قاراشىعاناق كەن ورنىندا العاشقى كەزەگى 1998 جىلى اشىلعان «كوندەنسات» شاعىن مۇناي وڭدەۋ زاۋىتى وتكەن جىلدىڭ جەلتوقسان ايىندا ەۋرو-5 ەكولوگيالىق كلاستى اۆتوموبيل وتىنىنىڭ كوممەرتسيالىق ءوندىرىسىن ىسكە قوسقان ەدى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قاتىسۋىمەن اشىلعان بۇل جەلى جىلىنا 200 مىڭ توننا جوعارى ساپالى جانارماي ءوندىرىپ, ەلىمىزدىڭ باتىس ءوڭىرىنىڭ سۇرانىسىن قامتاماسىز ەتۋگە قابىلەتتى.
«ءبىزدىڭ جاڭارتۋ كەزەڭىنەن وتكەن زاۋىتىمىزدىڭ مۇمكىندىگى اۋىر مۇناي ونىمدەرىن تەرەڭ وڭدەپ, اقشىل مۇناي ونىمدەرىن شىعارۋدى 90%-عا دەيىن ارتتىرىپ وتىر. بۇگىن ىسكە قوسىلىپ وتىرعان ۆاكۋمدىق ايىرۋ سەكتسياسى جاڭا ءونىم – گازويل مەن گۋدرون شىعارا باستايدى. بۇل – قازاقستاننىڭ ىشكى نارىعىندا دا, سىرتقى رىنوكتا دا سۇرانىسى جوعارى ءونىم», - دەيدى «كوندەنسات» اق باس ديرەكتورى ەدۋارد ءجۇنىسوۆ.
ايتا كەتۋ كەرەك, مۇناي وڭدەۋ زاۋىتىن جاڭعىرتۋعا «قازاقستان دامۋ بانكى» (قدب) اق كومەكتەسكەن. جوبالىق قۇنى 168,6 ملن. اقش دوللارى بولاتىن جاڭعىرتۋ جۇمىستارىنىڭ 70%-ى قدب قارجىسى ەكەن.
- مۇناي وڭدەۋ سالاسىنداعى جوبالاردى قارجىلاندىرۋ ارقىلى ەكونوميكانىڭ باسىم سالالارىن دامىتۋ – ءبىزدىڭ بانكتىڭ مانداتىنا سايكەس كەلەدى. بۇگىنگى تاڭدا بانك ەلىمىزدەگى ءۇش مۇناي وڭدەۋ زاۋىتىنىڭ ەكەۋىن – اتىراۋ جانە پاۆلودار زاۋىتتارىن جاڭعىرتۋدى قارجىلاندىرىپ وتىر. بۇل سالاعا قازىر بانك ۇزاق مەرزىمدى جانە قىمبات ەمەس نەسيە رەسۋرستارىن ۇسىنا الادى. «كوندەنسات» اق-داعى جاڭعىرتۋ ناتيجەسىندە زاۋىت وڭدەۋ قۋاتىن ارتتىرىپ, جوعارى ساپالى جاڭا مۇناي ونىمدەرىن الۋعا, سونداي-اق جاڭا جۇمىس ورىندارىن اشۋعا جانە كاسىپورىندى ودان ءارى دامىتۋ كوكجيەگىن كەڭەيتۋگە زور مۇمكىندىك تۋدى, - دەيدى «قازاقستان دامۋ بانكى» اق-نىڭ اعا بانكيرى باقىتجان وماروۆ.
«كوندەنسات» اق باس ديرەكتورى ەدۋارد ءجۇنىسوۆتىڭ ايتۋىنشا, زاۋىتتى ىسكە قوسقالى, ياعني 2016 جىلىدڭ جەلتوقسانىنا بەرى 20 مىڭ توننادان استام جوعارى وكتاندى بەنزين وندىرىلگەن. سونىڭ 18,8 مىڭ تونناسى باتىس قازاقستان وبلىسى نارىعىندا ساتىلعان. جوسپار بويىنشا 2017 جىلى كاسىپورىن 418 مىڭ توننا مۇناي ءونىمىن وڭدەپ, 113 مىڭ توننا اي-92, 14 مىڭ توننا اي-95 ماركالى بەنزين, 23 توننا ديزەل وتىنىن, 16 مىڭ توننا گۋدرون جانە 15 مىڭ توننا قازاندىق وتىن وندىرمەك.
كومپانيادا قازىرگى تاڭدا 475 ادام جۇمىس جاسايدى.
قازبەك قۇتتىمۇرات ۇلى,
«ەگەمەن قازاقستان»