20 شىلدە كۇنى پرەمەر-مينيستر كارىم ءماسىموۆتىڭ توراعالىعىمەن «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى ديرەكتورلار كەڭەسىنىڭ كەزەكتى وتىرىسى بولىپ ءوتتى.
وندا قوردىڭ ەنشىلەس جانە باعىنىشتى كومپانيالارىنىڭ اكتسيالارىن ورنالاستىرۋ باعدارلاماسى قارالىپ, ول بۇتىندەي العاندا ماقۇلداندى.
سول سياقتى كەڭەس وتىرىسىندا قوردى دامىتۋ ستراتەگياسى تالقىلاندى. قازاقستاننىڭ الەمدىك قارجى داعدارىسى زارداپتارىن تابىستى ەڭسەرگەنىن ەسكەرە وتىرىپ, «سامۇرىق-قازىنا» قورى داعدارىسقا قارسى باعدارلامانى اياقتاپ, ءوزىنىڭ قۇرىلۋىنداعى باستاپقى ماقسات بولىپ تابىلاتىن قوردىڭ ءوزىنىڭ جانە ەنشىلەس كومپانيالارىنىڭ ۇزاق مەرزىمدى باعالىلىعىن ۇلعايتۋعا باعدار ۇستانۋى ءتيىس. ستراتەگياعا دەگەن جاڭا كوزقاراس كورپوراتيۆتى باسقارۋ پرينتسيپتەرىن ەنگىزۋ, يننوۆاتسيالاردى ىنتالاندىرۋ, بەلسەندى ينۆەستيتسيالىق ساياسات جۇرگىزۋ ەسەبىنەن قور كومپانيالارىنىڭ تيىمدىلىگى مەن باسەكەگە قابىلەتتىلىگىن ارتتىرۋ ماسەلەلەرىن قاراستىرادى.
«ەگەمەن-اقپارات».