الداعى تامىز ايىندا داۋىلپاز اقىن قاسىم امانجولوۆتىڭ تۋعانىنا 100 جىل تولۋى مەرەيتويى قاراعاندىدا باستالىپ, كىندىك قانى تامعان توپىراعى قارقارالىدا وتكەلى وتىر. بۇل كۇندە وڭىردە وسى ايتۋلى وقيعانى ءسان-سالتاناتپەن وتكىزۋگە ازىرلىك قىزۋ جۇرگىزىلۋدە. ونىڭ بارىسى تۋرالى وبلىستىق مادەنيەت باسقارماسىنىڭ باستىعى بەكبولات بايساعاتوۆتى اڭگىمەگە تارتقان ەدىك.
– بىلەتىنىمىزدەي دايىندىق جىل باسىنان-اق قولعا الىنعان ەكەن. الدىمەن سودان بەرىدە اتقارىلعان ءىس-شارالارعا توقتالىپ وتسەڭىز.
– بۇل حالقىمىزعا ورتاق مەرەيتوي بولعاندىقتان ەلىمىزدە جاپپاي اتالىپ ءوتۋى ءۇشىن قاڭتار ايىندا ۇكىمەت قاۋلىسى قابىلداندى. سوعان سايكەس ول ءبىر مەزگىلدىك عانا شارا ەمەس, جىل اياعىنا دەيىن قاسىم اقىن رۋحى مەن جىرىنىڭ جاڭعىرۋى جالعاسادى. ءبىلىم بەرۋ ورىندارىندا, ءمادەنيەت وشاقتارىندا ءومىرى مەن شىعارماشىلىعىنا ارنالىپ ۇيىمداستىرىلعان عىلىمي-پراكتيكالىق كونفەرەنتسيالار, پوەزيا كەشتەرى, كىتاپ كورمەلەرى باسقا دا مادەني-كوپشىلىك شارالارعا ۇلاسىپ, اسىل مۇراسى جاڭادان جارقىراپ تانىلىپ جاتىر.
ايماقتا قاي ونەر ورتاسى دا ءوز تارتۋلارىن ارناۋعا جۇمىلۋدا. اقپان ايىندا ساكەن سەيفۋللين اتىنداعى قازاق دراما تەاترىندا اقىننىڭ «دوسىمنىڭ ۇيلەنۋى» كومەدياسى ساحنالانسا, جاقىندا جەزقازعاندىق ارتىستەر شىعارمالارى بويىنشا «ءدۇنيەگە كەلەر ءالى تالاي قاسىم» تاقىرىبىمەن قويىلىمدى كورسەتتى. مامىردىڭ 12-13 كۇندەرىندە جاس ءىزباسارلارىنىڭ وبلىستىق ءمۇشايراسى ءوتتى. سونداي-اق «كوڭىلدىڭ كۇيىن توگەيىك» ءان بايقاۋى سان قىرلى تۇلعانىڭ ءان-سازدىق مۇراسىن الدىعا تاعى ءبىر جايدى. بۇگىندە ول جەكە ديسكى ەتىپ شىعارىلۋعا دايىن, سونىمەن بىرگە تاڭدامالى ولەڭدەرىنىڭ ءبىر تومدىعى مەرەيتويعا دەيىن وقىرماندار قولىنا تيمەك.
– بەكبولات, ءسوز ورايىندا مەرەكەنىڭ ناقتى قاي كۇندەرگە بەلگىلەنگەنىن ايتساڭىز. ول قاشان, قالاي باستالادى؟
– ارقادا تامىزدىڭ ورتاسى ادەتتە تامىلجىعان كەز عوي. سوندىقتان تامىز ايىنىڭ 17-20 ارالىعى قولايلى سانالدى. ەلىمىزدىڭ بارلىق وڭىرلەرىنەن كەلەتىن مەيماندار قارقارالىنىڭ اسەم تابيعاتى اياسىندا حالقىمىزدىڭ اياۋلى پەرزەنتى مەرەيتويى ءدۇبىرىن قىزىقتاي الادى.
سالتانات شىمىلدىعى قاسىم امانجولوۆتىڭ قاراعاندىدا بوي كوتەرەتىن ەسكەرتكىشىنە تاعزىم ەتۋمەن اشىلادى. ايتا كەتۋ كەرەك, بەينەسىن كوز الدىعا كەلتىرەتىن ەڭسەلى ءمۇسىن ساكەن سەيفۋللين كوشەسىنىڭ قيىلىسىنان ورتالىق ساياباققا كىرەبەرىس تۇستا ورناتىلۋدا. وبلىس ورتالىعىندا وتەتىن مەرەيتويلىق جيىننان سوڭ سالتانات قارقارالىعا, اقىن اتىنداعى اۋىلعا اۋىسادى.
– جينالۋشىلاردى قانداي راسىمدەر كۇتىپ تۇر؟
– البەتتە باعدارلاما اياسى اۋقىمدى. ونەر سالاسى مەن ۇلتتىق سپورت ويىندارى تويدىڭ باستى ءسانى مەن كوركى بولماق. اقىنداردىڭ رەسپۋبليكالىق ءمۇشايراسى تاقىرىبى قاسىمنىڭ قازاق پوەزياسىنداعى ورنىن اشىپ كورسەتۋگە ارنالادى. وعان جاس ايىرماشىلىقتارىنا قاراماستان قاي ولكەدەن دە قانداي دا تالاپكەر قاتىسۋعا ەرىكتى ەكەنىن ايتا كەتكەن ءجون شىعار. وسى جىر دوداسى جەڭىمپازدارىنا بەلگىلەنگەن سىي-سياپات بار. كوزگە تۇسكەن ولەڭ-جىرلار جىل اياعىنا دەيىن جيناق بولىپ شىعارىلادى. ال ونەر ءدۇلدۇلدەرىنىڭ ءدۇبىرلى دۋمانى ءوز الدىنا ءبىر بولەك. ات جارىسى مەن بالۋاندار سايىسى توي قىزىعىن قىزدىراتىنى تالاسسىز.
قازىر مەرەيتويعا دايىندىق وبلىس باسشىلارىنىڭ كۇنبە-كۇنگى تىكەلەي نازارىندا. سوعان بايلانىستى كوپ ماسەلەلەر وڭ شەشىمىن تاۋىپ كەلەدى.
قاسىم امانجولوۆتىڭ ەسىمى مەن جىرى حالقىنىڭ جادى مەن جۇرەگىنەن بەرىك ورىن الىپ, ءوشپەۋگە اينالعانىنا ۋاقىت كۋا. قازاق پوەزياسىنىڭ شوق جۇلدىزىنداي ءاردايىم جارقىراتىپ تۇراتىن ۇلى اقىننىڭ دۇنيەگە كەلگەن عاسىرلىق مەرەيتويى ۇمىلماستاي ەستە قالاتىنى حاق.
اڭگىمەلەسكەن ايقىن نەسىپباي, قاراعاندى.