ول سوڭعى جىلدارى ەلىمىزدە ينۆەستيتسيالىق قىزمەتتى جۇزەگە اسىرۋ ءۇشىن قولايلى جاعداي جاساۋ بويىنشا كەشەندى جۇمىس جۇرگىزىلگەنىن اتاپ ءوتتى.
ەىدۇ-مەن بىرگە قازاقستاننىڭ ينۆەستيتسيالىق ساياساتىنا ەكى شولۋ جۇرگىزىلدى, ولاردىڭ قورىتىندىسى بويىنشا ۇكىمەت ەلدىڭ نۆەستيتسيالىق احۋالىن جاقسارتۋ بويىنشا تولىق جوسپاردى قابىلدادى. «سوڭعى 5 جىلدا ءبىز زاڭنامامىزدى ەىدۇ ستاندارتتارىنا سايكەس وزگەرتتىك: كوشى-قون-ۆيزالىق رەجيمدى, رۇقسات جۇيەسىن, سالىق سالۋدى, كەدەندىك باقىلاۋدى جەڭىلدەتتىك», – دەدى ج. قاسىمبەك.رەفورمالار ناتيجەسىندە بيزنەس ورتانىڭ باسەكەگە قابىلەتتىلىگى ارتتى. قازاقستان دۇنيەجۇزىلىك بانكتىڭ «Doing Business» رەيتينگىسىندەگى پوزيتسياسىن 41-دەن 35-كە دەيىن جاقسارتتى. اعىمداعى جىلدىڭ اقپان ايىندا ەىدۇ كەڭەسى قازاقستاندى ەىدۇ ينۆەستيتسيالار جونىندەگى كوميتەتىنىڭ قاۋىمداستىرىلعان مۇشەسى رەتىندە شاقىرۋ تۋرالى شەشىم قابىلدادى.
بۇدان وزگە, قابىلدانعان شارالار ەلدىڭ كورسەتكىشتەرىنە اسەر ەتكەنى اتاپ ءوتىلدى. 2016 جىلدىڭ قورىتىندىسى بويىنشا قازاقستانعا تىكەلەي شەتەلدىك ينۆەستيتسيالار اعىمى 2015 جىلمەن سالىستىرعاندا 40%-عا ءوسىپ, 20,6 ملرد. دوللاردى قۇرادى.
مينيستر ەڭ كوپ ءوسىم تاۋ-كەن ءوندىرۋ جانە وڭدەۋ ونەركاسىبىندە, ەلەكترمەن قامتۋ جانە اقپاراتتىق تەحنولوگيالار سالالارىندا بايقالعانىن ايتىپ ءوتتى.
جالپى, بۇگىن وڭدەۋ ونەركاسىبىندەگى ينۆەستيتسيالار ءوسىمى ءۇردىسى ساقتالۋدا.
ەلدىك تۇرعىدا تشي-ءدىڭ ەڭ كوپ كولەمى كەلەسى ەلدەرگە تيەسىلى: نيدەرلاندى, اقش, شۆەيتساريا, فرانتسيا, قىتاي, رەسەي, بەلگيا, ۇلىبريتانيا.
ج. قاسىمبەك ينۆەستيتسيالار تارتۋ جۇيەسىن قايتا قالىپتاستىرۋ بويىنشا جۇرگىزىلىپ جاتقان كەشەندى جۇمىستار تۋرالى ايتتى. ونىڭ اياسىندا 2017 جىلدىڭ ماۋسىم ايىنىڭ سوڭىنا دەيىن ينۆەستيتسيالاردى قايدان, قالاي جانە قايدا تارتۋ كەرەكتىگىن كەشەندى تۇردە كورسەتەتىن, بارلىق مەملەكەتتىك ورگاندار مەن ۇلتتىق كومپانيالاردىڭ ۇيلەستىرۋ جۇمىستارىنىڭ ناقتى تەتىكتەرىن انىقتايتىن, ينۆەستيتسيالاردى تارتۋدىڭ ۇلتتىق ستراتەگياسى ازىرلەنەتىن بولادى.
«Kazakh Invest» ينۆەستيتسيالار جونىندەگى مامانداندىرىلعان ۇلتتىق كومپانياسى قازاقستان ۇكىمەتى اتىنان ءىرى ينۆەستورلارمەن جانە ماقساتتى ترانسۇلتتىق كومپانيالارمەن بىرەگەي كەلىسسوز جۇرگىزۋشى رەتىندە ءىس-قيمىل جاسايدى. ج. قاسىمبەك اتالعان كومپانياعا ەرەكشە مارتەبە بەرىلگەنىن ايتتى: ونداعى ديرەكتورلار كەڭەسىنە قر پرەمەر-ءمينيسترى باسشىلىق ەتەدى. ال بۇل, ءمينيستردىڭ ايتۋىنشا, ينۆەستورلاردى تارتۋ مەن سۇيەمەلدەۋ – اسا ماڭىزدى باسىمدىق ەكەنىن بىلدىرەدى.
قازىرگى تاڭدا وڭىرلەردە ينۆەستورلارعا قىزمەت كورسەتەتىن 19 سەكتور جۇمىس ىستەپ تۇر. 2017 جىلدىڭ ءبىرىنشى جارتىجىلدىعىنىڭ سوڭىنا دەيىن «ءبىر تەرەزە» قىزمەتى ونلاين-رەجيمدە ىسكە قوسىلاتىن بولادى.
ايتا كەتۋ كەرەك, وڭىرلەردە «Kazakh Invest» وكىلدەرى وبلىس اكىمدەرى مەن الماتى قالاسىنىڭ شتاتتان تىس كەڭەسشىلەرى مارتەبەسىنە يە بولادى.
ج. قاسىمبەك ينۆەستورلارمەن جۇمىس جۇرگىزەتىن بارلىق جاۋاپتى قىزمەتكەرلەردى بىرىكتىرەتىن جانە ينۆەستورلارعا مەملەكەتتىك قىزمەت كورسەتۋ بارىسىن ونلاين رەجيمدە قاداعالاپ وتىرۋعا مۇمكىندىك بەرەتىن follow up – اقپاراتتىق- باقىلاۋ جۇيەسىنىڭ جاقىن ارادا ىسكە قوسىلاتىنىن ەسكە سالىپ ءوتتى.
سونىمەن قاتار, ينۆەستورلارعا ۇسىناتىن دايىن جوبالاردىڭ بولماۋ ماسەلەسىن شەشۋ ءۇشىن, جاقىن ارادا حالىقارالىق ستاندارتتارعا ساي تاۋاشالى جوبالار «قاپتاماسى» ازىرلەنەتىن بولادى.
مينيستر ءىرى حالىقارالىق ينۆەستيتسيالىق فورۋمداردىڭ الەۋەتىن پايدالانۋدىڭ قاجەتتىگىن اتاپ ءوتتى. ول ءۇشىن قازاقستاندىق تاراپتىڭ قاتىسۋى ۇسىنىلاتىن, شەتەلدىك ينۆەستورلىق شارالاردىڭ بىرىڭعاي كەستەسى ازىرلەنەتىن بولادى.
قورىتىندىلاي كەلە, ج. قاسىمبەك قازاقستاندا شەتەلدىك ينۆەستورلارمەن بارلىق دەڭگەيلەردە جۇيەلىك قارىم-قاتىناستار ورناتىلعانىن اتاپ ءوتتى. مينيستر قر پرەزيدەنتى جانىنداعى شەتەل ينۆەستورلارىنىڭ كەڭەسى, قر ۇكىمەتى جانىنداعى ينۆەستيتسيالىق احۋالدى جاقسارتۋ كەڭەسى, «شەتەل ينۆەستورلارىنىڭ قازاقستاندىق كەڭەسى» قاۋىمداستىعى, «قازاقستاننىڭ ەۋروپالىق بيزنەس-قاۋىمداستىعى», ينۆەستيتسيالىق ومبۋدسمەن ينستيتۋتى سەكىلدى ۇيىمداردىڭ قىزمەتىنە وڭ باعا بەردى.