يسپانيانىڭ «ينتەرى» ۋەفا كۋبوگىن ءۇش رەت جەڭىپ العان جۇيرىك. رەسەيدىڭ «يۋگرا» كومانداسى – ۋەفا كۋبوگىنىڭ سوڭعى جەڭىمپازى. قازاق ەلىنىڭ نامىسىن قورعايتىن «قايرات» فۋتزال كلۋبى – ۋەفا كۋبوگىنىڭ ەكى دۇركىن چەمپيونى. بىرىنەن ءبىرى وتكەن جىرىندى كوماندالار. جەرەبە ءساتتى بولسا ەكەن دەي المايسىڭ, ويتكەنى وسالى جوق.
دەگەنمەن «ينتەردى» ويلاساڭ, ءبىر قاۋىپ بۇيىرىڭنەن سوپاڭ ەتىپ شىعا كەلەدى. ونىڭ ساپىندا عاجايىپ فينتتەرىمەن كوز اربايتىن الەمنىڭ ەڭ ۇزدىك ويىنشىسى ريكاردينو بار.
وتكەن جۇمادا ءزاۋلىم «الماتى ارەنا» سپورت سارايىندا باستالعان ءتورت كوماندا ايقاسى ءا دەگەننەن قۇيىن ۇيىرە جونەلدى. العاشقى جارتىلاي فينالدا «سپورتينگ» رەسەيلىك «يۋگرانىڭ» جولىن كەستى – 2:1.
«قايرات» پەن «ينتەر» سىرالعى قارسىلاستارداي, ارباسپادى, اڭدىسپادى. تىكە ايقاسقا كوشتى. الا دوپتى زىرىلداتىپ, زىر قاقتىرىپ قۋالاعان شابۋىلشىلار ەكپىنى عالامات. ارپالىستىڭ 5-مينۋتىندە سول قاناتتان قالىقتاي كەلىپ كاۆرەلو تەپكەن دوپ ەسەپ اشتى – 1:0.
«قايرات» ءجيى ءتارتىپ بۇزۋدا. 10 مينۋت وتپەي جاتىپ ءتورت فول. بۇل – جاقسىلىقتىڭ بەلگىسى ەمەس.
نايزاعايداي جارق-جۇرق ەتكەن ريكاردينو. الەمنىڭ ەڭ ۇزدىك ويىنشىسى قورعاۋشىنى قاس-قاعىمدا قاپى قالدىرىپ, 13-مينۋتتا جارق ەتكىزىپ دوپ سوقتى – 1:1.
«ينتەر» داۋىلداتا باستادى. «قايرات» تا جانتالاسا ويناۋدا. 16-مينۋتتا دۋگلاس اتىپ شىققان قورعاۋشى الدىنان دوپتى بۇلت ەتكىزىپ بۇيىردەگى يگورعا تاستادى. يگور قاپىسىز سوقتى – 2:1. «فينالدا وينايتىن بولدىق» دەگەن وي تالاي سانادا جالت ەتتى.
ەكىنشى كەزەڭدە «ينتەر» نوسەر شابۋىلعا كوشتى. «قايرات» قاقپاسىنىڭ الدىندا ءتارتىپ بۇزىلدى, «ينتەر» شابۋىلشىسى ۇشىپ ءتۇستى. التى مەترلىك ايىپ دوبى. ريكاردينو قاقپا ماڭدايشاسى استىنا جەبەدەي قادادى – 2:2. الەمنىڭ ەڭ ۇزدىك قاقپاشىسى يگيتا ۇمتىلىپ تا ۇلگەرمەدى.
«قايرات» ءتارتىپ بۇزۋىن قويمادى, 4 فول. ۋاقىت بولسا تىنىستى تارىلتىپ بارادى. ەسەپ تەڭ. ءزاۋلىم سارايدى تولتىرعان 10238 جانكۇيەر – 20476 كوز ءبىر ءسات كىرپىك قاقپاي, دەم الماي قالعانداي. «شىركىن-اي!» دەيسىڭ تۇنشىعىپ, «شىركىن-اي!» دەيسىڭ ىشقىنىپ. تۋرا 1 مينۋت 18 سەكۋند قالعاندا ريكاردينو جالت ەتكىزىپ ءساتتى دوپ شىعارعانى. اشىق تۇرعان ورتيس جارق ەتكىزىپ, 10238 جۇرەكتى سولق ەتكىزىپ دوپ سوقتى – 3:2.
وزەكتى ورتەگەن وكىنىش. نەسىن ايتاسىڭ, وزىپ-اق تۇر ەدى عوي 2:1 ەسەبىمەن. ايىپ الاڭىندا ءتارتىپ بۇزباۋعا, ساق, ابايلاپ ويناۋعا بولماس پا ەدى؟! يگيتا بەسىنشى ويىنشى بولىپ نەگە قوسىلمادى؟ ونىڭ زەڭبىرەك وعىنداي تەپكەن دوپتارى ەۋروپا تورىندە مىقتى قاقپاشىلاردىڭ ءوزىن تالاي قاپى قالدىرعان. قيىن ساتتە كومانداعا نەگە كومەكتەسپەدى؟ باس باپكەر كاكاۋ نۇسقاۋى سولاي بولدى ما؟
جەكسەنبى. جانكۇيەر كىرپياز. فينالعا 6 مىڭنان استام عانا جانكۇيەر كەلدى. لاپ-لاپ ەتكەن جانكۇيەر كوڭىلىنە قاياۋ تۇسكەندەي. «قايرات» قولا مەدال ءۇشىن عانا ايقاسادى. سول قومسىناتىن قولا مەدالدى دە جەڭىپ الۋ كەرەك قوي.
«سپورتينگتەن» جەڭىلىپ, تىستەرىن قايراپ شىققان رەسەيلىكتەر ويىننىڭ ەكىنشى مينۋتىندا-اق ازۋ ءتىستى اقسيتتى. ۆلاديسلاۆ شاياحمەتوۆ جانكۇيەر جۇرەگىن زىرق ەتكىزىپ ەسەپ اشتى – 1:0. كوپ ۇزاماي ءبىزدىڭ زولتان دروت ەسەپتى تەڭەستىردى – 1:1. وسىدان كەيىن-اق ىرعاسىپ, ۇزەڭگى قاعىسىپ ۇزاي بەردى, ەسەپ ۇلعايا ءتۇستى. بۇل ارالىقتا رەسەيلىك دانيل داۆىدوۆتىڭ ءوز قاقپاسىنا دوپ سوعىپ, بىزگە كومەكتەسكەنىن دە ايتا كەتەيىك.
ەسەپ – 4:4. 38-مينۋتتا ديۆانەي «قايراتتى» ىلگەرى شىعاردى – 5:4. بىراق تۋرا 20 سەكۋند قالعاندا جانۇشىرعان مارسەنيو ەسەپتى تەڭەستىرىپ كەتتى – 5:5. نەگىزگى ۋاقىتتا 10 دوپ سوعىلدى. قولا مەدال قورعاسىنداي, مىزعىر ەمەس ورنىنان.
پەنالتي تەبۋ باستالدى. قالىڭ جانكۇيەر جۇيكەسى ۇستارا جۇزىندە. كەزەك رەسەيلىكتەرگە بەرىلدى. كايو مۇلتىكسىز سوقتى. ءبىزدىڭ زولتان دروت تا قاپىسىز تەپتى. ال لەسكو تەپكەن دوپتى يگيتا تىزەمەن قاقتى. وسى دوپ ويىن تاعدىرىن شەشكەندەي ەدى... «قايرات» 3:2 ەسەبىمەن قولا مەدالدى ارپالىستى اسا اۋىر ويىندا ج ۇلىپ الدى.
ال ۋەفا كۋبوگى ءۇشىن ايقاستا «ينتەر» پورتۋگاليالىق «سپورتينگتىڭ سىلىكپەسىن شىعاردى – 7:0. «ينتەر» ۋەفا كۋبوگىنىڭ 4 مارتە جەڭىمپازى! يسپانيانىڭ ۇلتتىق ليگاسىندا ويناپ جۇرگەن 16 كوماندانىڭ كوشىن باستاپ تۇرعان «ينتەر» قۇرلىقتا دا دارا تۇرعانىن دالەلدەدى. ال بىزگە بۇيىرعانى – قولا مەدال. سول مەدالدىڭ ءوزى ۋىسىمىزدان سۋسىپ كەتە جازدادى.
زەينەل جەكەي ۇلى