91 كيلودان جوعارى سالماقتا باق سىناعان قامشىبەك قوڭقاباەۆ پەن وزبەك بوكسشىسى باحودير دجالولوۆ اراسىنداعى جەكپە-جەك بىردەن الما-كەزەك شابۋىلدارمەن باستالدى.
قارسىلاسىنىڭ بويشاڭدىعىنا قاراماستان قوڭقاباەۆتىڭ سول قولمەن باعىتتاعان سوققىسى كوزدەگەن جەرىنە ءدوپ ءتيىپ جاتتى. دجالولوۆ تا قاراپ قالمادى. ءوز جانكۇيەرلەرى الدىندا ۇياتقا قالعىسى كەلمەسە كەرەك, قولىنىڭ ۇزىندىعىن پايدالانىپ, سوققىسىن جاساپ ۇلگەرىپ جاتتى. ءۇش راۋند بويى الما-كەزەك شابۋىلدارمەن وربىگەن كەزدەسۋدە تورەشىلەردىڭ شەشىمىمەن وزبەك بوكسشىسى جەڭىسكە جەتتى. وسىلايشا, قازاقستان قۇراماسى 1 التىن, 3 كۇمىس, 4 قولا مەدالدى يەمدەنىپ, بەيرەسمي كوماندالىق ەسەپتە ەكىنشى ورىن الدى. ال 9 التىن مەدال ەنشىلەگەن وزبەك بوكسشىلارى ءسوزسىز ازيا قۇرلىعى دوداسىندا كوش باستادى. الماس ماناپ, «ەگەمەن قازاقستان», تاشكەنتتەن. فوتو: دانيار مايلىباەۆ.