وزبەكستان استاناسى تاشكەنتتە ءوتىپ جاتقان ازيا چەمپيوناتىندا 81 كيلو سالماقتا جۇدىرىقتاسقان ەرىك ءالجانوۆ فينالدىق ايقاستا جەڭىلىسكە ۇشىرادى.
ەرىك ءالجانوۆ پەن وزبەك بوكسشىسى بەكتەمىر مەليكۋزيەۆ اراسىنداعى كەزدەسۋ بىردەن الما-كەزەك شابۋىلدارمەن باستالدى. ءالجانوۆ العاشقى راۋندتا شيراق قيمىلداپ, بىرنەشە سوققىسىن دارىتا الدى. ناتيجەسىندە, بەس تورەشىنىڭ ۇشەۋى قازاق بوكسشى ءبىرىنشى راۋندتا جەڭدى دەپ شەشىم قابىلداپتى. ال قالعان ەكى كەزەڭدە ءالجانوۆ شارشاپ قالعانداي كورىندى. وسى ءساتتى وزبەك بوكسشىسى دەر كەزىندە پايدالانىپ, ويلاستىرعان ايلا-تاسىلدەرىن ۇتىمدى پايدالاندى. قورىتىندىسىندا, ريو وليمپياداسىنىڭ كۇمىس جۇلدەگەرى ب.مەليكۋزيەۆ جەڭىسكە جەتىپ, ازيا چەمپيونى اتاندى. الماس ماناپ, «ەگەمەن قازاقستان». تاشكەنتتەن