ۇستىمىزدەگى جىلدىڭ 17 ساۋىرىندە وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازارباەۆ مينيسترلىكتەر, ۆەدومستۆولار مەن ۇيىمداردىڭ ءبىرىنشى جەتەكشىلەرى ورىن العان جەمقورلىق قىلمىستار ءۇشىن جەكە جاۋاپ بەرەتىندىگى تۋرالى ەرەكشە ەسكەرتكەن دە ەدى. وسىعان وراي «نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى نۇرلان نىعماتۋلين مەن ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ ءتوراعاسى قايرات قوجامجاروۆ «جەمقورلىقسىز بولاشاققا بارامىز!» اتتى رەسپۋبليكالىق اقپاراتتىق-ناسيحاتتىق اكتسيانىڭ باستالعانىن حابارلادى.
اتالعان اكتسيا جىل سايىن سىبايلاس جەمقورلىقپەن كۇرەس ۇدەرىسىنە ازاماتتىق قوعام مەن ونىڭ ينستيتۋتتارىنىڭ كوپشىلىگىن تارتۋ, قازاقستاندىقتاردىڭ جەمقورلىق جانە ونىڭ كورىنىستەرىنە قارسى كوزقاراس پەن توزىمسىزدىك احۋالىن قالىپتاستىرۋ جانە وسى جۇمىسقا جاستاردى كوپتەپ تارتۋ ماقساتىندا وتكىزىلەدى. ونىڭ كومەگى كورىنىپ, اسەرى ايقىندالىپ جاتىر. سوندىقتان اتالعان اكتسيا بىرتە-بىرتە داستۇرگە اينالىپ كەلەدى. قازىرگى ۋاقىتتا كەز كەلگەن باسشىلىق لاۋازىمداعى شەنەۋنىك, ەلباسى اتاپ وتكەندەي, ءوزىنىڭ ورىنباسارلارى مەن دەپارتتامەنتتەر جانە كوميتەتتەر باسشىلارى اراسىندا جاسالعان قانداي بولماسىن جەمقورلىق دەرەگى ءۇشىن بىردەن ءوز ءوتىنىشى بويىنشا قىزمەتىنەن كەتۋگە ءتيىس.
بۇل ورايدا نۇرلان نىعماتۋلين ءبىز ەلباسىمىز, پارتيامىزدىڭ ءتوراعاسى نۇرسۇلتان نازارباەۆتىڭ تاپسىرمالارىن ورىنداۋ ءۇشىن ءبىرىنشى باسشىلاردىڭ پارتيا الدىنداعى مىندەتىن ودان ءارى ارتتىرۋ قاجەت دەپ ەسەپتەيمىز, دەيدى. مىسالى, ولاردىڭ ورىنباسارلارىنىڭ نە بولماسا تىكەلەي باعىناتىن قىزمەتكەرلەرىنىڭ جەمقورلىق بويىنشا قىلمىسى سوتتا دالەلدەنسە, وندا تىكەلەي باسشىنىڭ ءوزى جاۋاپقا تارتىلادى. ول ودان ءارى ءوزدەرىنىڭ قارجى پوليتسياسىمەن سىبايلاس جەمقورلىققا قارسى كۇرەستە تىعىز بايلانىستا جۇمىس ىستەپ كەلە جاتقاندارىن جانە بۇل ءوز ناتيجەسىن بەرۋدە ەكەنىن العا تارتتى. وسى بىرلەسە اتقارعان جۇمىس قوعامدىق قابىلداۋلار وتكىزۋدەگى قىزمەتتىڭ تيىمدىلىگىن ارتتىرا تۇسەتىنى انىق.
ال قايرات قوجامجاروۆ ەلباسىنىڭ تاپسىرمالارىنا ساي جەمقورلىققا قارسى مەملەكەتتىك ساياساتتىڭ ەڭ ماڭىزدى باعىتتارىنىڭ ءبىرى قوعامدىق ينستيتۋتتارمەن جانە حالىقپەن تۇراقتى تۇردە جۇمىس ىستەۋ بولىپ تابىلاتىنىن اتاپ كورسەتتى. سەبەبى, ازاماتتىق قوعامنىڭ قاتىسۋى مەن ءوز ۇلەسى بولماسا العا قويعان نەگىزگى ماقساتقا قول جەتكىزۋ قيىن. وسى ورايدا ەلىمىزدە جەمقورلىققا قارسى كوزقاراستى دامىتۋ, قالىپتاسقان سانا-سەزىمدى ارتتىرۋ, جەمقورلىققا ءتوزبەۋدى ءومىردىڭ ادەپكى نورمالارىنا اينالدىرۋ وتە ماڭىزدى دەسەك, اتالعان اكتسيا 2011-2015 جىلدارعا ارنالعان سىبايلاس جەمقورلىقپەن كۇرەس باعدارلاماسى اياسىندا وتۋدە.
وسىعان وراي الداعى ءبىر اي ىشىندە ءارتۇرلى ءىس-شارالار وتكىزۋ جوسپارلانىپ وتىر. اتاپ ايتقاندا, ازاماتتاردى قابىلداۋ, كاسىپكەرلەرمەن كەزدەسۋلەر وتكىزۋ, جەمقورلىققا قارسى سۋرەتتەر بايقاۋلارىن, جەمقورلىققا قارسى ءىس-شارالاردى جان-جاقتى بايانداۋ ءۇشىن باق اراسىنداعى بايقاۋلار, پىكىرتالاستار, قوعامدىق تىڭداۋلار ۇيىمداستىرۋ, «ءوزىڭنەن باستا!», «تازا سەسسيا» اكتسيالارىن جانە ت.ب. ءتۇرلى ءتيىمدى شارالار ۇيىمداستىرۋ جۇزەگە اسىرىلادى.
الەكساندر تاسبولاتوۆ.