بۇگىندە دامحانالارعا بارساڭىز قازاقستاننىڭ وزگە وڭىرلەرىندە كەزدەسپەيتىن تاعامدارعا تاپسىرىس بەرە الاسىز. ماسەلەن, كينودان كورگەنىڭىز بولماسا اياعىڭىز جەتپەگەن, مۇمكىن, ءومىرىڭىزدىڭ سوڭىنا دا جولىڭىز ءتۇسپەۋى مۇمكىن افريكانىڭ وزەن, كولشىگىندە وسەتىن جايىننىڭ ەتى. مارحابات!
وسىندايدا ەسكە تۇسەدى. 2004 جىلى «ەگەمەن قازاقستان» گازەتى ءتىلشىلەرىنىڭ قۇرامىندا ۇرىمشىگە جولىمىز ءتۇسكەن. كۇيتىڭ قالاسىنداعى كەزدەسۋدەن سوڭ دامگە وتىردىق.
اينالمالى ۇستەل, ءۇستى قايىسقان تاعام. قاق ورتاسىندا بۇقتىرىلعان الىپ تاسباقا ءتورت اياعى ءتورت جاققا كەتىپ تاربيىپ جاتىر. تاعى دا ءبىز ءبىلمەيتىن باقا, شايان ەتتەرىنەن
دايارلانعان تاعامدار. تىكسىنىپ قالدىق. دەلەگاتسيانى باستاپ بارعان اعامىز قاباعىن شىتتى. الگىلەردى داستارحاننان الىپ كەتۋدى ءوتىندى. سيىر, قوي, جىلقى ەتىنەن جاسالعان ءدامدى عانا اكەلۋدى بۇيىردى.
كۇتۋشى جاق اڭ-تاڭ. «ءبىز بۇل قىمبات تاعامداردى اسا قادىرلى قوناقتار ءۇشىن ۇشاقپەن وزگە جەرلەردەن الدىرامىز», دەگەن.
ال وڭتۇستىكتىڭ كافە, مەيرامحانالارى ەكزوتيكالىق تاعامداردى ۇشاقپەن ەش جەردەن الدىرمايدى.
قازىر افريكا سومى وڭتۇستىكتىڭ ءبىرتالاي اۋداندارىندا ءوسىرىلىپ جاتىر. جاقىندا تۇلكىباس اۋدانىنداعى ءبىر شارۋاشىلىقتان كوردىك. شارۋاشىلىق يەسى الەۋمەتتىك جەلىدەن افريكا سومى تۋرالى وقىپ, پايداسىنا كوز جەتكىزگەننەن كەيىن رەسەيدە ءوسىرىلىپ جاتقان بالىق پيتومنيگىنەن الدىرعان ەكەن. ولارمەن تاجىريبە الماسىپ, جايىندى ءوسىرۋدىڭ قىر-سىرىن ابدەن مەڭگەرىپ العان. بۇل شارۋاشىلىقتىڭ تيىمدىلىگى, ءتورت ت ۇلىكتى ءوسىرۋ سياقتى ءورىس قۋالاپ تابانىڭنان توزبايسىڭ. قىسقى جەم-ءشوپ ءۇشىن الا جاز بويى ادىر قۋالاپ, ءشوپ شاپپايسىڭ. بەلگىلەنگەن مەزگىلىندە كەسەك-كەسەك ەت تاستاپ, تاماقتاندىرساڭ بولعانى. ءتۇيەنى ءتۇگىمەن جۇتۋعا دايىن بۇل جايىندارىڭىز ناعىز دەر شاعىنا جەتكەندە 120 كەلىگە دەيىن تارتادى ەكەن. ءبىر قۇنان قويدىڭ سالماعىن ويعا الىپ, ءبىر جايىننان تۇسەتىن پايدانى ەسەپتەي بەرىڭىز.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى