرىلەدى. دارىلەر بارلىق تالاپتارعا ساي كەلەتىن بولسا عانا وتكىزۋگە رۇقسات ەتىلەدى. قازىر كاسىپورىندا 15 ادام جۇمىس ىستەيدى. بولاشاقتا ولاردىڭ سانى 20 –عا جەتەدى دەپ كۇتىلۋدە. بىرەن-ساران ۋكراينادان كەلگەن ماماندار بولماسا, نەگىزىنەن جەرگىلىكتى كادرلار ەڭبەك ەتەدى. قازىر زاۋىتتا ەكى ءتۇرلى تابلەتكا جانە بەس ءتۇرلى كاپسۋلدەگى ءدارى شىعارىلادى. ولار مي تامىرلارىنىڭ قىزمەتىن جاقسارتۋعا, ۆيرۋسقا , تۇماۋعا , ديللەرەياعا, اسقازان اۋرۋلارىنا قارسى جانە جوعارى جانە تومەنگى تىنىس الۋ ورگاندارى اۋرۋلارىن ەمدەۋگە قولدانىلادى.
–بۇل زاڭدى تىركەۋدەن ءوتىپ, شىعارۋعا رۇقسات ەتىلگەن ءدارى تۇرلەرى. جالپى, ءبىز گەنەريكتەر شىعارامىز. بۇل دارىلەردىڭ برەندتەرمەن ساپاسى بىردەي بولعانىمەن, ولارعا قاراعاندا اناعۇرلىم ارزان. سوندىقتان دا ءبىزدىڭ دارىلەرىمىزگە سۇرانىس جوعارى بولادى دەپ ويلايمىز. ءبىز تەك وسى دارىلەردى عانا شىعارىپ قويمايمىز, بولاشاقتا ءدارى اسسورتيمەنتىن كەڭەيتە تۇسپەكپىز. جالپى, ونىمدەرىمىزدى «فارماتسيا» سك ارقىلى ەلىمىزدىڭ بارلىق ايماقتارىنا وتكىزۋدى ويلاستىرۋدامىز. ۇستىمىزدەگى جىلعى تامىز ايىنىڭ اياعىنا تامان دارىلەرىمىزدىڭ العاشقى توبىن وتكىزەمىز. وعان 83 مىڭ قوراپ ءارتۇرلى ءدارى شىعارامىز,–دەيدى سەرىكتەستىك ديرەكتورى.
ءدارى زاۋىتى ديرەكتورىنىڭ ءوندىرىس جونىندەگى ورىنباسارى كونستانتين كوۆالەۆ ءبىزدى وڭدىرىستىك -تەحنولوگيالىق جۇمىس پروتسەسىمەن تانىستىردى. شاعىن بولمەلەردەگى سۋ جاڭا قوندىرعىلاردان دارىلەردىڭ قالاي شىعارىلاتىنىن اڭگىمەلەدى. بولمەلەر تاپ-تازا, كولدەنەڭ جاتقان ەشتەڭە كورىنبەيدى, ءبارى ورىن-ورنىندا. ءدارى وندىرۋگە قاجەتتى قۇرالدار دا ايناداي جالتىراپ تۇر. بۇل جەردە سانيتارلىق تازالىقتىڭ قاتاڭ ساقتالاتىنى اڭعارىلادى. شيكىزات ساقتاۋ قويماسى, زەرتحانا, وندىرىستىك تسەح ارنايى قۇرالدارمەن جاراقتاندىرىلعان. دارىلەردى قوراپقا ءتۇرۋ بولمەسىندە ەكى ادام قوراپتاردى دايىن ونىمدەردى تۇرۋگە دايىنداۋدا. ءوز ىستەرىنە بەرىلگەندەرى سونشاما, جۇمىستان باس كوتەرەر ەمەس.
–قوراپتاردى الماتىدان الامىز. بۇل جاعىنان كىدىرىس جوق. شيكىزات قورىن دا جاساپ الدىق. جالپى زاۋىتتىڭ وندىرىستىك قوندىرعىلارىن ىسكە قوسۋ-رەتتەۋ جۇمىستارى جۇرگىزىلدى. تاياۋدا كاسىپورىندى رەسمي اشىپ, بۇعان دەيىن شىعارىلعان دارىلەرىمىزدى ساتا باستايمىز. ءسويتىپ, زاۋىتتىڭ تولىق قۋاتىندا جۇمىس ىستەۋىنە كوشەمىز,–دەيدى كونستانتين كوۆالەۆ.
ءبىز قاجەت كەزىندە قولدانىپ, ءدارىحانالاردىڭ سورەلەرىنەن كورىپ جۇرگەن دارىلەردىڭ ەندى ءوز قالامىزدا شىعارىپ جاتقانىنا ريزا بولدىق. بۇل دارىلەردىڭ تۇرلەرى كوبەيە تۇسەتىنىن ەستىپ, جاڭا زاۋىتتىڭ ادام دەنساۋلىعىن نىعايتۋعا قىزمەت ەتەتىنىن, سونداي-اق, ءوڭىر ەكونوميكاسىنىڭ دامۋىنا ۇلەس قوساتىنىن جاقسىلىققا جورىدىق.
ساتىبالدى ءساۋىرباي.
اقتوبە وبلىسى.