ماقسات قوعامدىق قابىلداۋ بولمەلەرىنىڭ تيىمدىلىگى مەن بەلسەندىلىگىن ارتتىرۋ بولىپ وتىر. وتكەن جىلى پارتيانىڭ قوعامدىق قابىلداۋىنا 78 مىڭنان استام ادام حات ارقىلى جانە جەكە وزدەرى كەلىپ ارىز-شاعىمدارىن جەتكىزگەن. بۇل حالىقتىڭ پارتياعا دەگەن زور سەنىمىن جانە ونىڭ جىلدان-جىلعا ارتىپ كەلە جاتقانىن كورسەتەدى. سالىستىرمالى تۇردە ايتاتىن بولساق, 2009 جىلمەن سالىستىرعاندا 2010 جىلى قوعامدىق قابىلداۋعا كەلگەندەر سانى 11 مىڭ, ال 2008 جىلمەن سالىستىرعاندا 30 مىڭعا ارتقان.
پارتيا باسشىلىعى قوعامدىق قابىلداۋ بولمەلەرىنىڭ تيىمدىلىگىن ارتتىرا ءتۇسۋ ماقساتىندا ولاردىڭ اراسىندا بايقاۋ جاريالاعان بولاتىن. كەشە پارتيانىڭ ورتالىق اپپاراتىندا سولاردىڭ اراسىنان ۇزدىكتەرى انىقتالدى. بايقاۋعا بارلىعى 257 قوعامدىق قابىلداۋ بولمەلەرى قاتىستى. ولاردىڭ ىشىندەگى ۇزدىكتەرىن انىقتاۋ كەزىندە كەلىپ تۇسكەن حاتتاردى ساپالى ءارى ۋاقىتىلى قاراۋ, قوعامدىق قابىلداۋ ءبولمەلەرىن جەتىلدىرۋ بويىنشا باستامالار كوتەرۋ, مەملەكەتتىك ورگاندارمەن بىرلەسكەن قىزمەت, بۇقارالىق اقپارات قۇرالدارىندا ءوز قىزمەتىن كورسەتۋ, سونداي-اق قابىلداۋ بولمەلەرىن بەزەندىرۋ سياقتى كريتەريلەر ەسەپكە الىندى.
بايقاۋ جەڭىمپازدارىن قۇتتىقتاۋ كەزىندە «نۇر وتان» پارتياسى توراعاسىنىڭ ءبىرىنشى ورىنباسارى نۇرلان نىعماتۋلين: «ءبىز ءۇشىن ەڭ باستىسى – ازاماتتاردىڭ ماسەلەلەرىن جىلدام شەشۋگە بارلىق جاعداي جاساۋ. بۇل – ەلباسىمىز, پارتيامىزدىڭ توراعاسى نۇرسۇلتان نازارباەۆتىڭ ءبىزدىڭ الدىمىزعا قويعان ەڭ نەگىزگى مىندەتى. بۇگىندە «نۇر وتان» پارتياسىنىڭ قوعامدىق قابىلداۋ بولمەلەرى ازاماتتار مەن مەملەكەتتىك ورگاندار اراسىنداعى ماڭىزدى ءارى ءتيىمدى بايلانىستىرۋ قۇرالى رەتىندە تانىلدى», – دەدى.
حالىقتى تولعاندىراتىن ءماسەلەلەردى شەشۋدىڭ تيىمدىلىگىن ارتتىرۋ ماقساتىندا پارتيا ءاردايىم وسى قىزمەتتىڭ جاڭا فورمالارىن تاۋىپ, قولدانۋعا تىرىسادى. پارتيا توراعاسىنىڭ ءبىرىنشى ورىنباسارى نۇرلان نىعماتۋلين بايقاۋ قورىتىندىلارىن جاريالاعاندا, الدا تۇرعان مىندەتتەردىڭ باستى باعىتتارىن دا ايقىنداپ بەردى. ولاردىڭ ىشىندە قابىلدايتىن ازاماتتاردىڭ سانىن كوبەيتۋ ارقىلى مەملەكەتتىك ورگاندارمەن ءوزارا ارەكەت بەلسەندىلىگىن ارتتىرۋ, حاتتاردى قاراۋدىڭ ساپاسى مەن قورىتىندىسىن ەرەكشە باقىلاۋ, تۇيتكىل ماسەلەلەردى شەشۋ مەن ولاردىڭ قورىتىندىلارىن بۇقارالىق اقپارات قۇرالدارىندا كەڭىنەن بايانداۋ قاجەتتىگى اتاپ ءوتىلدى. وسىنداي قوعامدىق قابىلداۋ بولمەلەرىنىڭ بايقاۋى ەندى جىل سايىن وتكىزىلەتىن بولدى. بيىلعى بايقاۋ قازاقستان رەسپۋبليكاسى تاۋەلسىزدىگىنىڭ 20 جىلدىعىنا ورايلاستىرىلىپ وتىر.
ءسويتىپ, العاش رەت وتكىزىلگەن «ۇزدىك قابىلداۋ بولمەسى» بايقاۋىنىڭ جەڭىمپازدارى بولىپ مىنالار تانىلدى: «نۇر وتان» حدپ استانا قالالىق فيليالىنىڭ قوعامدىق قابىلداۋ ءبولمەسى (باس جۇلدە), «نۇر وتان» حدپ پاۆلودار وبلىستىق فيليالىنىڭ قوعامدىق قابىلداۋ ءبولمەسى (1-ورىن), «نۇر وتان» حدپ وڭتۇستىك قازاقستان وبلىستىق فيليالىنىڭ قوعامدىق قابىلداۋ بولمەسى (2-ورىن) جانە «نۇر وتان» حدپ قوستاناي وبلىستىق فيليالىنىڭ قوعامدىق قابىلداۋ بولمەسى (3-ورىن).
جۇلدەگەرلەرگە ءتيىستى سىيلىقتار مەن ماراپاتتار تابىس ەتىلدى.
جاقسىباي سامرات.