گرۋزيننەن شىققان اتاقتى شاحماتشى نونا گاپرينداشۆيليدىڭ ايەلدەر اراسىندا العاشقى الەم چەمپيونى بولعانى شاحماتتان حابارى بار كوپشىلىك بىلەدى. سىر ءوڭىرىنىڭ تۋماسى اسەل سەرىكباي دا كەلەشەكتە ودان اسىپ ءتۇسپەسە, كەم تۇسپەيتىنىن بايقاتىپ وتىر.
اسەل 2002 جىلى قىزىلوردا قالاسىندا دۇنيەگە كەلگەن. قالاداعى №136 تەمىربەك جۇرگەنوۆ اتىنداعى ورتا مەكتەپتىڭ 1 سىنىبىنا بارعاندا ول بەس جاستا بولاتىن. دايىندىققا ەكى اي بارعان اسەلدىڭ وقۋعا دەگەن زەرەكتىگىن, العىرلىعىن بايقاعان مەكتەپ ديرەكتورى قايىركۇل ءابديەۆا ونى 1-سىنىپقا قابىلداۋعا ۇيعارىم جاسادى. ءسويتىپ, ونى سىنىپ جەتەكشىسى جۇماكۇل يمانباەۆاعا تاپسىردى. جۇماكۇل اپايى پەداگوگيكالىق جاعىنان دارىندى, جاڭالىققا جانى قۇمار, رۋحاني الەمى باي, ءوز كاسىبىن جانىنداي جاقسى كورەتىن ۇلگىلى ۇستاز ەكەندىگىن تانىتتى. ءيا, اسەلدىڭ قالالىق وقۋشىلار سارايىنداعى شاحمات ءۇيىرمەسىنە بارۋىنا دا اپايى جۇماكۇلدىڭ اسەرى بولدى. ونىڭ وسى ۇيىرمەدە ءجۇرىپ قاتىسقان العاشقى جارىسى 2008 جىلى قاراعاندى قالاسىندا ءوتتى. گروسسمەيستر دارمەن ءسادۋاقاسوۆ اتىنداعى ءىىى رەسپۋبليكالىق شاحمات تۋرنيرىنە ەڭ جاس (6 جاستا بولاتىن) ويىنشى رەتىندە قاتىسىپ, ديپلوم, سەرتيفيكات الدى. بۇدان كەيىنگى كەزدەگى جەتىستىكتەرگە جەتۋىنە جاتتىقتىرۋشىسى ريزا قوشقاروۆانىڭ ەڭبەگى زور دەپ بىلەمىز.
اسەلدىڭ اتاسى سەرىكباي بۇرىن مەملەكەتتىك قىزمەتتە ىستەگەن, قازىر زەينەتكەرلىكتە. بىردە سەرىكباي اقساقال نەمەرەسىن ەرتىپ ۇيىمىزگە كەلدى. مەنىڭ بۇرىنعى شاحماتشى ەكەنىمدى بىلگەن بولار, اسەلدىڭ اياق الىسىن بايقاپ كورۋىمدى ءوتىندى.
سونىمەن اسەلمەن 3 پارتيا وينادىم, ەكەۋىن ۇتتىم دا, ءۇشىنشىسىندە جارىسقا كوڭىلى كوتەرىلىپ, قۋانىپ بارسىن دەگەن ويمەن جورتا ۇتىلدىم. اسەل سوندا: «اتا, انشەيىن وتىرىك جەڭىلدىڭىز عوي», دەپ مەنىڭ ويىمدى ءبىلىپ قويدى. ونداي ويدان اۋلاق بولۋى ءۇشىن تاعى دا ءبىر رەت «جەڭىلۋىمە» تۋرا كەلدى.
اسەلدىڭ رەسپۋبليكالىق تۋرنيرگە قاتىسۋى ودان ءارى جالعاسىن تابا بەردى. سونداي ءبىر كەزەكتى جارىس پاۆلودار قالاسىندا 2009 جىلى 7-8 جاستاعى شاحماتشىلاردىڭ اراسىندا ءوتىپ, اسەل ودان ءبىر كۇمىس, ءبىر قولا مەدالمەن ورالدى.
«نۇر وتان» حالىقتىق-دەموكراتيالىق پارتياسىنىڭ 10 جىلدىعىنا ۇيىمداستىرىلعان تۋرنيردە 1-ورىن, قىزىلوردا قالالىق جانە وبلىستىق بالالار مەن جاسوسپىرىمدەر اراسىنداعى شاحمات جارىستارىندا 1-ورىن, پاۆلودار قالاسىندا وتكەن «پرييرتىشيە» VIII حالىقارالىق بالالار فەستيۆالىنىڭ جارىسىندا «بليتستەن» 1-ورىن, كلاسسيكالىق ويىننان ءىى-ورىندى يەلەندى. ال «مەموريال ۋفيمتسەۆا ا.گ» اتىنداعى 7-8 جاس ارالىعىنداعى تۋرنيردە 1-ءشى ورىندى جەڭىپ الدى.
اسەل 2010 جىلى دا ۇلكەن جەتىستىكتەرگە جەتتى, ولاردىڭ ءبارىن ايتپاي-اق, ءبىر-ەكەۋىن عانا ايتا كەتەيىن دەسەم, سەمەي قالاسىندا وتكەن رەسپۋبليكالىق تۋرنيردە ءاسەل ءوزىنىڭ ەرەكشە دارىندىلىعىن كورسەتتى. وسى تۋرنيردە اسەل كلاسسيكادان 1-ءشى, «بليتستەن» – 1-ءشى جانە تەز ويناۋدان 1-ءشى ورىن الىپ, 3 التىن مەدالدى جەڭىپ الدى.
اسەلدىڭ 2010 جىلعى ەستە قالارلىقتاي زور جەڭىسى گرەتسيادا وتكەن الەم چەمپيوناتىندا 86 ەلدەن قاتىسقان شاحماتشىلار اراسىندا ءوزىنىڭ جاسى بويىنشا 11 ۇپايدان 8 ۇپاي جيناۋى ەدى.
اسەلدىڭ جەڭىستەرى ءۇستىمىزدەگى جىلى دا جالعاسىن تابۋدا. اتاپ ايتاتىن بولساق, 21-29 ناۋرىز ارالىعىندا وتكەن رەسپۋبليكالىق تۋرنيردە كلاسسيكالىق ويىننان 1-ءشى, تەز ويناۋدان 1-ءشى, «بليتس» ويىنىنان 2-ءشى ورىن الىپ, پولشادا وتەتىن ءالەم چەمپيوناتىنا جولداما الدى.
ال پولشانىڭ كراكوۆ قالاسىندا وقۋشىلار اراسىندا ءوتكەن الەم چەمپيوناتىندا اسەل 9 جاستاعى قۇربىلارى اراسىندا شۆەيتسار جۇيەسى بويىنشا سىنعا ءتۇسىپ, 9 ۇپايدان 8,5 ۇپاي الىپ, الەم چەمپيونى اتاندى. الداعى قازان ايىندا ول برازيليانىڭ ريو-دە-جانەيرو قالاسىندا وتەتىن 10 جاستاعى جاسوسپىرىمدەر اراسىنداعى الەم چەمپيوناتىنا قاتىساتىن بولىپ وتىر.
اسەل سەرىكبايدىڭ باس اياعى ەكى-ءۇش جىلدا 10 جاسقا دەيىنگى جاسوسپىرىمدەر اراسىنان الەم چەمپيونى بولۋى الداعى ۋاقىتتار ونىڭ كەلەشەگى كەمەل ەكەنىن بايقاتادى. وسىعان وراي مىنا ماسەلەلەردى دە ايتا كەتسەم دەيمىن. ياعني, اسەلدى مىقتى جاتتىقتىرۋشىنىڭ ءبىرى ءوز قامقورلىعىنا السا, سونداي-اق شەتەلدەرگە ەمىن-ەركىن شىعۋى ءۇشىن قالتالى ازاماتتار كومەك قولىن سوزسا, ەلىمىزدە شاحمات سالاسىنان دا ءبىر تالانت ومىرگە كەلگەلى تۇر.
قوجامجار ناۋرىزباەۆ. قىزىلوردا.