اتىراۋ وبلىسىندا وتكەن جىلى سىرتقى تاۋار اينالىمى 13 ملرد اقش دوللارىنا جەتتى. ونەركاسىپتىك ءوندىرىس 4,4 ترلن تەڭگەگە باعالاندى. ينۆەستيتسيا تارتۋدا مۇنايلى ءوڭىر كوش باستاپ كەلەدى. جالپى, وڭىرلىك ءونىم مەن ورتاشا ەڭبەكاقى مولشەرى بويىنشا دا وبلىس الدىڭعى قاتاردا. «ATYRAU INVEST-2017» حالىقارالىق فورۋمىندا قازىنالى مەكەننىڭ بۇگىنگە دەيىن قول جەتكىزگەن تابىستارى مەن جەتىستىكتەرى كوپشىلىك نازارىنا ۇسىنىلدى. شارا اياسىندا وبلىس اكىمدىگى 3,3 ملرد اقش دوللارىن قۇرايتىن 9 مەموراندۋمعا قول قويدى. بۇل – الەۋمەتتىڭ الەۋەتىن كوتەرىپ, ەل ەكونوميكاسىن دامىتۋعا باعىتتالعان تاعى ءبىر قادام.
– «ATYRAU INVEST-2017» حالىقارالىق فورۋمىنىڭ ماقساتى – وبلىستىڭ ينۆەستيتسيالىق مۇمكىندىگىمەن تانىستىرۋ, ينۆەستيتسيالاردى وبلىس ەكونوميكاسىنا جانە ناقتى ينۆەستيتسيالارعا تارتۋ, − دەيدى ءوڭىر باسشىسى نۇرلان نوعاەۆ. – 20 مەملەكەتتىڭ وكىلى, ءجۇزدەن استام كومپانيانىڭ باسشىلارى مەن قىزمەتكەرلەرى كەلدى. ورتالىق جانە جەرگىلىكتى مەملەكەتتىك مەكەمەلەر, ۇلتتىق كومپانيالار مەن دامۋ ينستيتۋتتارىنىڭ, ەلىمىزدەگى ديپلوماتيالىق وكىلدىكتەردىڭ وكىلدەرى جانە شەتەلدىك, وتاندىق ينۆەستورلار دا شاراعا كۋا بولدى. كورمەگە قاتىسۋشىلار ءوز ءونىمدەرى مەن كورسەتەتىن قىزمەتتەرىن كوپشىلىككە ۇسىندى. بۇل جاڭا جوبا باستاۋعا نيەتتى اتىراۋلىق كاسىپكەرلەر ءۇشىن دە جاقسى مۇمكىندىك. ال ينۆەستورلار مۇناي-گاز سالاسىندا, ەكونوميكانى ءارتاراپتاندىرۋ باعىتىندا جۇزەگە اسىپ جاتقان شارالاردان حاباردار بولدى.
اتىراۋ وبلىسىنداعى ينۆەستيتسيالىق احۋالدىڭ تۇراقتىلىعى ءىرى كومپانيالار تاراپىنان قىزىعۋشىلىققا يە. ولار قاراجات سالىپ, قايتارىمىن كورۋگە ىنتالى. وسى ينۆەستيتسيالىق فورۋمدا مۇناي-حيميا پاركىنىڭ اياسىندا جۇزەگە اسىرىلاتىن 620 ملن تەڭگەنىڭ جوباسىن اتقارۋعا مەموراندۋمعا قول قويىلدى. جەرگىلىكتى جەردە اگرەسسيۆتى ورتاداعى مەتالدى توت باسپاۋ تەحنولوگياسى بويىنشا جۇمىستار قولعا الىنىپ جاتىر. وبلىس اكىمىنىڭ ايتۋىنشا, ينۆەستورلار تەك مۇناي-گاز سالاسى عانا ەمەس, ءونىم ءوندىرۋ, اۋىل شارۋاشىلىعى باعىتتارىنا دا قىزىعۋشىلىق تانىتقان. شەتەلدىك جانە وتاندىق ينۆەستورلاردىڭ باسقوسۋى ءوزارا ءتيىمدى كەلىسىمدەرگە جول اشادى, ءبىرلەسكەن كاسىپورىن قۇرۋعا ءمۇمكىندىك بەرەدى. قازىر وبلىستا وسىنداي مىڭنان استام كومپانيا تابىستى ەڭبەك ەتىپ جاتىر.
فورۋمعا قاتىسقان «قازەنەردجي» قاۋىمداستىعى ءتوراعاسىنىڭ ورىنباسارى ۇزاقباي قارابالين وزىق تەحنولوگيالار مەن يننوۆاتسيالار ارقىلى عانا بيىكتەن كورىنەمىز دەگەن ويىن ايتتى. ال گەرمانيانىڭ قازاقستانداعى كونسۋلى يورن روزەنبەرگ «بيىل ەكى ەل اراسىنداعى ديپلوماتيالىق قارىم-قاتىناستىڭ ورناعانىنا 25 جىل. گەرمانيا ءۇشىن قازاقستان ورتالىق ازياداعى باستى ەكونوميكالىق ارىپتەس سانالادى. كومىرسۋتەگى شيكىزاتىنا باي اتىراۋ وبلىسىنىڭ دا ورنى بولەك. جەرگىلىكتى باسشىلىقتىڭ قولداۋىمەن ىسكەرلىك بايلانىستار ورناتۋعا ىڭعايلى ورتالىق قالىپتاسقانىنا قۋانامىز», دەدى. بەلگيا كورولدىگىنىڭ قازاقستانداعى توتەنشە جانە وكىلەتتى ەلشىسى ميشەل پەتەرمانس ەكى ەل اراسىنداعى بايلانىستىڭ جىلدان-جىلعا نىعايىپ كەلە جاتقانىن اتاپ ايتتى.
16-شى سولتۇستىك-كاسپي قۇرىلىس جانە ينتەرەر كورمەسىنە ارنايى كەلگەندەردىڭ قاتارىندا تۇركيانىڭ «كىۆانچگرۋپ» كومپانياسى دا بار. بۇعان دەيىن اقتاۋ قالاسىنا ونىمدەرىن ۇسىنىپ كەلە جاتقان كاسىپورىن ەندى اتىراۋدا بولىمشەسىن اشۋعا نيەتتى. «1980 جىلى نەگىزى قالانعان شاعىن بيزنەس بۇگىندە ءۇلكەن كومپانيالار توبىنا اينالدى, − دەيدى «كىۆانچگرۋپتىڭ» ازيا ەلدەرىندەگى ساتۋ بويىنشا مەنەدجەرى سەركان يىلدىرىم. – ءبىزدىڭ كيىمدەرىمىز وتە ىڭعايلى, ءساندى. تىگىن يندۋسترياسىندا وزىندىك ورنى بار كاسىپورىن ءوندىرىس اۋقىمىن كەڭەيتۋدى جوسپارلاپ وتىر».
جالپى, اتىراۋ وبلىسىندا يندۋستريالاندىرۋ باعدارلاماسى اياسىندا ءوتكەن جىلى 7 جوبا جۇزەگە استى. «بيىل ءتورت جوبانىڭ جۇمىسى باستالادى. ولار: روبوتتى دانەكەرلەۋ ءتاسىلى ارقىلى مەتالقۇراستىرمالار دايىنداۋ ءوندىرىسى, فارماتسەۆتيكا زاۋىتى, بالىق ءوسىرەتىن توعان شارۋاشىلىعى, ماكارون ءوندىرۋ تسەحى. بۇدان بولەك قۇنى 14 ترلن تەڭگە بولاتىن, 20 مىڭنان استام جۇمىس ورنىنا ەسەپتەلگەن 20 ينۆەستيتسيالىق جوبا جۇزەگە اسىرىلادى. تەڭىز كەنىشىن كەڭەيتۋ جوباسى شەڭبەرىندە اتقارىلار جۇمىستاردىڭ ناتيجەسىندە مۇناي ءوندىرىسىنىڭ كولەمىن 27-دەن 39 ملن تونناعا ۇلعايتۋعا جول اشىلادى», دەپ اتاپ ءوتتى وبلىس اكىمى ن.نوعاەۆ.
وتكەن جىلدىڭ قورىتىندى كورسەتكىشتەرىنە زەر سالساق, وبلىستاعى شاعىن جانە ورتا بيزنەسپەن اينالىساتىن تۇرعىندار سانى 7,9 پايىزعا ارتىپ, 128,7 مىڭ ادامدى قۇراعان. بۇل ءوڭىردە ەكونوميكالىق بەلسەندى حالىقتىڭ 41 پايىزى وسى سالاعا جۇمىلدىرىلعانىن كورسەتەدى. ال حالىقارالىق ينۆەستيتسيالىق فورۋم سىندى شارالار ەل يگىلىگىنە ەلەۋلى ۇلەس قوساتىنىمەن ەرەكشە.
باقىتگۇل باباش,
«ەگەمەن قازاقستان»
اتىراۋ