الماتىدا قازاقستان رەسپۋبليكاسىنىڭ سىرتقى ىستەر ءمينيسترى ەرجان قازىحانوۆتىڭ يسپانيا مەملەكەتىنىڭ بۇرىنعى سىرتقى ىستەر ءمينيسترى ميگەل انحەل موراتينوسپەن كەزدەسۋى ءوتتى. ەكى جاقتى كەزدەسۋ بارىسىندا تاراپتار ايماقتىق جانە بۇگىنگى تاڭدا كۇن تارتىبىندە تۇرعان حالىقارالىق ماڭىزدى ءارى وزەكتى دە اۋقىمدى ماسەلەلەردى قاراستىردى.
حالىقارالىق ءار الۋان جانە كۇردەلى ماسەلەلەر اراسىنداعى اڭگىمەدە, الدىمەن ەرجان قازىحانوۆ پەن ميگەل موراتينوس كوپشىلىك نازارىن اۋدارىپ وتىرعان قارجى-ەكونوميكالىق داعدارىس سالدارى توڭىرەگىندە ءسوز قوزعادى. سونداي-اق, تاراپتار داعدارىسقا بايلانىستى تۋىنداعان ازىق-ت ۇلىك قاۋىپسىزدىگى مەن ەلدەردىڭ ساياسي-الەۋمەتتىك سالالارداعى دامۋ ماسەلەلەرىن جانە مىڭجىلدىق دەكلاراتسياسىنداعى دامۋ ماقساتتارىن قامتاماسىز ەتۋ بارىسى جانە وزگە دە ماسەلەلەر تالقىلاندى.
يسپانيا بۇرىنعى سىرتقى ىستەر ءمينيسترىنىڭ پىكىرىنشە, بيىلعى جىلى تاۋەلسىزدىگىنىڭ جيىرما جىلدىعىن تويلايتىن قازاقستان مەن يسپانيا اراسىنداعى ىنتىماقتاستىق, دوستىق, ءوزارا ءتۇسىنىستىك جوعارى دەڭگەيدە. ءسوز رەتى كەلگەندە اتاپ ايتارلىعى, دەدى م.موراتينوس ءوز سوزىندە, قازاقستاندىق ديپلوماتيا ءوزىن وتە جوعارى دەڭگەيدە كورسەتىپ وتىر. وعان قازاقستاننىڭ وتكەن جىلى ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋى ايقىن دالەل بولا الادى. سونىمەن قاتار, بىلتىر استانادا ەقىۇ-عا مۇشە ەلدەردىڭ مەملەكەتتەر باسشىلارى جانە الەمدىك حالىقارالىق ۇيىمدار جەتەكشىلەرى قاتىسقان ءسامميتتىڭ تابىستى ءوتۋى قازاقستان بەدەلىن وسىرە ءتۇستى.
ەكى جاقتى كەزدەسۋدەگى سوزىندە ە.قازىحانوۆ قازاقستان ۇكىمەتىنىڭ ازىق-ت ۇلىك قاۋىپسىزدىگىن ىشكى جانە سىرتقى ساياساتتاعى باسىم باعىتتاردىڭ ءبىرى رەتىندە قاراستىرىپ وتىرعاندىعىن اتاپ كورسەتتى. وسى ماسەلەگە بايلانىستى م.موراتينوستى قازاقستان ۇكىمەتىنىڭ مەملەكەتتىڭ تۇراقتى دامۋىن قامتاماسىز ەتەتىن, ياعني ناقتىراق ايتقاندا, «قازاقستان رەسپۋبليكاسىنىڭ 2007-2024 جىلدارعا ارنالعان تۇراقتى دامۋ تۇجىرىمداماسىمەن» تانىستىرىپ, پرەمەر-ءمينيستردىڭ باسشىلىعىمەن جۇمىس ىستەيتىن تۇراقتى دامۋ كەڭەسى تۋرالى حاباردار ەتتى.
ءوز ارىپتەسىمەن پىكىر الماسۋ كەزىندە ە.قازىحانوۆ, سونىمەن قاتار, قازاقستاننىڭ بيىلعى جىلعى جازدا يكۇ-عا توراعالىعى اياسىندا دا بىرقاتار حالىقارالىق ماسەلەلەرگە باستى نازار اۋداراتىندىعىن جەتكىزدى. سونداي-اق, يكۇ مەن ازىق-ت ۇلىك جانە اۋىل شارۋاشىلىعى ۇيىمى اراسىنداعى ءوزارا ءتيىمدى ىنتىماقتاستىقتى دامىتۋدىڭ ماڭىزدىلىعىن دا نازاردان تىس قالدىرمادى.
باقىت بالعارينا.
الماتى.