«سوتسياليستىك قازاقستان» گازەتىنىڭ ۇلى وتان سوعىسى كەزىندەگى قىزمەتى تۋرالى
وسى ماقالانى جازار الدىندا ۇلى وتان سوعىسىنا قاتىسقان, ەلگە ورالعان سوڭ, قازاق باسپاسوزىنە بۇكىل ءومىرىن ارناعان قۇرمانبەك ابىلداەۆتىڭ «قاھارلى كۇندەر شەجىرەسىن» اسىقپاي پاراقتاپ شىقتىم. سوندا باسىما ءبىر وي كەلدى. قان مايداندا ايقاسقان اعالار ەرلىگىنىڭ ارقاسىندا قول جەتكەن جەڭىس جەمىسىن حالقىمىز كۇنى بۇگىنگە دەيىن تەرىپ وتىر. ال جەڭىسكە مىقتى ۇلەس قوسقان جاۋىنگەر اعا – ءبىزدىڭ ماقتانىشىمىز, اپىراۋ, مىنا ءححى عاسىرداعى جۇرتىنا پايداسى تيمەي قويمايتىن جانە ءبىر باعالى ەڭبەك ءسىڭىرىپتى عوي دەگەن وي ەدى ول.
سوعىس باستالعان كۇندى مە, بولماسا جەڭىس كۇنىن بە, وبالى نە كەرەك, بۇكىل بۇقارالىق اقپارات قۇرالدارى قازاق ساربازدارىنىڭ كەشەگى قان مايداندا جاساعان ەرلىگىن ەل-جۇرتىمىزدىڭ ەسىنە ۇنەمى ءتۇسىرىپ وتىرۋعا تىرىسادى. مەنىڭ سوندا بايقاعانىم, ءبىر گازەت جاڭالىعىمەن قۋانتسا, ەكىنشىسى – ەسكى ءىزدى شيىرلاۋعا اۋەس. اتاقتى باتىرلارىمىزدىڭ ەكى-ءۇش ەسىمىن عانا قايتالاپ كەلتىرە وتىرىپ, بەلگىلى جايتتەردى ساعىزشا شاينايدى. مۇندايدا جاۋىرىنىڭ قۇرىسىپ: «وۋ, ىزدەنۋ قايدا؟» – دەپ قالاسىڭ. ونداي گازەتتى كيوسكىدەن ساتىپ الۋعا ەندىگارى ۇمتىلا قويمايسىڭ.
بۇگىنگى گازەتشىلەرىمىزدىڭ باسىم بولىگى – جاستار. ولاردى كەشەگى قىرعىن سوعىس قاھارماندارىنىڭ كوبىن بىلە بەرمەيتىنى ءۇشىن جازعىرۋعا بولمايدى. ال بىلگىسى كەلگەندەرىنە تالابىڭا نۇر جاۋسىننان باسقا ايتارىمىز جوق. جازۋعا ۇمتىلعاندارىنا بەرەر اقىل-كەڭەس ءازىر: ناعىز كەرەمەت «انىقتامالىق» – جوعارىدا اتىن ايتقان قايران قۇرەكەڭنىڭ كىتابىن وقىسىن. «قاھارلى كۇندەر شەجىرەسى» – جالپى ساياسات جونىندەگى جەتەكشى, اعا گازەتىمىز «سوتسياليستىك قازاقستاننىڭ» («سق», قازىرگى «ەگەمەن قازاقستان») تۇتاس ءبىر كەزەڭىنىڭ تاريحى. وزگە ءسوز تابا المايسىڭ. سەبەبى تومەندەگىشە.
بىرىنشىدەن, قۇرەكەڭ كىتابىنا قاراعاندا, «1941 جىلعى يۋلدەن باستاپ ءبىزدىڭ رەسپۋبليكادا «لەنينشىل جاس», «لەنينسكايا سمەنا», «پيونەر كازاحستانا», «وكتيابر بالالارى», بەس وبلىستا شىعىپ تۇرعان كومسومول گازەتتەرى, «كوممۋنيست», «جاس بولشەۆيك», «پيونەر», «ۆوجاتىيعا كومەكشى», «ستالين جولى», «نارودنوە حوزيايستۆو كازاحستانا», «قازاقستان كولحوز-سوۆحوزدارى», «ليتەراتۋرا ي يسكۋسستۆو كازاحستانا», «حالىق مۇعالىمى», «ادەبيەت جانە يسكۋسستۆو» جۋرنالدارىنىڭ شىعارىلۋى ۋاقىتشا توقتاتىلعان».
ەكىنشىدەن, سوعىس جىلدارى وبلىستىق گازەتتەر كوبىنە تۇتامداي شاعىن كولەمدە شىعارىلدى. كولەمى نەگىزىنەن «سوۆينفورمبيۋرونىڭ» ماتەريالىن اۋدارىپ باسۋعا عانا جەتەتىن. ال سول كەزدەگى باستى تاقىرىپ – ۇلى وتان سوعىسى بارىسىنىڭ جاي-جاپسارى, ەڭ باعالىسى – قازاق جاۋىنگەرلەرىنىڭ ەرلىگى تۋرالى تولىق اقپاراتتى تەك سول «سوتسياليستىك قازاقستاننان» عانا تابامىز... ونىڭ مەيلىنشە سىعىمدالعان ءتۇرى جاڭاعى اتالعان قۇرەكەڭ كىتابىندا.
كىتاپتىڭ ءوزى دە اتىنا ساي شەجىرە ىسپەتتى. العاشقى تاراۋىندا اۆتور كەڭەس وداعىنىڭ سوعىس قارساڭىنداعى جانە باستالعانداعى جاي-كۇيىنەن قىسقاشا ۇتىمدى دا تارتىمدى ماعلۇمات بەرىپ الىپ, گازەتتىڭ مايدان تاقىرىبىن جازۋداعى العاشقى قادامدارىن ناقتىلى تالداپ كورسەتەدى.
ۇلى وتان سوعىسى كەزىندە قازاقستان بىلاي قاراعاندا, مايداننان الىستاۋ وڭىردە ورنالاسقانداي ەدى. ال اقيقاتىنا كەلگەندە, رەسپۋبليكامىز فاشيزم اگرەسسياسىنا قارسى مايداننىڭ الدىڭعى شەبىندە بولدى. «پراۆدا» گازەتى «سلاۆنىي كازاحسكي نارود – ۆ بوربە زا سوۆەتسكۋيۋ رودينۋ» دەگەن باس ماقالاسىندا (1943 جىلعى 6 فەۆرال) بىلاي دەپ جازدى:
«حوروشو بيۋتسيا كازاحي نا فرونتە, حوروشو رابوتايۋت يح وتتسى, ماتەري, جەنى ۆ تىلۋ. كازاحستان موگۋچە پودپيراەت فرونت ۆسەمي بوگاتستۆامي سۆوەي زەملي, ۆسەمي سوكروۆيششامي سۆويح گور. ۆ كاجدوم سناريادە, وپۋستوشايۋششەم ريادى گيتلەروۆتسەۆ, ەست چاست كازاحسكوي پريرودى, ەست دوليا كازاحسكوگو ترۋدا. كازاحستان بليزوك ي دوروگ سوۆەتسكيم ليۋديام. ليۋبيات ۋ ناس پريامۋيۋ, وتكرىتۋيۋ, مۋجەستۆەننۋيۋ دۋشۋ كازاحا, ەگو سكرومنوست, ەگو ۆەرنوست».
قۇرمانبەك ابىلداەۆتىڭ كىتابى «سوتسياليستىك قازاقستان» گازەتىنىڭ باي ماتەريالىنان تالاي-تالاي جارقىن مىسالداردى ءۇستى-ۇستىنە كەلتىرە وتىرىپ, قازاق مايدانگەرلەرىنە دەگەن ءبىزدىڭ جۇرەگىمىزدەگى ىستىق ماحابباتتى ونان ارمەن كۇشەيتە تۇسەدى.
نە جازسا دا جازۋى وقىلماي قويمايتىن اۆتور بولادى. «سوتسياليستىك قازاقستان» گازەتىندە ءجيى جارىق كورەتىن اكادەميك قانىش ساتباەۆ ماقالالارى سونداي ەدى. «قاھارلى كۇندەر شەجىرەسىندە», اسىرەسە, پوليمەتالل ءوندىرىسىنە بايلانىستى كوكەيكەستى اقپار الدىمەن سول الەمگە داڭقى كەتكەن عۇلامانىڭ قالامىنان تۋىندايتىن. شىمكەنت, لەنينوگور قورعاسىن زاۋىتتارى سەكىلدى جاڭادان سالىنعان ءىرى زاۋىتتار, زىريان, بەلوۋس سياقتى قورى مول كەندەر عوي نەمىس-فاشيستەرگە اتىلعان ون وقتىڭ توعىزىن قۇيۋعا اتسالىسقان. موليبدەن, ۆولفرام, سۋرما سياقتى سيرەك كەزدەسەتىن مەتالدار ءوندىرىسى جولعا قويىلىپ, ەل قارۋ-جاراق جاسايتىن قۇيمالاردان تارىعىپ كورگەن جوق. سوعىس جىلدارىندا رەسپۋبليكادا جاڭادان 25 رۋدنيك پەن شاحتا, 11 بايىتۋ فابريكاسى ىسكە قوسىلىپتى. اقتوبە فەرروقورىتپا زاۋىتى سالىندى. ءبىزدىڭ رەسپۋبليكامىز جالپى وداق بويىنشا ءوندىرىلگەن قورعاسىننىڭ 85 پايىزىن, مىستىڭ – 30, مارگانەتس رۋداسىنىڭ – 60, پوليمەتالل كەندەرىنىڭ 70 پايىزىن بەرگەن.
كىتاپ اۆتورى شىعارماسىنىڭ تاعى دا ءبىر تۇسىندا قانىش يمانتاي ۇلى ساتباەۆتىڭ 1942 جىلدىڭ ساۋىرىندە كسرو مەملەكەتتىك سىيلىعىن العانىن جازادى. سول كەزدەگى رەسپۋبليكالىق بيلىك تاراپىنان اكادەميككە قۇتتىقتاۋ حات جولدانعانىن قۋانا اڭگىمەلەيدى. حاتتا قازاق جەرىنىڭ قويناۋىنداعى بايلىقتى تاۋىپ يگەرۋ حاقىنداعى ءساتباەۆ ەڭبەگى گەولوگيا عىلىمىنا قوسىلعان باعالى ۇلەس قانا ەمەس, نەمىس-فاشيست باسقىنشىلارىن تالقانداۋ ىسىنە تىكەلەي قىزمەت ەتەدى, – دەلىنگەن رەسمي ورىنداردىڭ قۇتتىقتاۋ حاتىندا. سوڭعى ءسويلەمنىڭ استىن قۇرەكەڭ كىتابىندا ارنايى سىزىپ ەرەكشەلەپتى.
قانىش ساتباەۆ باستاعان گەولوگتاردىڭ, جۇمىسشى, ينجەنەر-تەحنيك قىزمەتكەرلەردىڭ ەرەن ەڭبەگىن جازۋدا, ءتاجىريبەسىن جيناقتاۋدا, ىستەگى كەمشىلىكتەردى اشۋدا «سوتسياليستىك قازاقستاننىڭ» سول قيىن-قىستاۋ كەزەڭدە جاريالانعان ماتەريالدارى, كوتەرگەن دابىلدارى سوعىس شارۋاشىلىعىن قالىپتاستىرۋعا باعا جەتپەس كومەك كورسەتتى دەپ تولىق سەنىممەن ايتۋعا بولادى, دەپ جازادى كىتاپ يەسى.
اعا گازەتتىڭ جاريالانىمدارىنا سۇيەنە وتىرىپ, كىتاپ اۆتورى, ماسەلەن, لەنين وردەنىمەن ناگرادتالعان بۇرعىلاۋ شەبەرلەرى ن.بەرماعامبەتوۆ, ا.بايارىستانوۆ, ر.قاسقاراەۆ, ب.وتەۋليەۆ, پرومىسەلدەردىڭ باسشىلارى: د.دوسمۇحامەتوۆ, س.وتەباەۆ, ر.ساعىندىقوۆ جانە باسقالارىنىڭ ەسىمدەرىن ءۇلكەن ىلتيپاتپەن اتاپ وتەدى. وسىلاردىڭ ەڭبەگى تۋرالى ماتەريال ىزدەستىرۋمەن ءبىرگە, بىلايعى تاعدىرىنىڭ قالاي قالىپتاسقاندىعىن بىلگىسى كەلەتىندەر از ەمەس. وندىرىستە عالامات تابىسقا جەتكەن ەڭبەك ەرلەرىن جازعىسى كەلگەن جۋرناليست باعىت سىلتەۋشى ماتەريالدى قۇرەكەڭنىڭ كىتابىنان مولىنان قارپي الادى.
«سوتسياليستىك قازاقستان» گازەتى قۇرەكەڭ ءدال تاۋىپ ايتقان سول وتتى كۇندەردىڭ شەجىرەسىنە اينالعان. سوعىس بۇرق ەتكەن ساعاتتان باستاپ ەڭبەك پەن ەرلىكتىڭ ەرتەگىمەن ءبىر ەسەپ حيكاياسى جالعاسا بەرەدى. «سق»-نىڭ ماقالا, كوررەسپوندەنتسيا, حابار, وچەركتەرى عىلىمي سىندارلى جۇيەگە تۇسكەن بەتىندە بىرىنەن ءبىرى ۇستەم, ساليقالى ويمەن, جەڭىل تىلمەن تالدانادى. كەزەك اۋىل شارۋاشىلىعى وندىرىسىنە تيگەندە ءبىز تاعى دا رەسپۋبليكامىزدا مايدان ءۇشىن جاسالعان الاپات ىستەرگە مولىنان قانىعامىز. استىق, قىزىلشا, كۇرىش, مال ءونىمدەرىن مەملەكەتكە تاپسىرۋ جوسپارىن قازاقستان سوعىستىڭ ءتورت جىلىنىڭ ىلكى كۇندەرىنەن باستاپ اسىرا ورىنداپ وتىرعانىن گازەتتىڭ 1941 جىلعى نويابر, دەكابر ايلارىنداعى ساندارىنان الىنعان فاكتىلەردەن كورەمىز.
وسى كەزدەردە عوي قازاقستاننىڭ اتاقتى تارى ءوسىرۋشىسى شىعاناق بەرسيەۆتىڭ زۆەنوسى 6 گەكتاردان 155,6 تسەنتنەردەن ءونىم العانى. داڭقى وداققا, قالا بەردى دۇنيە جۇزىنە تاراعان شىعاناقتىڭ, باسقا دا كوپ-كوپ اتاقتى ەڭبەك وزاتتارىنىڭ ەسىمىن بىلگىسى كەلگەندەر قۇرەكەڭ كىتابىنان ونداپ, جۇزدەپ تابا الادى.
ايەل – ۇيەلمەن ۇيىتقىسى, قۇت-بەرەكەسى دەيمىز. بىراق ول وت باسى, وشاق قاسىنان ۇزاپ شىعا المايدى ەمەس. سوعىس كەزىندە قازاق ايەلى مايدانعا اتتانعان ەر ادامداردىڭ جۇمىسىن ولاردان كەم اتقارماعانىن, تاپسىرمانى زور ىنتا-ىقىلاسپەن جاپىرىپ ىستەگەنىن ءدالەلدەيتىن فاكتىلەردى قۇرەكەڭ ۇقىپتاپ ىرىكتەگەن. سەمەي وبلىسى, اياگوز اۋدانىنىڭ تاڭسىق متس-ءىنىڭ تراكتوريستەرى جاميعا تەزەكوۆا مەن تۇرسىن ءابدىراحمانوۆا ءوز قۇربىلارىن مەحانيزاتورلىق ماماندىقتى مەڭگەرۋگە شاقىرا كەلىپ, «ءبىز ءوز ماماندىعىمىزدى سۇيەمىز. ال وتان تالاپ ەتسە, تراكتوردى تانككە ايىرباستاۋعا دايارمىز. ءبىز تراكتوردى قالاي مەڭگەرسەك, تانكتى دە سولاي مەڭگەرەمىز», – دەگەن.
ءوز باسىم وسىناۋ انتتاي ەستىلەتىن انا سەرتىن جەل سوزگە بالاۋدان اۋلاقپىن. «قاھارلى كۇندەر شەجىرەسىنەن» گازەتتىڭ قىرۋار ماتەريالىنا سۇيەنە وتىرىپ, قازاقتىڭ باتىر قىزدارى ءمانشۇك مامەتوۆا مەن ءاليا مولداعۇلوۆانىڭ ەرلىگى مەيلىنشە توگىلتىپ جازىلعان. بۇكىل ورتالىق ازيادان, كاۆكازدان سوۆەت وداعىنىڭ باتىرى اتانعان تەك وسى ەكى قازاق قىزى عانا. فانەرا سامولەت «كۋكۋريزنيكپەن» جاۋ توبەسىنە 326 رەت نايزاعاي ويناتقان حالىق قاھارمانى حيۋاز دوسپانوۆا شە؟ جالپى, قازاق بۇرىمدىلارىنىڭ وتباسى جىلۋىن ساقتايتىندار عانا بولىپ كورىنبەگەنى, توبە شاشىن تۇيە سالىپ, ءباز باياعى توميريس اپالارىنداي تالاي ۇرپاعىن سۇيىندىرگەن كوزسىز ەرلىك جاساعانى تاريحىمىزدا التىن ارىپپەن جازۋلى.
«ەر جىگىت – ەل ماقتانىشى» ايدارىمەن «سوتسياليستىك قازاقستان» گازەتى قازاق جاۋىنگەرلەرىنىڭ جانقيارلىق ەرلىگىن ۇزبەي جازعان. سوعىستىڭ العاشقى جىلدارى جارق ەتىپ كورىنگەن كەڭەس وداعىنىڭ باتىرى تولەگەن توقتاروۆتىڭ بەينەسىن وقىرماندارىنا بىرنەشە ماقالا, وچەرك ارقىلى جەتكىزگەنى ايتىلادى. «جاسقانباي تۋرا قاراساڭ, ءولىم دە ساعان شىداپ تۇرا المايدى. سەن جەڭەسىڭ. ءومىردى سۇيەدى ەكەنسىڭ, سول ءومىر ءۇشىن كۇرەسە ءبىل!».
ارانىن اشقان اجالمەن ايقاسقان قۇرەكەڭ تولەگەن توقتاروۆتىڭ بۇل ءسوزدەرىن ءوزى دە ىشتەي كۇبىرلەپ تالاي قايتالاعان بولار. ەر جىگىت ەل ءۇشىن تۋادى, ەل ءۇشىن ولەدى. كىتاپ اۆتورى «پراۆدا» گازەتىنىڭ جوعارىدا اتالعان باس ماقالاسىندا تولەگەن توقتاروۆتىڭ ءسوزى كەلتىرىلگەنىن, سول كەزدەگى جەتەكشى گازەتتىڭ ءوزى تولەگەن تولعانىسىن وتانشىلدىقتىڭ جوعارى ۇلگىسى دەپ باعالاعانىن ورىندى ماقتانىشپەن جازادى.
«سوتسياليستىك قازاقستان» گازەتى – حالىقتار دوستىعىنىڭ تۋىن ۇستاۋشىسى. وسى تاقىرىپقا اۆتور كىتابىنىڭ تۇتاس ءبىر تاراۋىن ارناپتى. حالقىمىزدىڭ باۋىرمالدىعىن كورشى ەلدەر وكىلدەرىنە ايتقىزۋى وتە-موتە ۇتىمدى بولعان. اتاقتى كينورەجيسسەر, دراماتۋرگ الەكساندر دوۆجەنكو قازاق جاۋىنگەرلەرىنىڭ باۋىرمالدىعىن سۋرەتتەگەن تۇستارىن قۇرەكەڭ تولىق كەلتىرەدى.
«ەرلەر بولىمشەسى وزەننەن ىركىلمەي ءوتىپ, ۋكراينا جەرىنە شىقتى.
– جۇگىرىڭدەر! – دەگەن كوماندا ەستىلدى. بۇلار قازاقتار ەدى. ولاردىڭ كومانديرى دە قازاق. ولار جۇرەسىنەن وتىرا قالدى.
– ارمىسىڭ, تۋىسقان ۋكراين جەرى! – دەدى كوماندير زور داۋىسپەن. ونىڭ ءجۇرەگى الدەنەگە قاتتى سوقتى. وسىنداي سەزىم ونىڭ قاسىنداعى قازاق جىگىتتەرىنىڭ دە جۇرەگىن بيلەگەندەي بولدى. ولاردىڭ ءبارى دە جاتا قالىپ, ۋكراين جەرىن قۇشاقتاپ ءسۇيدى.
– ءبىز سەنى فاشيستەردىڭ تەپكىسىنەن قۇتقارعالى كەلدىك! – دەدى كوماندير قولىن سەرمەپ, جاۋىنگەرلەرىن كورسەتىپ.
وسى حابار قۇلاعىنا تيىسىمەن, جىر الىبى جامبىل شابىتتى بۇركىتتەي شارىقتادى. دومبىراسىن قاعىپ جىبەرىپ, نوسەرلەتە جونەلدى.
ۋكراينا توپىراعىن
كوكىرەگىندەي انانىڭ
جاۋعان وقتان جاسقانباي,
ءسۇيىپتى مەنىڭ ۇلدارىم.
جاسىراتىن سىر ما بۇل,
ەستىپ سونى قارت جامبىل,
كوكىرەگى كۇڭىرەنىپ
جاس ىرىكتى بۇل دا ءبىر.
بۇعان ەندى جاكەڭنىڭ «لەنينگرادتىق ورەندەرىم, ماقتانىشىم, بەدەلىم» اتتى دابىلدى جىرىن قوسىڭىز. دراماتۋرگ ۆس.ۆيشنەۆسكي «لەنينگرادتسى, دەتي موي, لەنينگرادتسى, گوردوست مويا!» دەگەن سوزدەردى قالا كوشەلەرىندە ىلىنگەن پلاكاتتاردان وقىعاندا, قاتارىمىزعا تىڭنان تۇتاس ديۆيزيا قوسىلعانداي سەرپىلىپ قالدىق دەمەپ پە ەدى. ەر قارۋى – بەس قارۋدىڭ ءبىرى جۇرەكجاردى ءسوز ەكەنىن قۇرەكەڭ سوعىس ءورتىنىڭ وت-جالىنىنا ورانىپ ءجۇرىپ, مايدان گازەتتەرىنەن, اسىرەسە, «سق» ارقىلى بار جۇرەگىمەن سەزىنگەن-ءتىن. سول سەبەپتى دە «قاھارلى كۇندەر شەجىرەسىنىڭ» ماڭىزدى تاراۋىنىڭ ءبىرى «قالام قارۋعا تەڭەلسىن!» دەپ اتالدى. قۇرەكەڭ بۇگىنگى كۇنى ۇلاعاتتى ۇرانداي ەستىلەتىن تاقىرىپتى جان-جاقتى, بارىنشا تەرەڭدەپ زەرتتەگەن. مۇحتار اۋەزوۆ, ءسابيت مۇقانوۆ, عابيت مۇسىرەپوۆ, عابيدەن مۇستافين, عالي ورمانوۆ, تايىر جاروكوۆ, ءابدىلدا تاجىباەۆ, اسقار توقماعامبەتوۆ, باۋبەك بۇلقىشەۆ, مۇقان يمانجانوۆ... كەستەلى سوزدەن ورنەك توككەن, ەلىم دەپ ەمىرەنگەن سول اسىل اعالار ءوزدەرىنىڭ جالىندى پۋبليتسيستيكاسىمەن, وچەرك, ولەڭدەرىمەن «سوتسياليستىك قازاقستاننىڭ» بەتىندە بۇرىنعى بەيبىت كەزدەگىدەن الدەقايدا ءجيى كورىنەتىن بولعان, دەپ جازادى كىتاپ اۆتورى.
«مايداننان سوققان جاڭا لەپ». بۇل – «سق»-نىڭ 1944 جىلعى 28 مايداعى سانىندا باسىلعان قاسىم امانجولوۆتىڭ «ابدوللا» دەگەن پوەماسى, ءابۋ ءسارسەنباەۆتىڭ «اقشا بۇلتى» تۋرالى رەتسەنزيا. اۆتورى – جازۋشى عابيت ءمۇسىرەپوۆ مايداندا تۋعان جاڭالىقتىڭ ءمانىسىن اشا وتىرىپ, جاس قالامگەر باۋبەك بۇلقىشەۆتىڭ پۋبليتسيستيكاسىن جوعارى باعالايدى.
ءبىز شولىپ وتىرعان كىتاپتىڭ اۆتورى كەلتىرگەن ءبىر عانا دايەك ءسوزدىڭ ءوزىنەن-اق قازاق ساربازىنىڭ تۇلعاسى بيىكتەپ زورايا بەرەدى. باۋبەك بۇلقىشەۆ «شىعىس ۇلىنا حاتىندا: «سەن ەركىندىكتىڭ تۋىن كوتەرگەن ەلدە ءوستىڭ. سەن ءوزىڭ سۇيگەن شىعىستىڭ ءبىر سۇلۋىنا ۇيلەنىپ ەدىڭ, سەن وزىڭشە, مەنىڭ ايەلىم سۇلۋ, ودان سۇيكىمدى جان جوق دەپ ويلاپ ەدىڭ. ەندەشە, ورتاڭ ب ۇلىنبەسىن, سۇيگەن سۇلۋىڭ كۇڭ بولىپ زارلاماسىن دەسەڭ, ءولتىر جاۋدى! ولىمنەن قورىقپا, ەكى ولمەك, ەكى تۋماق جوق... ۇمتىل ىلگەرى..!» – دەگەن.
ۇيقاسى جوق دەمەسەڭ, باۋبەكتىڭ جان قۇبىلىسىنان, پۋبليتسيستيكالىق قالامگەرلىك ونەرىنىڭ بار بىتىمىنەن, وزىنشە ءبىر سيۋجەتتىك ارقالىعىنان اعىنداپ تۇرعان اقىندىعى, جان ءسوزى, ايتتى-ايتپادى, سونى لەپ بولىپ ەسىپ تۇر...
اتادان بالاعا ميراس وسىنداي ءسوز اسىلىن سان-سان قابات «سق» تىگىندىلەرىنەن كوزىنىڭ مايىن تاۋىسىپ تىرنەكتەپ ىزدەپ تابۋ وڭاي جۇمىسقا جاتپاسا كەرەك. قاندىكويلەك دوس, جولداستارىنىڭ ەرلىگىن جىرلاعان اعا گازەتتىڭ ۇلان-اسىر ەڭبەگىن كوپ قاداعالاپ, بايىپتى تالداپ تەكسەرۋگە كەشەگى جاۋىنگەر, ارامىزدان اسىعىستاۋ كەتكەن قايراتتى, قارىمدى قالامگەر قۇرمانبەك ءابىلداەۆ بارىن سالعان دەسەك, ارتىق ايتقاندىق بولمايدى.
شەريازدان ەلەۋكەنوۆ, فيلولوگيا عىلىمدارىنىڭ دوكتورى, مەملەكەتتىك سىيلىقتىڭ لاۋرەاتى.