ءۇش كۇنگە سوزىلعان جارىس قورىتىندىسى بويىنشا اباكوۆ ارمان, تەمىروۆ باحتيار, جارماعامبەتوۆ تەمىرلان, كابدىكايىروۆ ەرجان, سيرانوۆ جاڭگىر ەسىمدى جاس زياتكەرلەردەن قۇرالعان كوماندا جالپى الەمدىك رەيتىنگتە 38 ورىنعا يە بولدى. جىل سايىن ۇيىمداستىرىلاتىن توپتىق سايىسقا الەمنىڭ ءار تۇكپىرىنەن كەلگەن 80 كوماندا, 20 مىڭ ستۋدەنت پەن وقۋشى قاتىستى. جاس ونەرتاپقىشتاردىڭ قولىنان شىققان 1400 جوبا ۇسىنىلدى.
قىتاي, وڭتۇستىك كورەيا, سينگاپۋر, گونكونگ, جاپونيا, اقش, ۇلىبريتانيا, كانادا سىندى الەمنىڭ الدىڭعى قاتارلى ەلدەرىنەن كەلگەن كوماندالار جارىستا توپ باستادى. كورشىلەس رەسەيدەن كەلگەن كوماندا 71 ورىنعا تابان تىرەدى.
نازارباەۆ مەكتەبىنىڭ جاس زياتكەرلەرى وسىعان دەيىن ماسكەۋ قالاسىندا وتكەن «روبوفەست – 2017» جوباسىندا ءبىرىنشى جانە ەكىنشى ورىنداردى ەنشىلەپ, الەمدىك دەڭگەيدەگى وسى جوباعا جولداما ۇتىپ العان بولاتىن.
«وقۋشىلارىمىز «VEX ROBOTICS» جوباسىنا قاتىسۋ ارقىلى وزدەرىنىڭ ءبىلىم دەڭگەيلەرىن الەمگە تانىتا الدى. وسى جوبا ارقىلى باسقا ۇزدىك كوماندالار مەن باسەكەگە ءتۇسىپ, ءوز تاجىريبەلەرىن دامىتۋ ۇستىندە. وقۋشىلارىمىزدىڭ دەڭگەيى جىل سايىن ءوسىپ كەلەدى. ايتۋلى جوباعا وقۋشىلاردى نۇرداۋلەت دوسماعامبەتوۆ, ميستەر توم لۋم مەن داستان قۇمار سىندى ۇستازدارى باستاپ باردى. الداعى ۋاقىتتا شاكىرتتەرىمىزدى ەڭ ۇزدىك كوماندالار قاتارىنان كورەمىز دەگەن سەنىمىمىز مول», – دەيدى نازارباەۆ زياتكەرلىك مەكتەبىنىڭ ديرەكتورى ولەگ پاك.
تالاپتىڭ وتى ارىنداپ تۇرعان شاعىندا, جاستارىمىزدىڭ عىلىم مەن تەحنيكانى قاتار يگەرىپ, الەمدىك يننوۆاتسيالىق جوبالاردا ەل نامىسىن اسقاقتاتقانى ۇلكەن ماقتانىش. ەندەشە, بولاشاق عالىمدارىمىزدى, بۇگىنگى جاس دارىندارىمىزدى بىزدە قۇتتىقتاپ, ساتتىلىك تىلەيمىز.
ارمان وكتيابر,
«ەگەمەن قازاقستان»
الماتى