استانادا شاعىن-فۋتبولدان بالالار جانە ءجاسوسپىرىمدەر اراسىندا «قازمۇنايگاز» كۋبوگى ءۇشىن قالالىق تۋرنير باستالدى.
جەكسەنبى كۇنى استانا قالاسىنداعى № 28 ورتا مەكتەپتىڭ سپورت الاڭىندا باستالىپ, ەلىمىز تاۋەلسىزدىگىنىڭ 20 جىلدىعىنا وراي وتكىزىلىپ وتىرعان ءتۋرنيردىڭ ۇيىمداستىرۋشىلارى – «قازمۇنايگاز» ۇك» اق, قازاقستان فۋتبول فەدەراتسياسى, استانا قالاسى ءبىلىم باسقارماسى مەن «شىعىس» بالالار مەن جاسوسپىرىمدەر ورتالىعى.
تۋرنير ەلىمىزدە بۇقارالىق سپورتتى دامىتۋ جانە بالالار مەن جاسوسپىرىمدەر فۋتبولىن كوپشىلىككە دارىپتەۋ ماقساتىندا ءوتكىزىلۋدە. شاراعا 2000-2001 جىلدارى تۋعان استانا قالاسىنىڭ جالپى ءبىلىم بەرەتىن مەكتەپتەرىنىڭ 80 وقۋشىسى قاتىسۋدا. تۋرنيردىڭ اشىلۋ سالتاناتىندا كوماندالاردى «قاز مۇنايگاز» اق بيزنەستى قولداۋ ءجونىندەگى باسشى مەنەدجەرى سەرىكبەك ەلشىبەكوۆ, قازاقستان فۋتبول فەدەراتسياسىنىڭ اتقارۋشى ديرەكتورى ءاليا دۇيسەكەەۆا جانە باسقالار قۇتتىقتادى.
بيىلعى جىلى مۇنداي تۋرنيرلەر قمگ ەنشىلەس كومپانيالارى «قازترانسگاز» اق جانە «قاز- ترانسويل» اق قولداۋىمەن شىمكەنت جانە پاۆلودار قالالارى مەكتەپ وقۋشىلارىنىڭ اراسىندا دا وتكىزىلەدى. قالالىق جارىستاردا ءبىرىنشى جانە ەكىنشى ورىن العان كوماندالارعا رەسپۋبليكالىق فينالعا جولداما بەرىلەدى. بۇل تۋرنيرلەردى «قازمۇنايگاز» ۇك كوپ قىزمەتتى سپورت الاڭدارىندا ءوتكىزۋ جوسپارلانۋدا. قۇرىلىس باعدارلاماسىنا سايكەس 2010 جىلى قمگ ءجانە ونىڭ ەنشىلەس كومپانيالارى – 29, استانا قالاسىندا – 10, ماڭعىستاۋ وبلىسىنىڭ جاڭاوزەن قالاسىندا – 10, شىمكەنتتە – 3, پاۆلوداردا 5 سپورت الاڭىنىڭ قۇرىلىسىن اياقتادى. بيىلعى جىلى الماتى قالاسىندا – 5, ەلىمىزدىڭ باسقا دا ايماقتارىندا 15 سپورت الاڭىن سالۋ جوسپارلانىپ وتىر. سپورت الاڭىنىڭ قۇرىلىسىنا قولدانىلاتىن ماتەريالدار مەن تەحنولوگيالار ەكولوگيالىق, سانيتارلىق-گيگيەنالىق, ورتكە قارسى جانە باسقا دا ەرەجەلەر مەن تالاپتارعا ساي كەلەدى ءجانە سپورتتىق جامىلعىنى كاسىبي تۇردە ورناتۋ كوزدەلۋدە. فۋتبول الاڭىنداعى جاساندى كوگال FIFA جانە UEFA-دا سەرتيفيكاتتالىپ, اتتەستاتسيالاۋدان وتكەن.
قالالىق تۋرنيردە جەڭىمپاز اتانعان, ەكىنشى جانە ءۇشىنشى ورىن العان كوماندالار «قازمۇنايگاز» كۋبوگىمەن, ديپلومدارمەن جانە ءتيىستى دارەجەدەگى مەدالدار جانە ەستەلىك سىيلىقتارمەن ماراپاتتالادى.