ەلىمىزدىڭ باس پروكۋراتۋراسى كونستيتۋتسيامىزدا جازىلعانداي, زاڭدىلىقتى قاداعالاۋ بارىسىندا بارلىق سالادا قۇقىق قورعاۋعا ايرىقشا نازار اۋدارىپ وتىرادى. ۇستىمىزدەگى جىلى پرەزيدەنت «زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ بويىنشا قازاقستان رەسپۋبليكاسىنىڭ ۇيلەستىرۋ كەڭەسى جونىندەگى ەرەجەنى بەكىتۋ تۋرالى» جارلىققا قول قويدى. وسىلايشا, پروكۋراتۋرا ورگاندارىنا ەندى بارلىق قۇقىق قورعاۋ قىزمەتىن ۇيلەستىرۋ جونىندەگى جاۋاپتى مىندەت جۇكتەلدى. وسىعان وراي كەشە باس پروكۋرور اسحات داۋىلباەۆتىڭ توراعالىق ەتۋىمەن ەلىمىزدىڭ باس پروكۋراتۋراسىنىڭ كەڭەيتىلگەن القا ءماجىلىسى ءوتتى.
وتكەن كەزەڭدە پروكۋراتۋرا ورگاندارى ەلباسىنىڭ تاپسىرمالارىن جۇزەگە اسىرۋ باعىتىندا جۇمىس ىستەدى, – دەدى باس پروكۋروردىڭ ءبىرىنشى ورىنباسارى يوگان مەركەل. ولاردىڭ ىشىندە قۇقىق قورعاۋ ورگاندارى تيىمدىلىگىن ارتتىرۋ جانە قىزمەتىن ودان ءارى جەتىلدىرۋ, قىلمىسقا جانە جەمقورلىققا قارسى كۇرەسۋ, قىلمىستىق زاڭنامانى ىزگىلەندىرۋ, ازاماتتاردىڭ قۇقىقتارى مەن كاسىپكەرلەردى قورعاۋدىڭ كەپىلدىگىن ارتتىرۋ, سونداي-اق تۇتاستاي قاداعالاۋ قىزمەتىن ودان ءارى جەتىلدىرۋ باسىم باعىتتا ءجۇردى. كاسىپكەرلەرگە زاڭسىز تاعايىندالعان مىڭ جارىم تەكسەرۋگە توسقاۋىل قويىلدى. 378 زاڭسىز تەكسەرۋ انىقتالدى. 800-دەن استام ادام تارتىپتىك, 147-ءسى اكىمشىلىك جاۋاپكەرشىلىككە تارتىلدى. 6 لاۋازىمدى تۇلعاعا قاتىستى قىلمىستىق ءىس قوزعالدى.
وتكەن جارتىجىلدىقتا تەرگەۋ مەن انىقتاۋدىڭ زاڭدىلىعىن قاداعالاۋدى جۇرگىزۋ جونىندەگى جۇمىستار بىرقاتار العا باستى, دەدى بۇدان ءارى يوگان مەركەل. قۇقىق قورعاۋ ورگاندارىن رەفورمالاۋ جونىندەگى مەملەكەت باسشىسىنىڭ تاپسىرمالارىن ورىنداي وتىرىپ, پروكۋراتۋرا سوتقا
دەيىنگى ءوندىرىستى تۇبەگەيلى ءوزگەرتۋدىڭ باستاماشىسى بولدى, ناتيجەسىندە جاڭا قىلمىستىق ءىس-جۇرگىزۋ كودەكسىنىڭ جوباسىن جاساۋ باستالدى. ەسەپكە الۋ, تىركەۋ ءتارتىبىنە قاداعالاۋ تيىمدىلىگىن ارتتىرۋ بويىنشا بىرقاتار شارالار قابىلداندى. ازاماتتار سمس حابارلاما جىبەرۋ ارقىلى ارىزدارى مەن حابارلامالارىنىڭ قارالۋ بارىسىن باقىلاپ وتىرا الادى.
بتا بانك اكتيۆتەرىن مەملەكەتكە قايتارۋ جانە كىنالى ادامداردى جازالاۋ بويىنشا جۇمىستار جالعاسۋدا. جالپى سوماسى 1 ترلن. تەڭگەنى قۇرايتىن تالاپ ارىز ەنگىزىلدى. «ۆاليۋت ترانزيت بانك» اق باسشىسى جانە ونىڭ اكتسيونەرى بەلياەۆ 10 جىلعا باس بوستاندىعىنان ايىرىلدى. سول سياقتى حالىقارالىق ىنتىماقتاستىق اياسىندا بىرقاتار جەتىستىكتەرگە قول جەتتى. قىلمىسپەن كۇرەس سالاسىندا حالىقارالىق ىنتىماقتاستىقتى نىعايتۋ ءجونىندەگى جۇمىستار جۇرگىزىلۋدە. ماسەلەن, باس پروكۋراتۋرا شەت مەملەكەتتەر ىزدەستىرىپ جۇرگەن 56 ادامدى بەرۋ تۋرالى شەشىم قابىلدادى, ولاردىڭ ىشىندە ۇشەۋى الىس شەت ەلدەردەن (كورەيا جانە تۇركيا). قازاقستان اۋماعىنا 30 ادام ەكستراديتسيالاندى. شۆەتسيا قاراقشىلىق شابۋىل جاساعانى ءۇشىن قازاقستان رەسپۋبليكاسى ىزدەۋ جاريالاعان يريسمەتوۆ اۆازبەكتى بەردى. قازىرگى ۋاقىتتا ول قازاقستان اۋماعىنا اكەلىندى.يسپانيا كورولدىگى ءمامبەتوۆتى بەردى.وسىنداي شەشىمدەر ازاماتتاردىڭ قۇقىقتارى مەن بوستاندىقتارىن قامتاماسىز ەتە الاتىن جەتكىلىكتى قۇقىقتىق مەحانيزمدەر بەكىتىلگەن مەملەكەت رەتىندە قازاقستاننىڭ قۇقىق قورعاۋ جۇيەسىنە دەگەن سەنىمنىڭ كورسەتكىشى بولىپ تابىلادى.
القادا ازاماتتاردىڭ, كاسىپكەرلىك وكىلدەرىنىڭ, ۇلەسكەرلىك قۇرىلىسقا قاتىسۋشىلاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋگە ەرەكشە نازار اۋدارىلدى. سونداي-اق, مەملەكەت باسشىسىنىڭ تاپسىرمالارىن ساپالى جانە ۋاقتىلى ورىنداۋ بويىنشا وزگە دە ماڭىزدى مىندەتتەر مەن الداعى كەزەڭگە ارنالعان باسىمدىقتار ايقىندالدى. ناتيجەسىندە وبلىس پروكۋرورلارى جانە ولارعا تەڭەستىرىلگەن پروكۋرورلار, بەينەكونفەرەنتسيالىق بايلانىس ارقىلى وبلىستىق جانە اۋداندىق پروكۋراتۋرالاردىڭ قىزمەتكەرلەرى قاتىسقان القا جۇمىسىنىڭ قورىتىندىسى بويىنشا باس پروكۋرور ولاردىڭ الدىنا ۇيىمداسقان قىلمىسپەن, سىبايلاس جەمقورلىقپەن, كولەڭكەلى ەكونوميكامەن كۇرەستەگى ءۇيلەستىرۋشىلىك ءرولىن كۇشەيتۋ, كامەلەتكە جاسى تولماعاندارعا, زەينەتكەرلەرگە, مۇگەدەكتەر جانە باسقا مەملەكەت تاراپىنان ۇدايى قولداۋعا ءزارۋ ادامداردىڭ پروبلەمالارىنا جانە قۇقىقتارىنىڭ بۇزىلۋىنا ۇنەمى نازار اۋدارۋ, كاسىپكەرلەردىڭ قىزمەتىنە قۇقىق قورعاۋ ورگاندارى تاراپىنان نەگىزسىز ارالاسۋدى بولدىرماۋ ءجانە ولاردىڭ قۇقىقتارىن قورعاۋدى قاداعالاۋدى كۇشەيتۋ سەكىلدى ءبىرقاتار تاپسىرمالار بەردى.
الەكساندر تاسبولاتوۆ.