استانادا وتكەن 7-ءشى ءبۇكىلالەمدىك يسلام ەكونوميكالىق فورۋمىنا كەلىپ قاتىسقان ساۋد ارابياسى كورولدىگىنىڭ قارجى ءمينيسترى يبراگيم ءال-اساف كەشە سەمەيگە كەلىپ كەتتى. ال ونىڭ سەبەبى جوق ەمەس-ءتى. ياعني, ەلىمىز ەگەمەندىككە قول جەتكىزىپ, تاۋەلسىز مەملەكەت اتانعاننان بەرگى 20 جىل ىشىندە ەكى ەل اراسىنداعى ءوزارا بايلانىس ۋاقىت وتكەن سايىن وركەندەي ءتۇسىپ كەلەدى. ءبىر دەرەك وسى جىلدار ىشىندە ساۋد ارابياسىنان ءبىزدىڭ ەلىمىزدىڭ ەكونوميكاسىنا 40 ميلليون دوللار ينۆەستيتسيا قۇيىلعانىن ايعاقتايدى.
ال سونىڭ نەگىزگى بولىگى دەنساۋلىق ساقتاۋ سالاسىنا ءبولىنىپ وتىرعان كورىنەدى. بۇدان كەشەگى بەيبىت زاماننىڭ وزىندە قىرىق جىلعى قىرعىندى باسىنان كەشىرگەن يادرولىق سىناق ايماعى دا سىرت قالىپ وتىرعان جوق. سونىڭ ايعاعىنداي, وسىدان بىرەر اي بۇرىن ەر-ريادتا ەكى تاراپ سەمەيدە وكپە اۋرۋلارىن ەمدەيتىن بالالار اۋرۋحاناسىن سالۋ جونىندەگى مەموراندۋمعا قول قويعان بولاتىن. ال ونىڭ سىرتىندا ۇلىلاردىڭ ءىزى قالعان قاسيەتتى قالادا 2 مىڭ ورىندىق مەشىت قۇرىلىسىنىڭ باستالىپ كەتكەنىنە بيىل ءۇشىنشى جىل. قۇرىلىسى ارا-تۇرا توقتاپ قالىپ وتىرعان وسى مەشىتكە اتالعان مەملەكەت تاراپىنان كومەك بولادى ەكەن دەگەن اڭگىمەنىڭ شىققانىنا دا سونشا جىل بولىپ قالعان ەدى.
ابىروي بولعاندا, مارتەبەلى قوناق اتباسىن ەڭ الدىمەن وسى مەشىت قۇرىلىسىنا كەلىپ تىرەدى. قۇرىلىس الاڭىندا قازاقستان مۇسىلماندارى ءدىني باسقارماسىنىڭ سەمەي ءوڭىرى بويىنشا وكىل يمامى تىنىشتىقباي ياحيا ۇلى يماندىلىق ورداسىنىڭ ءبۇگىنگى جاي-كۇيىمەن تانىستىردى. پايدالى اۋدانىنىڭ ءوزى 1,5 مىڭ شارشى مەتردى قۇرايتىن ەكى مىڭ ورىندىق بۇل مەشىتتىڭ 300 ورىندىق مەدرەسەسى, ايەلدەردىڭ نامازعا جىعىلاتىن جەكە ورنى, كىتاپحانا, اسحاناسى بولماق. جاڭا مەشىتتىڭ ءدىني, رۋحاني ورىنعا اينالاتىندىعىنا ەش كۇدىك بولماسا كەرەك. بىراق جوقتىق جومارتتىڭ قولىن بايلايدى دەمەكشى, قارجى جاعىنان ارا-تۇرا قيىنشىلىق تۋىنداپ وتىرعانى دا شىندىق. وتكەن جىلى وبلىس اكىمى بەردىبەك ساپارباەۆتىڭ كۇش سالۋىمەن «قازاقمىس» كورپوراتسياسىنان 100 ميلليون تەڭگە قارجى كەلىپ ءتۇسىپ, توقتاپ قالعان قۇرىلىسقا قايتا جان بىتكەن. بىراق وسى ءبىر يگىلىكتى شارۋانىڭ اياقتالۋى ءۇشىن ءالى دە 3 ميلليون دوللار كولەمىندە قارجى كەرەك. ۋاقىتتان وزىپ ايتا كەتەيىك, ءوز ساپارىنىڭ سوڭىندا بۇقارالىق اقپارات قۇرالدارىنىڭ وكىلدەرىمەن وتكەن ءباسپاسوز كونفەرەنتسياسىندا يبراگيم ءال-اساف سەمەيلىكتەردىڭ ءۇمىت وتىن مازداتا تۇسكەن. تۇپكىلىكتى ءسوز ءتۇيىنى ەكى ەل اراسىنداعى كەلىسىمگە قاراي ورىستەيتىن سەكىلدى.
بۇدان كەيىن الىستان كەلگەن قوناق قالا سىرتىنداعى قاراعايلى ورمان ىشىندە سالىناتىن وكپە اۋرۋلارىن ەمدەيتىن بالالار اۋرۋحاناسىنىڭ جوباسىمەن تانىستى. وسى ارادا العاشقى ءسوز وبلىس اكىمى بەردىبەك ساپارباەۆقا بەرىلدى. ول ءوز ءسوزىندە كەشەگى يادرولىق سىناق زارداپتارى سالدارىنان سەمەي وڭىرىندە ءتۇرلى اۋرۋلاردىڭ ءالى دە ءورشىپ, باسىلماي تۇرعاندىعىن تىلگە تيەك ەتتى. سوندىقتان قولعا الىنىپ جاتقان وسى ءبىر يگى شارانى تەزدەتىپ ءىس جۇزىنە اسىرۋعا ىنتالىمىز. سول ماقساتتا قۇرىلىس ماتەريالدارى دا دايىن, قۇرىلىسشىلار دا ءوزىمىزدەن. شەتەلدىك مينيستر دە جاس جەتكىنشەكتەرگە ارنالعان بۇل قۇرىلىستىڭ ۋاقىتىندا بىتۋىنە مۇددەلى ەكەندىگىن ايتا كەلىپ, وزدەرىنىڭ تاراپىنان بولىنەتىن قارجى تاراپىنان ءمۇدىرىس بولمايتىندىعىنا سەندىردى. ءسوز اراسىندا ايتا كەتەيىك, وسى قۇرىلىس جيىنى 7 ميلليون ەۋرونى قاجەتسىنسە, ونىڭ 5 ميلليونىن ارابتار كوتەرىپ الامىز دەپ وتىر. جيىن سوڭىندا جەرگىلىكتى اكىم مەن شەتتەن كەلگەن مينيستر قۇرىلىس ىرگەسىنە ارنايى كاپسۋلا توسەدى.
وسى قۇرىلىس الاڭىنىڭ باسىندا ونىمەن اينالىسىپ جاتقان ءىرى قۇرىلىس كومپانياسىنىڭ باسشىسى, ەسىمى ەلگە كەڭىنەن تانىمال كاسىپكەر, وبلىستىق ءماسليحاتتىڭ دەپۋتاتى اسەمحان دوسقوجانوۆ جينالعانداردى قاراعايلى ورمان ىشىندەگى بالالار اۋرۋحاناسىنىڭ قۇرىلىسى الداعى جىلى قاتارعا قوسىلاتىندىعىنا سەندىردى. مۇنى دا تاۋەلسىزدىك تارتۋى دەمەسكە بولمايدى. بولماسا كەشەگى كەڭەس زامانىندا سىناق ايماعىنا قاي ەلدىڭ ءمينيسترى كەلىپ, جاعدايىڭا ءۇڭىلىپ ەدى. سوندىقتان تاۋبە دەيىك, اعايىن!
داۋلەت سەيسەن ۇلى.
سەمەي.