سونىڭ ءبىرى – «قىزعالداقتار» فەستيۆالى. ورتالىق ساياباقتا ۇيىمداستىرىلعان «كوكتەم كوركى – قىزعالداق» اتتى فەستيۆال اياسىندا الماتىلىقتار سان ءتۇرلى قىزعالداقتاردى تاماشالادى. ساياباق كەلۋشىلەردى اتشاپتىرىم اۋماققا ەگىلگەن قىزعالداق كىلەمىمەن قارسى الدى. قازاقستاندا قىزعالداقتىڭ 32 ءتۇرى وسەدى, ونىڭ ىشىندە 12 ءتۇرى تەك ءبىزدىڭ ەلىمىزدىڭ توپىراعىنا ءتان. وتانى وسى جەر بولىپ تابىلاتىن قىرمىزى گۇلدىڭ ورتا عاسىرلاردىڭ وزىندە-اق قىر-بەل ەمەس, قىرۋار ەل اسىپ, نيدەرلاند ارقىلى ءوزىمىزگە قايتا ورالعانى قىزعالداقتاردى ءتۇرى مەن ءتۇسى جاعىنان اناعۇرلىم جەتىلدىرىپ, ءبىرىن-ءبىرى قايتالاماس سۇلۋلىعىمەن سۇقتاندىراتىن تۇرپات سىيلاعان.
كىلەمدى گۇلزارلارىمەن, ارىقتارىمەن, تاۋ وزەندەرىنىڭ سىڭعىرلاعان سۋىمەن تانىمال بولعان الماتى سياقتى گۇل قالانىڭ اكىمدىگى جاسىل جەلەكپەن كومكەرۋگە, اباتتاندىرۋعا, بەزەندىرۋدىڭ جاڭا تەحنولوگيالارى مەن ءادىس-ءتاسىلدەرىنىڭ ەنگىزىلۋىنە, ەكولوگياعا ۇلەس قوسۋعا جىل سايىن قوماقتى قارجى ءبولىپ وتىرادى. ءدال قازىر شاھاردى كوگالداندىرۋ, گۇلمەن بەزەندىرۋ ناۋقانى باستالىپ كەتتى, ال سۇلۋلىقپەن ساۋلەتتەندىرۋ ءىسىندە كوكتەممەن بىرگە كەلەتىن قىزعالداقتىڭ ورنى ەرەكشە. فەستيۆالعا ايماقتاردان ارنايى كەلگەن باۋ-باقشا ءىسىنىڭ ماماندارى كوگالداندىرۋ ءىسىنىڭ تاجىريبەسىمەن, قىزعالداقتاردى قولايلى, قاتال كليماتتاردا ءوسىرۋ تۋرالى ويلارىمەن ءبولىستى. عۇمىرى قىسقا بولسا دا, ادەمىلىگىمەن تامساندىراتىن قىزعالداق وسىرۋدە باي تاجىريبەسى بار شەتەلدىك ماماندار, اتاپ ايتقاندا, تۇركيانىڭ Fsya Lale, Turkuaz Machinery كومپانيالارى الماتى قالاسىنا 50 مىڭ قىزعالداق كوشەتىن سىيعا تارتتى. نيدەرلاندتان, تۇركيادان كەلگەن گۇل ءوسىرۋ ءىسىنىڭ شەبەرلەرى وسى شارانى ۇيىمداستىرىپ وتىرعان «گرين لاند» كومپانياسىنىڭ ءونىمى مەن زاماناۋي لاندشافت كاسىبىن دامىتۋعا ۇلەس قوسىپ كەلە جاتقان كومپانيا جەتەكشىسى گۇلزادا قالدىباەۆانىڭ ەڭبەگىنە جوعارى باعا بەردى.
فەستيۆال اياسىندا قىزعالداقتان جاسالعان كومپوزيتسيالار ەكسكۋرسياسى, كوركەمونەرپازدار ۇجىمدارى مەن بەلگىلى ونەر شەبەرلەرىنىڭ كونتسەرتى, اشىق اسپان استىندا اسفالتتا سۋرەت سالۋ, ەرمەكسازدان, قاعازدان, ماتادان, تەرىدەن قىزعالداقتار جاساۋعا ءۇيرەتەتىن شەبەرلىك ساباقتارى ۇيىمداستىرىلدى.
ايگۇل احانبايقىزى,
«ەگەمەن قازاقستان»
الماتى