بالالار – بەيبىتشىلىك ەلشىسى

ورتالىق مۋزەي تاياۋ ۋاقىتتا عانا قازاقستان ۇلتتىق يۋنەسكو كلۋبتارى فە­دە­­راتسياسىمەن بىرلەسىپ, يۋنەسكو-نىڭ 70 جىلدىعى مەن قازاقستان رەسپۋبليكاسى يۋنەسكو جانە يسەسكو ىستەرى جونىندەگى ۇلت­تىق كوميسسياسىنىڭ 25 جىلدىعىنا وراي «Mitsubishi Asian Children’s Enikki Festa» اتتى حالىقارالىق بالالار شىعارماشىلىعى فەس­تي­ۆالى جەڭىمپازدارىنىڭ كورمەسىن ۇيىم­داس­تىردى.

كورمەنىڭ تابىستى ءوتۋى ءۇشىن مۋزەي دي­رەك­تورىنىڭ مادەني-ءبىلىم جۇمىسى جانە سىرتقى بايلانىستار جونىندەگى ورىنبا­سارى بەيبىتقالي قاقاباەۆ زور ەڭبەك ءسى­ڭىر­دى. اتالعان بىرلەسكەن ءىس-شاراعا قازاق­ستان­دىق فەدەراتسيالار كلۋبىنىڭ سە­نىم­دى سەرىكتەستەرى – الماتىداعى يۋنەسكو كلاس­تەرلىك بيۋروسىنىڭ ديرەكتورى اندرەي سەرگەەۆيچ شەۆەلەۆ پەن قازاقستان رەس­پۋب­ليكاسى يۋنەسكو جانە يسەسكو ءىس­تەرى جونىندەگى ۇلتتىق كوميسسيانىڭ وكىلى اقمارال ورازيماننىڭ قاتىسقانىن دا اتاپ وتكىمىز كەلەدى. كورمە اشىلعان العاشقى كۇنى جادىگەرلەرمەن تانىسۋعا كەلگەن العاش­قى قادىرمەندى قوناقتار بالالارعا شى­عار­ماشىلىق شىڭدالۋ مەن جەتىستىكتەر تىلەپ, ەلىمىزدىڭ جارقىن بولاشاعىنا دەگەن ىزگى ۇمىتتەرىن بىلدىرگەنىنىڭ ءوزى مارتەبە سانالىپ وتىر. جىل سايىن بالالار بايقاۋىن ۇيىمداستىرۋشى قازاقستان ۇلتتىق يۋنەسكو­ كلۋبتارى فەدەراتسياسىنىڭ ۆيتسە-پرە­زيدەنتى سەرىكحان ايازباەۆتىڭ دا ەسىمىن وسى ارادا ەرەكشە اتاپ وتكەندى ءجون سانادىق. بۇل بىرلەستىك بالالار شىعارماشىلىعىن دامى­تۋ جولىندا ۇدايى ءتۇرلى دە اۋقىمدى ءىس-شارالار ۇيىمداستىرىپ كەلەدى.

قازاقستان 2008 جىلدان باستاپ «Mitsubishi Asian Children’s Enikki Festa» جوباسىنا قاتىسۋشى مەملەكەت سانالاتىنىن ايتا كەتكەن ءجون. فەستيۆال وتكەن جىلداردا ازيا-تىنىق مۇحيتى ايماعىنىڭ 24 ەلىنەن قاتىسقان 700 مىڭعا جۋىق بالا ءوز ومىرلەرىنىڭ ەڭ باقىتتى 5 كۇنى تۋرالى قىزىقتى ەسسەلەرىن بايقاۋعا ۇسىن­عان. بۇل ەسسەلەردە باقىتتى بالالىق شاق­تى اڭساعان بالدىرعانداردىڭ ارمان-ءۇمىتى ەرەك­شە كورىنىس تاپقانىن ەسكە سالعانىمىز ابزال.

كورمەنىڭ اشىلۋ سالتاناتىندا حالىق­ارا­لىق جوبانىڭ الماتىداعى ءۇش جە­ڭىم­پازىنا ۇيىمداستىرۋشىلاردان ەستە­لىك سىيلىقتار تاپ­سىرىلدى. يۋنەسكو كلۋبىنىڭ جاڭا ءمۇ­شە­­لەرىنە رەسمي تۇردە مۇشەلىك تولقۇجاتتار مەن توسبەلگىلەر بەرىلدى. بايقاۋدىڭ باس ءجۇل­دە­سىن يەلەنگەن 11 جاسار قابدىرعالي بەر­دەن­گە ارنايى مەدال مەن ديپلوم تابىستالسا, 10 جاسار ءامينا ازيەۆا «Mitsubishi» كور­پو­­را­تسيا­سىنىڭ ارنايى جۇلدەسىنە يە بولدى. بۇ­دان بولەك, 12 جاسار دميتري لوتاش ازيا-تى­نىق مۇحيتى ايماعىنىڭ يۋنەسكو كلۋب­تا­رى جانە اسسوتسياتسياسىنىڭ ارنايى جۇلدەسىمەن ماراپاتتالدى.

الماتىداعى بۇل كورمەنى قىسقا مەرزىم ىشىندە 2000-گە جۋىق كورەرمەن تاما­شا­لا­عان ەكەن. ءومىردىڭ ىزگى قۋانىشتارىن, بەي­بىت­شى­لىكتى, جاسامپازدىقتى, جاڭعىرۋدى بەينەلە­گەن بالالار شىعارماشىلىعى تۋىندىلارى كوپشىلىكتىڭ ىستىق ىقىلاسىنا بولەندى.

گۇلايىم قىدىراليەۆا,

قر موم كىشى عىلىمي قىزمەتكەرى

الماتى