كەشە ەلورداداعى ۇلتتىق اكادەميالىق كىتاپحانادا مەملەكەتتىك حاتشى قانات ساۋداباەۆتىڭ قاتىسۋىمەن قازاقستان حالقى اسسامبلەياسى عىلىمي-ساراپتامالىق كەڭەسىنىڭ كەڭەيتىلگەن وتىرىسى ءوتتى. وتىرىستا ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ قحا-نىڭ 17 سەسسياسىندا بەرگەن تاپسىرمالارىنا سايكەس, عىلىمي-ساراپتامالىق كەڭەس قىزمەتىن كۇشەيتۋ, اسسامبلەيانىڭ ەتنوسارالىق جانە كونفەسسياارالىق قاتىناستاردى زەرتتەۋ بويىنشا ارنايى ورتالىعىن قۇرۋ ماسەلەلەرى تالقى تارازىسىنا ءتۇستى.
وتىرىسقا اسسامبلەيا كەڭەسىنىڭ مۇشەلەرى, ەلىمىزدىڭ ورتالىق مەملەكەتتىك ورگاندارىنىڭ باسشىلارى, عىلىمي-ساراپتامالىق كەڭەس مۇشەلەرى, پارلامەنت دەپۋتاتتارى, ەتنوسارالىق قاتىناستار سالاسىنداعى جەتەكشى عالىمدار مەن ماماندار قاتىستى.
جيىن بارىسىندا ءسوز العان مەملەكەتتىك حاتشى قانات ساۋداباەۆ ءوزىنىڭ سوزىندە «بۇگىنگى تاڭدا ەلىمىزدە ەلباسىنىڭ سەنىمدى ستراتەگيالىق جانە قالتقىسىز قىزمەتىنىڭ ارقاسىندا الەۋمەتتىك-ەكونوميكالىق دامۋدىڭ وزەكتى ءماسەلەلەرى شەشىلىپ وتىرعان قازاقستانعا قوعامدىق دامۋ ۇدەرىستەرىن, ونىڭ ىشىندە ەتنوسارالىق جانە دىنارالىق قاتىناستاردى عىلىمي تۇرعىدا ساراپتاۋدىڭ يننوۆاتسيالىق تاسىلدەرى قاجەت», – دەپ اتاپ ءوتتى. ونىڭ ايتۋىنشا, عىلىمي-ساراپتامالىق كەڭەس جانە كونفەسسياارالىق قاتىناستاردى زەرتتەۋ بويىنشا قۇرىلاتىن ورتالىق باسقا عىلىمي-تالداۋ ۇيىمدارىمەن بىرگە ەتنوسارالىق قاتىناستار سالاسىنداعى ىرگەلى, اسىرەسە, قولدانبالى زەرتتەۋ جۇمىستارىن قامتاماسىز ەتۋى قاجەت.
«بيىل قازاقستان تاۋەلسىزدىگىنە 20 جىل. تاريح ءۇشىن 20 جىل دەگەن قاس قاعىم ءسات. ءبىز وسىنداي قىسقا مەرزىمدە وركەنيەتتى ەل رەتىندە الەمگە تانىلدىق. قاجىر-قايراتىمىز ارقىلى جاڭا مەملەكەتتەن وزىق ويلى قوعام قۇردىق. وسى العا باسۋدىڭ العىشارتى حالقىمىزدىڭ سۇتتەي ۇيىعان بىرلىگى مەن ەتنوستار اراسىنداعى ىنتىماعى. الەمگە قازاقستان حالقى اسسامبلەياسىنىڭ ۇلگىسىمەن تانىلدىق. سوندىقتان, قالىپتاسقان قازاقستاندىق ەتنوستىق قوعامنىڭ بۇگىنگى كۇنگى دامۋىن زەردەلەۋ, كونفەسسيالىق اعىمداردىڭ باعىت-باعدارىن انىقتاۋ, ۇيلەسىمدىلىگىن الدىن-الا بولجاۋ جۇمىسىن قولعا العانىمىز دۇرىس. قوعامدىق كەلىسىمدى ساقتاپ قالۋ ءۇشىن بۇگىنگى تاڭدا عىلىمي نەگىزدەمەلەر مەن زەرتتەۋلەر قاجەت»,– دەدى مەملەكەتتىك حاتشى.
وتىرىس بارىسىندا قوعامنىڭ ينتەللەكتۋالدىق اۋانىن قالىپتاستىرىپ, ول ءۇشىن ەتنوسارالىق قاتىناستارعا عىلىمنىڭ بەلسەندى قاتىسۋىن قامتاماسىز ەتۋ قاجەتتىگى دە اتاپ ءوتىلدى. قاتىسۋشىلار پىكىرىنشە, ادامداردىڭ اراسىنداعى قاتىناستاردى, ياعني ەتنوستار اراسىنداعى قاتىناستارمەن ۇلتارالىق كەلىسىمدى دامىتۋ باعىتىندا مۇنداي ورتالىق اشۋدىڭ ماڭىزى زور. قازاقستان كوپ ەتنوستى ەل. سوندىقتان, بۇل ورتالىق ءتىل, ءدىن, مادەنيەت, رۋحاني سالالاردى جانداندىرۋ, اسىرەسە جاستاردى وتانشىلدىق رۋحتا تاربيەلەۋ ءۇشىن ۇلكەن ءرول اتقاراتىن ورتالىققا اينالۋى ءتيىس دەگەن ورتاق ويلارىن ورتاعا سالدى جيىنعا قاتىسۋشىلار.
بۇل كۇنى عىلىمي-ساراپتامالىق كەڭەس قىزمەتىنىڭ قورىتىندىلارى, ەتنوسارالىق جانە كونفەسسياارالىق قاتىناستار سالاسىنداعى مەملەكەتتىك الەۋمەتتىك تاپسىرىستار اياسىنداعى عىلىمي باعدارلامالار مەن زەرتتەۋ جوبالارىن ىسكە اسىرۋدا قحا-نىڭ مينيسترلىكتەر مەن ۆەدومستۆولارمەن ءوزارا قارىم-قاتىناسى ماسەلەلەرى قارالدى.
وتىرىس سوڭىندا مەملەكەتتىك قۇرىلىمدار, مۇددەلى عىلىمي جانە ءبىلىم بەرۋ ۇيىمدارى, ەتنومادەني بىرلەستىكتەر ءۇشىن ۇسىنىستار قابىلداندى.
ءلايلا ەدىلقىزى.