ۇيىمداستىرۋشىلاردىڭ ايتۋىنشا, ايتىس ەكى كەزەڭ بويىنشا وتكەن. ءبىرىنشى كەزەڭدە بايقاۋ كوميسسياسى ەلىمىزدىڭ 14 وبلىسىنان كەلگەن 30 جاس اقىننىڭ ونەرىن باعالاعان. ال «قازمەديا» ورتالىعى زالىنىڭ ساحناسىندا وتكەن اقتىق سايىسقا 10 اقىن قاتىستى.
تاقىرىپ بولاشاققا قاتىستى بولعانىمەن, جاستار كوكەيىندە جۇرگەن وي-پىكىرلەرىن, ياعني قوعامداعى الەۋمەتتىك, ساياسي, رۋحاني پروبلەمالاردى ارقايسىسى وزىنشە ورنەكتەپ باقتى. سۇرىنگەن ۇيقاستار, قيسىنسىز تىركەستەر مەن جايداق قالجىڭدار دا بولماي قالعان جوق. اتىن اتاپ, ءتۇسىن تۇستەمەي-اق قويايىق, ءبىر پاراسى بىلاي بولىپ كەلەدى: «مەن قالاي بۇل بالاعا بايلانامىن, ايبار-اۋ, تاماشا ەكەن سايراعانىڭ» نەمەسە «تىرىلەر كورىنەدى بيىك بولىپ, ۇستىندە جۇرگەننەن سوڭ ولگەندەردىڭ», «قابىرعاڭا قارا قاندى يلەپ ءجۇرسىڭ», ت.ب. ءارينە, تاۋىپ ايتىلعان, تاپقىرلىقپەن, ۇتقىرلىقپەن جەتكىزىلىپ, تىڭداۋشىنىڭ كوڭىلىنەن شىققان ۇيقاستار دا بارشىلىق. ونىڭ ءبارىن ءتىزىپ وتىرۋ مىندەت ەمەس. بىرەۋىن ايتساق تا جەتكىلىكتى شىعار. مىسالى, سەمەيلىك ماناربەك ساتىبالدين ەسىمدى اقىن جۋىردا عانا شەكارادا بولعان جايعا قاتىستى ءوز پىكىرىن ءشيىرىپ-ءشيىرىپ اكەپ, «كەدەندە كەمپىر توناپ جۇرگەندەردىڭ, ولگەندە وكىرگەنى كىمگە ءدارى؟» دەپ ءتۇيىندەدى. سونداي-اق, ارقالىق قالاسى اتىنان قاتىسقان توبا وتەپباەۆ تا «جۇرتتىڭ كوبى كۇلكىدەن جىندى بولعان» قوعامداعى رۋحاني, الەۋمەتتىك ماسەلەلەردى اششى تىلمەن ءتۇيرەپ-تۇيرەپ, قوتىرعا اينالا باستاعان جارالاردىڭ بەتىن تىرناعانىن, ويلى ولەڭنىڭ ورەسىنەن كورىنگەنىن ايتۋ ابزال.
سايىستىڭ اقتىق سىنىنا ايتىلعان ون اقىننىڭ التاۋى شىقتى. سونىڭ تورتەۋىنە بايگەنىڭ جۇلدەسى بۇيىردى. اتاپ ايتقاندا, ىنتالاندىرۋ سىيلىعىمەن, 50 مىڭ تەڭگە سىياقىمەن اقمولا وبلىسى, ەرەيمەنتاۋ اۋدانى اتىنان قاتىسقان ەرلان داۋلەت ۇلى ماراپاتتالدى. ءۇشىنشى ورىن, 150 مىڭ تەڭگەنىڭ سەرتيفيكاتى قوستانايلىق ءنۇريا اقباباقىزىنا بەرىلدى. ەكىنشى ورىن 200 مىڭنىڭ سەرتيفيكاتى قىزىلوردالىق مۇحامەدجان مانسۇروۆتى تاپتى. ال ايتىستىڭ ءبىرىنشى ورنى 300 مىڭ تەڭگەلىك سىياقى سەمەيلىك نۇرجان ومىرباەۆتىڭ ەنشىسىنە ءتيدى. جالپى, ايتىسقا قاتىسقان جاس اقىنداردىڭ ەشقايسىسى دا ەلەۋسىز قالعان جوق. بارلىعىنا استانا قالاسى اكىمدىگىنىڭ العىس حاتى مەن باعالى سىيلىقتارى تاپسىرىلدى.
ايگۇل سەيىلوۆا,
سۋرەتتى تۇسىرگەن ورىنباي بالمۇرات,
«ەگەمەن قازاقستان»