پەرۋدىڭ استاناسى ليما قالاسىندا اۋىر اتلەتيكادان 17 جاسقا دەيىنگى ءجاسوسپىرىمدەر اراسىندا وتكەن الەم بىرىنشىلىگى اياقتالدى. وعان قازاقستاننىڭ قوس سپورتشىسى – ادىلبەك بالقاەۆ پەن نادەجدا نوگاي قاتىستى.
جەكسەنبىدە, جارىس بىتكەن كۇنى مۇحيتتىڭ ارعى جاعىنان التىن جۇلدەنىڭ سىڭعىرى ەستىلدى. 69 كيلودان جوعارى سالماق دارەجەسىندە كۇش سىناسقان نادەجدا نوگاي بارلىق ءۇش جاتتىعۋ بويىنشا التىننان القا تاعىنىپ, الەم چەمپيونى اتاندى. ونىڭ ءناتيجەسى – 272 كيلو. (121 كگ. جۇلقىپ جانە 151 سەرپە كگ.) نادەجدا ەكىنشى ورىن العان مەكسيكالىق گۋەنو پلانەسيا كلاديستان 48 كيلو ارتىق كوتەردى. ءسويتىپ, ءوز قاتارلاستارى اراسىندا الەمدىك رەكوردقا وزگەرىس ەنگىزدى. مۇنىڭ الدىندا جۇما كۇنى 69 كيلو سالماقتا باق سىناعان ادىلبەك بالقاەۆ تا ءوز جانكۇيەرلەرىن قۋانتتى. جۇلقي كوتەرۋدە ول 130 كيلونى (كىشى كۇمىس مەدال) ەڭسەرسە, سەرپىپ كوتەرۋدە 155 كيلولىق (كىشى قولا مەدال) زىلتەمىردى باعىندىردى. قوسسايىستىڭ قورىتىندىسى بويىنشا 285 كيلو سالماقتى ەڭسەرگەن قانداسىمىز قولا مەدالدى ولجالادى. ەگەر بالقاەۆ حالىقارالىق ارەنادا العاش رەت ونەر كورسەتىپ وتىرعانىن ەسكەرسەك, بۇل ءسوز جوق, وتە جاقسى ناتيجە.
ادىلبەك – قىزىلوردا وبلىسى شيەلى اۋدانىنىڭ مايلىتوعاي اۋىلىنىڭ تۇلەگى. بىلىكتى باپكەر ارمان ابدراەۆتىڭ قول استىندا جاتتىقتى. ءوزىنىڭ العاشقى تابىسىنا ادىلبەك بالقاەۆ 2007 جىلى قول جەتكىزدى. اقتوبەدە رەسپۋبليكالىق تۋرنير ءوتىپ, سول جارىستا ول توپ جاردى. 2008 جىلى جاسوسپىرىمدەر اراسىنداعى قازاقستان چەمپيونى اتاندى. كەيىننەن تاعى ءتورت مارتە ەل ءبىرىنشىلىگىنىڭ باس جۇلدەسىنە يە بولدى. سونىمەن قوسا ەرەسەكتەر سايىسىندا باق سىناي باستادى. 2009 جىلى 15 جاسار بوزابالا تالدىقورعاندا جالاۋى جەلبىرەگەن قازاقستان چەمپيوناتىندا 62 كيلو سالماقتا سىنعا ءتۇسىپ, قولا ءجۇلدەگەر اتاندى. بىلتىر شىمكەنتتە ەل كۋبوگى جولىنداعى جارىستا جەڭىمپاز اتانىپ, 23 جاسقا دەيىنگىلەر اراسىنداعى رەسپۋبليكا بىرىنشىلىگىندە التىن مەدالدى موينىنا ءىلدى.
بيىلعى ماۋسىم دا بالقاەۆ ءۇشىن جامان باستالعان جوق. وسىدان ءبىر اي بۇرىن شىمكەنتتە ءوتكەن قازاقستان چەمپيوناتىندا ول 69 كيلو سالماقتا كۇش سىناسىپ, 20 ۇمىتكەردىڭ اراسىندا ءۇشىنشى ورىن الدى. مىنە, ەندى تورتكۇل دۇنيەنىڭ تالانتتى جاستارى باس قوسقان جارىستا ادىلبەك قولا مەدالدى يەلەندى.
– ادىلبەك بالقاەۆ مەنىڭ ءشاكىرتىم اسقار ابدراەۆتىڭ قولاستىندا وسى سپورت ءتۇرىنىڭ قىر-سىرىنا قانىقتى. قازىر ۇلتتىق كوماندامىزدىڭ مۇشەسى. ول جاستىعىنا قاراماستان ءوزىنەن الدەقايدا تاجىريبەسى مول اتلەتتەرمەن يىق تىرەسىپ ءجۇر. ول ەڭبەكقور جىگىت. ەرتە مە, كەش پە, بۇل بالانىڭ جارىق ەتىپ شىعاتىنىنا ەش كۇمان كەلتىرمەيمىن. جالپى, قازاقستاندا اۋىر اتلەتيكانىڭ دامۋىنا بارىنشا جاعداي جاسالىپ جاتىر. رەسپۋبليكالىق فەدەراتسيا مەن تۋريزم ءجانە سپورت مينيسترىلىگى تاراپىنان قولداۋ كورسەتىلۋدە. «سامۇرىق-قازىنا» ۇلتتىق ءال-اۋقات قورى زىلتەمىرشىلەردى ءوز قامقورلىعىنا الدى. ال ولاي بولسا, ءادىلبەك تە, باسقالارى دا جاتتىعۋ بارىسىندا بارىن سالىپ, بايراقتى باسەكەلەردە اتوي سالۋعا ءتيىس, – دەيدى قازاقستان ۇلتتىق قۇراماسىنىڭ اعا جاتتىقتىرۋشىسى ۆيلوري پاك.
بۇگىن دۇيسەنبىدەن سەيسەنبىگە قاراعان ءتۇنى ساعات 02.00-دە الەم چەمپيوناتىندا تابىستى ونەر كورسەتكەن سپورتشىلارىمىز بەن ولاردىڭ باپكەرلەرى امستەردام-الماتى رەيسى ەلگە ورالدى.
داستان كەنجالين.