بوزبالا بوكسشىلار باسەكەسى

بۇگىن قازاقستان بوكس فەدەراتسياسىنىڭ ۇيىمداستىرۋىمەن ەلىمىزدە تۇڭعىش رەت جاسوسپىرىمدەر اراسىندا الەم چەم­پيوناتى باستالادى. وعان الەمنىڭ 42 ەلىنىڭ 385 بوزبالا بوكسشىسى قاتىسىپ, 30 شىلدە كۇنگە دەيىن 13 سالماق دارەجەسى بويىنشا قولعاپ تۇيىستىرەدى. ءبىزدىڭ ەلىمىزدە وسى كەزگە دەيىن كوپتەگەن بوكس تۋرنيرلەرى مەن جارىستارى وتسە دە, سپورتتىڭ وسى تۇرىنەن كادەتتەر اراسىندا الەم چەم­پيو­نا­تى ءالى وتكىزىلىپ كورگەن ەمەس. ەلىمىزدە وسىنداي بايراقتى باسەكەنى وتكىزۋ تۋرالى شەشىم بىلتىر قىتايدىڭ سيامين قالاسىندا وتكەن حالىقارا­لىق اۋەسقوي بوكس قاۋىمداس­تى­عى اتقارۋشى كو­مي­تەتىنىڭ كەڭەيتىلگەن وتى­رى­سىندا قابىل­دان­عانى بەلگىلى. سول كەزدە جاس­وسپىرىمدەر اراسىندا الەمدىك دودانى ءوت­كىزۋگە 5 ەل ءوزىنىڭ ءوتىنىشىن بەر­گەن بولاتىن. الايدا داۋىس بەرۋدىڭ ناتيجە­سىندە استانا جانە بانگكوك قالاسىنىڭ اراسىندا بولعان سوڭ­عى تارتىستا ءاىۆا مۇشەلەرى ەلىمىز­دىڭ اس­تاناسىن الەم چەمپيوناتىنا لايىق دەپ شەشتى. جالپى, حالىقارالىق بوكس قاۋىمداس­تى­عىنىڭ اياسىنداعى كوپتەگەن جارىستاردىڭ ىشىندە كادەتتەر اراسىنداعى الەم چەمپيوناتى رەتتىك سانى بويىنشا ءۇشىنشى چەمپيونات بولىپ سانالادى. وسىعان دەيىن 15-16 جاستاعى بوكس­شى­لار اراسىنداعى الەمدىك باسەكە العاش رەت 2008 جىلى 25 قازان مەن 1 قاراشا ارالى­عىن­دا مەك­سي­كانىڭ  گۆادالاحارا قالاسىندا وتكە­نىن بىلەمىز. وسى سىندا قازىر ەرەسەكتەر قا­تارىندا ايقاسىپ جۇرگەن ەكى بوكسشىمىز – دانيار ەلەۋسىنوۆ (60 كگ.) پەن يۆان دىچكو (91 كگ.) كۇمىس جۇلدە العان بولاتىن. سول كەزدە كوماندالىق ءبىرىنشى ورىندى 4 التىن, 1 كۇمىس, 1 قولا مەدالمەن كۋبا بوكسشىلارى جەڭىپ الدى. ەكىنشى ورىندى الاڭ يەلەرى 2 التىن مەدالمەن السا, ءۇشىنشى ورىندى 1 التىن, 3 كۇمىس, 5 قولا جۇلدە­مەن رەسەي قۇراماسى يەلەندى. ودان كەيىن چەمپيونات بىلتىر 25 ءساۋىر مەن 3 مامىر ارالىعىندا ازەر­بايجاننىڭ باكۋ قالاسىندا ءوتتى. بۇل باسە­كەدە دە ءبىزدىڭ بوزبالا بوكسشىلارىمىز لايىقتى ونەر كورسەتە المادى. وسى ايقاستا ءبىز شيرەك فينالدان اسا الماي, جۇلدەسىز ەلگە قايتقان ەدىك. ال باكۋ باسەكەسىندە ءبىرىنشى ورىندى تاعى دا كۋبا قۇراماسى جەڭىپ العان بولاتىن. ولار 3 التىن, 1 كۇمىس, 1 قولا جۇلدە كوماندالىق ەسەپتە ءبىرىنشى ورىنعا شىقتى. ەكىنشى ورىن ادەت­تەگىدەي الاڭ يەلەرىنە بۇيىردى. ازەربايجان كومانداسى بۇل سىندا 2 التىن, 1 قولا مەدال يەلەندى. ال ءۇشىنشى ورىندى 1 التىن, 1 كۇمىس جۇلدەمەن ءۇندىستان قۇراماسى جەڭىپ الدى. ەندى وسى جولعى الەم چەمپيوناتىندا قازاق­ستان قۇراماسى ءوز الاڭىندا قۇرالاقان قالىپ قويمايتىنىنا سەنگىمىز كەلەدى. بىزگە بۇل سىندا بىرنەشە مەدال الۋعا مۇمكىندىك بەرىلىپ وتىر. ويتكەنى بيىلعى دوداعا ەكى دۇركىن الەم چەم­پيونى اتانعان كۋبا قۇراماسى قاتىسپايدى. كەشە بوكس فەدەراتسياسىنىڭ ما­ماندارىنان وسى ماسەلەنىڭ انىق-قانىعىن سۇ­راستىرعانىمىزدا بوستاندىق ەلى بوكس­شى­لارى­نىڭ الەم چەمپيو­نا­تىنا ءوز قالتاسىنان قارجى شىعارماي, ۇيىمداس­تىرۋشى جاق جا­رىس­قا قاتىسۋ ءۇشىن جولاقىسىن, جاتىن ورى­نىن تولەسە عانا بارامىز دەگەن اڭگىمە ايت­قانىن بىلدىك. قالاي بولسا دا بىزگە كەرەگى دە وسى بولدى. بۇل جەردە ءبىز بوكسشى­لارى­مىز­دىڭ كۋبالىقتاردان سەسكەنەدى, ولارعا وزدەرى جەڭىلىپ, التىندى ساناپ بەرەدى دەگىمىز كەلمەيدى. ايتايىن دەگەنىمىز, كۋبا كەلمەسە, ءبىزدىڭ باس جۇلدەگە دەگەن ءۇمىتىمىز ودان سايىن ار­تا­دى. دەگەنمەن بىزبەن بىرگە كەشەگى كەڭەس ود­ا­عى قۇرامىندا بولعان رەسەي, ۋكراينا, وزبەك­ستان مەن ازەربايجان كوماندالارىنىڭ دا جۇلدەگە دامەلى ەكەنىن ايتۋ كەرەك. سونىمەن بىرگە, ءۇندى­ستان, موڭعوليا سياقتى ءار جارىس­تان جۇلدەسىز قايتپايتىن ەلدەردى دە ۇمىت­پا­عانىمىز ءجون. ماسەلەن, ءۇندىستاننىڭ ءوزى سوڭ­عى الەم چەم­پيو­ناتىندا ەشكىمنىڭ كومەگىنسىز, تورەشىلەردىڭ قول­داۋىنسىز قولا جۇلدەنى يەلەنگەن كوماندا. قازىر بۇل ەلدىڭ بوكسشىلارى ءار جارىستان جۇلدەلى ورىندى يەلەنۋگە بارىن سالىپ كەلەدى. دەسەك تە, شىن مىقتىنى شارشى الاڭنىڭ ءوزى كورسەتەدى. تاعى ايتاتىن ءبىر نارسە, الەم چەمپيوناتىنا بىزدەن باسقا كوپتەگەن ەلدەر ەكى قۇراممەن كەلىپ وتىر. ەڭ كوپ بوكسشىسى بار ەل – رەسەي مەن ۋكراينا. ولاردىڭ قاتارىندا 26 بوكسشى بار. سونىڭ ىشىندە كوبىسى كاۆكازدىقتار مەن تۇركى تىلدەس حالىقتاردىڭ وكىلدەرى. رەسەيدە بوكس, كۇرەس, اۋىر اتلەتيكا سياقتى سپورت تۇرلەرىندە كاۆكازدىق نەمەسە تۇركى تەكتەس حالىقتاردىڭ وكىلدەرى باسىم ەكەنىن بىلەمىز. وسىلاي كەتە بەرسە, بولاشاقتا سولتۇستىكتەگى كورشىمىزدىڭ اتىنان مۇسىلمان حالىقتارى جارىستا ەل نامىسىن قورعايتىنىنا سەنىم مول. بيىلعى چەمپيوناتتا وزبەكستان دا ءبىراز بوكسشىسىن اكەلىپ وتىر. ولار­دىڭ قۇرامىندا 19 بالا بار. ءبىزدىڭ قۇراما­دا 13 بوكسشى قولعاپ تۇيىستىرەدى. ولاردىڭ ءبارى ءوز سالماق دارەجەسىندە ايقاساتىن ءوزىمىزدىڭ قارا كوزدەر. ال ەڭ از بوكسشىسى بار ەل – سەربيا قۇراماسى. ونىڭ ساپىندا شارشى الاڭعا 70 كگ. سالماقتا دەنيس مەمەتوۆيچ شىعادى. اۋعان­ستان, بانگلادەش, بوسنيا جانە گەرتسەگوۆينا, گرۋزيا, لاتۆيا, چەرنوگوريا, سلوۆاكيا ەلدەرى چەمپيوناتقا ەكى بوكسشىدان اكەلدى. ءبىزدىڭ قۇرامادا مىنا بوكسشىلار الەم چەم­پيوناتىنا قاتىسادى. ولجاس قالاۋبەك (46 كگ.), زاڭعار تەمىرحان (48 كگ.), الىبەك باساپا (50 كگ.), راۋان زاتۋلا (52 كگ.), بەكجان قيباتقاليەۆ (54 كگ.), ەركەبۇلان ەرمەكوۆ (57 كگ.), ايان قالىبەكوۆ (60 كگ.), قايىرگەلدى داۋىتبەك (63 كگ.), اقىلبەك ادىلعاليەۆ (66 كگ.), داۋلەت بايعاباتوۆ (70 كگ.), اسقار ءدۇيسالى (75 كگ.), تىلەك قوزباقوۆ (80 كگ.), تولەگەن ديدار (80 كيلودان جوعارى). داستان كەنجالين.