«بىرلىگى بەكەم ەل مىقتى!» دەپ اتالاتىن جيىن بۇگىنگى بەيبىت ءومىر مەن كەلىسىمنىڭ بۇدان ءارى نىعايا تۇسۋىنە بار كۇش-جىگەرلەرىن جۇمسايتىنىن جاريا ەتكەن وتانداستار ويلارىن ورتاعا سالۋعا مۇمكىندىك بەردى. تۇراقتىلىقتى تۇعىر ەتىپ, ەلدىكتىڭ ەڭسەسىن تىكتەۋدە ەلباسى ۇسىنعان رۋحاني جاڭعىرۋ ساياساتىن بەرىك ۇستاناتىندىقتارىن بارشاعا جاريا ەتكەن قاراعاندىلىقتار ءىس-شارادان ىلگەرى قادام الدى. اتالعان القالى جيىنعا ايماق باسشىسى ەرلان قوشانوۆ ارنايى قاتىسىپ, بىرلىك مەرەكەسى الدىندا جينالعان جۇرتشىلىققا رياسىز ىقىلاسىن ءبىلدىردى. ايماق باسشىسى قاتىسۋشىلاردى 1 مامىر – قازاقستان حالقىنىڭ بىرلىگى كۇنىمەن قۇتتىقتاپ, قازاقستان حالقى اسسامبلەياسىنىڭ مەرەيتويلى ححV سەسسياسىنان كەيىنگى بۇل باسقوسۋدىڭ تاريحي ماڭىزىنا توقتالدى. — پرەزيدەنت ءبىزدىڭ قوعامنىڭ دامۋ كەزەڭدەرىن ايقىنداپ بەردى. ەلباسى جۇيەلى جاڭعىرۋ تۋرالى ايتتى. ول – ۇشەۋ. ياعني, ەكونوميكالىق جاڭعىرۋ, ساياسي جاڭعىرۋ, رۋحاني جاڭعىرۋ. مەملەكەت باسشىسى ايتقانداي, وسىنداي «جۇيەلى جاڭعىرۋ ءبىزدىڭ بۇكىل جۇمىستارىمىزدىڭ وزەگىنە اينالدى». ياعني, جاڭعىرۋدىڭ نەگىزى دە, ءتۇپ تامىرى دا – تۇراقتىلىق, بىرلىك, كەلىسىم. اسسامبلەيادان كەيىن, قوعامدىق سانانى جاڭعىرتۋ جونىندەگى ۇلتتىق كوميسسيانىڭ العاشقى وتىرىسىنا قاتىستىق. ءبىز دە ءوزىمىز – وبلىستا, بارلىعىمىز بىرىگىپ, وسى ورايدا كەشەندى ءارى جۇيەلى جۇمىسقا كىرىسسەك دەيمىن, – دەدى وبلىس اكىمى ەرلان قوشانوۆ. سونىمەن قاتار, وبلىس اكىمى ۇلتتىق مادەني بىرلەستىكتەردىڭ كەلىسىمدى, ۇلتارالىق تاتۋلىقتى نىعايتۋداعى يگى ىستەرىن دە نازاردان تىس قالدىرمادى. شارانىڭ دا اتاۋى سوعان نەگىزدەلگەن. بىرلىگى مىقتى ەلدىڭ, رۋحى دا كۇشتى بولارىن تىلگە تيەك ەتتى. وسى جىلدار ارالىعىندا ەلىمىز ىنتىماققا ايرانداي ۇيىدى. بۇل ىستە قازاقستان حالقى اسسامبلەياسىنىڭ ۇلەسى زور. ەلباسىنىڭ باعدارلامالىق ماقالاسى اسسامبلەيانىڭ رۋحاني جاڭعىرۋىنا دا جول اشپاق.
بۇدان سوڭ بىرقاتار ۇلتتىق-مادەني بىرلەستىك وكىلدەرى, كەشە قازاقستان حالقى اسسامبلەياسىنىڭ سەسسياسىنا ايماق دەلەگاتسياسىنىڭ قۇرامىندا قاتىسقاندار ويلارىن ورتاعا سالدى. ءوزارا پىكىر الماسىپ, سەسسيانىڭ تىڭ سەرپىن, زور قۋات بەرگەنىن اتاپ ءوتتى. سەسسيادا مەملەكەت باسشىسىنىڭ سوزىنەن ويلارىنا شۋاق العان قاۋىم الداعى ۋاقىتتا ەل بىرلىگىن ارتتىرۋعا ايانىپ قالمايتىندىقتارىن ايتتى. ءسوز العانداردىڭ قاتارىندا قازاقستان حالقى اسسامبلەياسىنىڭ مۇشەسى, عىلىمي-ساراپتاۋ توبىنىڭ جەتەكشىسى ۆ.مولوتوۆ, جەزقازعان قالاسى قوعامدىق كەلىسىم كەڭەسىنىڭ توراعاسى, ءبىلىم مەتسەناتى ب.التىنبەكوۆ, «ارسەلور ميتتال تەمىرتاۋ» اق كونۆەرتور تسەحىنىڭ جۇمىسشىسى د.زاحاروۆ, دەموكراتيالىق كۇشتەر كواليتسياسىنىڭ مۇشەسى م.اقادىلوۆا, «ەكسپو&Women» حالىقارالىق قوعامدىق ۇيىمى قاراعاندى فيليالىنىڭ جەتەكشىسى ا.ساحاروۆا جانە تاعى دا باسقا ۇلتتىق بىرلەستىك وكىلدەرى, سپورتشىلار, وندىرىستە ەڭبەك ەتىپ جۇرگەندەر بار. قحا عىلىمي-ساراپتاما توبىنىڭ باسشىسى ۆيلەن مولوتوۆ لۋچانسكي ايتقانداي, ءبىزدىڭ, ياعني ەتنو-مادەني بىرلەستىكتەردىڭ, ساراپشى قاۋىمداستىقتىڭ الدىندا جاھاندىق يدەولوگيالىق باسەكەلەستىككە قابىلەتتى بولا بىلۋدە ءتيىمدى ادىستەردى مەڭگەرۋدىڭ زور مىندەتى تۇر. سىرتقى كۇشتەر جاڭا اقپاراتتىق تەحنولوگيالاردى قولدانا وتىرىپ قوعامدى ءىرىتىپ-ءشىرىتۋ ءۇشىن نەشە ءتۇرلى سوعىستار جۇرگىزىپ جاتىر. بۇل ءبىزدىڭ تۇراقتىلىعىمىزعا نۇقسان كەلتىرۋى مۇمكىن. سوندىقتان ەلباسىمىز ءار ماڭىزدى جيىندا وسى جايتتاردىڭ الدىن الۋ قاجەتتىلىگىن بىزگە مىندەتتەپ وتىرادى. جيىنعا ءوڭ بەرگەن جايتتاردىڭ ءبىرى – وڭىرلەردەگى ءتۇرلى ۇلت وكىلدەرىنەن قۇرالعان كوركەمونەرپازدار تىكەلەي بايلانىسقا شىققانى بولدى. لەبىزدەرىن جەتكىزىپ, ونىڭ سوڭىن انمەن, كۇيمەن ءورىپ وتىردى. شاراعا قاتىسقان تۇرىك قىزى راسۋل ازامي ءوزىن «قازاقپىن!» دەپ, جاستاردى ەلدى قۇرمەتتەپ, ونىڭ تاريحىن بىلۋگە شاقىردى. جۇبان مولداعاليەۆتىڭ «مەن – قازاقپىن!» پوەماسىنان ءۇزىندى وقىپ بەرۋى كوپشىلىكتىڭ جۇرەگىنە شۋاق ۇيالاتتى.
ءازاميدىڭ دە ايتقان لەبىزىن اينىتپاي ۇسىنۋدى ءجون كوردىك: – سوناۋ 1944 جىلى اتا-اجەم قازاقستانعا كەلگەن. سودان بەرى قازاق جەرىندەمىز. مەن ءوزىم تۇرىك بولسام دا, «قازاقپىن» دەيمىن. مەن قازاقستاندا تۋعانىما ماقتانامىن. سوندىقتان, جاستاردى ەلدىڭ تاريحىن بىلۋگە, ونى قۇرمەتتەۋگە شاقىرامىن. سونىمەن قاتار, ەرلان قوشانوۆ «شاعىن وتان» جوباسى بويىنشا ءوز ۇسىنىستارىن ءبىلدىردى. «ءبىزدىڭ قالالار مەن كوپتەگەن اۋىلدارىمىزدا جاقسى ءداستۇر بار. مەكتەپ ءبىتىرىپ كەتكەن تۇلەكتەر, ون جىلدىقتا, جيىرما, وتىز جىلدىقتا وزدەرى ءبىلىم العان وقۋ ورداسىندا جينالىپ, اۋىلعا كومەك قولىن سوزۋ, مەكتەپكە جوندەۋ جۇمىستارىن جۇرگىزۋ سىندى يگى ىستەر اتقارادى. وس ءداستۇردى بۇكىلحالىقتىق دارەجەگە كوتەرسەك قالاي؟» دەدى اكىم.
كەزدەسۋ سوڭىندا وبلىستىق قحا مۇشەلەرى مەملەكەت باسشىسىنىڭ رۋحاني جاڭعىرتۋ جيىنتىعىن مىندەتتەردى ىسكە اسىرۋ ءۇشىن بارلىق كۇش-جىگەرىن سالۋعا تۇرعىندارى ءۇشىن ۇندەۋ قابىلدادى. كەزدەسۋ سوڭىندا وبلىستاعى ءتۇرلى ۇلتتىق مادەني بىرلەستىكتەرگە اكىمنىڭ ارنايى سىيلىقتارى تابىستالدى. جيىرما ءتورت ەتنو-مادەني بىرلەستىك 700 مىڭ تەڭگە كولەمىندە سىياقى الدى.
ميراس اسان,
«ەگەمەن قازاقستان»
قاراعاندى