وسى كۇندەرى ەلىمىزدىڭ جەر-جەرىندە قازاق حالقىنىڭ داڭقتى ۇلى, اتاقتى بالۋان قاجىمۇقان مۇڭايتپاس ۇلىنىڭ تۋعانىنا 140 جىل تولۋىنا وراي ءتۇرلى ءىس-شارالار وتۋدە. جاقىندا كۇش اتاسى تۋعان استانا ىرگەسىندەگى قاجىمۇقان اۋىلى مەن كوكشەتاۋ قالاسىندا ايگىلى بالۋاننىڭ قۇرمەتىنە ارنالعان سپورتتىق-مادەني شارالاردىڭ وتكەنى بەلگىلى.
ال جۇما كۇنى وسى ءىس-شارانىڭ جالعاسى رەتىندە استاناداعى قاجىمۇقان اتىنداعى سپورتتا دارىندى بالالارعا ارنالعان رەسپۋبليكالىق مەكتەپ-ينتەرناتتا بالۋاننىڭ تۋعانىنا 140 جىل تولۋىنا وراي تاعى ءبىر تانىمدىق-مادەني كەشتىڭ وتكەنىنەن حاباردار ەتكىمىز كەلەدى.
كەشتە تۋريزم جانە سپورت مينيسترلىگى سپورت ىستەرى جونىندەگى كوميتەتىنىڭ توراعاسى ەلسيار قاناعاتوۆ, مەكتەپ ديرەكتورى, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى, ءبىلىم بەرۋ ءىسىنىڭ ۇزدىگى, پروفەسسور سەرىك توكەەۆ, سپورت جازۋشىسى نەسىپ جۇنىسباەۆ, بىلىكتى باپكەر, ەلىمىزگە ەڭبەگى سىڭگەن جاتتىقتىرۋشى مارات جاقىت, كەزىندە كينودا قاجىمۇقاننىڭ ءرولىن ويناعان اۋەلحان بەكبولات سىندى ازاماتتار بالۋاننىڭ سپورتتاعى جەتىستىكتەرى مەن ونىڭ تاريحتا الاتىن رولىنە توقتالىپ, قاجىمۇقاننىڭ تاربيەلىك ماڭىزى زور ءومىر جولىنان سىر شەرتتى.
سونىمەن بىرگە, كەشتە مەكتەپ تاربيەلەنۋشىلەرى وزدەرىنىڭ سپورتتا عانا ەمەس, ءان ايتۋ, بي بيلەۋ, جىر, ولەڭ وقۋ سياقتى ونەرلەردەن دە كەندە ەمەستىكتەرىن كورسەتىپ, جينالعان جۇرتشىلىق الدىندا وسى ونەرلەرىن ورتاعا سالدى. كەشكە قۇرمەتتى قوناق رەتىندە كەلگەن جوعارىداعى ازاماتتار وقۋشىلاردىڭ ونەرىنە ريزاشىلىعىن ءبىلدىرىپ, العىستارىن جەتكىزدى. سولاردىڭ ءبىرى بەلگىلى قالامگەر نەسىپ جۇنىسباەۆ ءوزىنىڭ جاقىندا شىققان «باس يەمىن!» اتتى كىتابىن ۇسىنسا, قاجىمۇقانتانۋشى مايرا كەلىباەۆا بالۋان اتانىڭ قولدانعان ىدىستارىنىڭ ءبىرىن مەكتەپ مۇراجايىنا تارتۋ ەتتى.
ارناي ورماش, №17 مەكتەپ-گيمنازيانىڭ 11 «ءا» سىنىبىنىڭ وقۋشىسى.
استانا.