جوبا اياسىندا استانا تەمىرجول تەلىمىنىڭ ينفراقۇرىلىمىن دامىتۋ مەن ۆوكزال كەشەنى قۇرىلىسىن جۇرگىزۋ جۇمىستارى اتقارىلادى, دەپ حابارلايدى «قازاقستان تەمىر جولى» ۇك» اق ءباسپاسوز قىزمەتى.
استانا ينفراقۇرىلىمىن دامىتۋ ارقىلى جۇك جانە جولاۋشىلار اعىنىن ۇلعايتۋ كوزدەلەدى.
قالانىڭ ىشكى تەمىرجول نىساندارىن دامىتۋ قۇرىلىسىنا الدىڭعى قاتارلى يننوۆاتسيالىق تەحنولوگيا پايدالانىلادى.
جۋدان قورعايتىن قۇرىلعىمەن قاپتالعان تەمىرجول ەستاكاداسى قالانىڭ كولىگىن اعىنىنا كەدەرگى كەلتىرمەي, جولاۋشىلاردى جاڭا تەمىرجول ۆوكزالىنا جەتكىزەدى.
جاڭا ۆوكزال تاۋلىگىنە 35 مىڭ جولاۋشىنى وتكىزە الادى. ال, قازىرگى ەلورداسىنداعى ەسكى ۆوكزال ارقىلى كۇنىنە 12 مىڭ جولاۋشى ءوتۋى ءتيىس بولسا, وندا ءىس جۇزىندە 18 مىڭ جولاۋشىعا دەيىن كىرىپ-شىعادى.
جاڭا ۆوزكال جوباسىن ساراپتاۋ بارىسىندا تارتىلعان Buro Happold ( ۇلىبريتانيا), Tabanlioglu Architects (تۇركيا), Jamas (گەرمانيا) حالىقارالىق ساراپشىلار كومانداسى ۆوكزالدى تەمىرجولدىڭ ۇستىنە كونكورس ارقىلى ورنالاستىرۋدى قولدادى.
بۇل ءوز الدىنا ۆوكزال عيماراتىن جاساۋداعى سوڭعى ءتاسىل وزىندىك نوۋ-حاۋ بولىپ تابىلادى. «ۆوكزال-كوپىر جاعالاۋدان بىرتىندەپ كوتەرىلىپ, كەڭىستىكتى ءتيىمدى پايدالانۋدى ماقسات ەتكەن.
ۆوكزالدىڭ قالانىڭ ىسكەرلىك ورتالىعىنا جاقىن ورنالاسۋى دا وتە قولايلى. ول ارقىلى قالاداعى اۆتوكولىكتىڭ تىعىندالۋى ازايادى.
ۆوكزال عيماراتىنىڭ اۋماعى120 مىڭ شارشى مەتر. وندا مۇمكىندىگى شەكتەۋلى جاندارعا ارنالعان تاكيلدىك جولدار, برايل الىپبيىمەن اقپاراتتى تابلو, ارنايى كاسسا قىزمەت كورسەتەدى.
نەگىزگى كۇتۋ زالىنان بولەك الەمدىك تالاپتارعا ساي قوناقۇيلىك بولمەلەر, قولايلى ساقتاۋ قويمالارى, انا مەن بالا بولمەسى, مەديتسينالىق كەڭسەلەر, فۋدكورتتتار, مەيرامحانالار, 1500 ورىندىق ىشكى جانە سىرتقى پاركينگتەر قامتىلعان.
عيمارات قۋات ۇنەمدەگىش ليفتىلەرمەن ەسكالاتورلارمەن قامتىلىپ, جىلۋ جۇيەلەرى قىستا اۋانى جىلىتسا, جازدا سالقىنداتادى.
جاڭبىر سۋىن جيناپ, ونى قاسبەتتى جۋعا پايدالانىپ, جاقىن اۋماقتى كوگالداندىرۋعا جۇمسالادى.
جولاۋشىلاردىڭ كەزەك كۇتىپ قالماۋىن بولدىرماۋ ءۇشىن كەزەكتى باسقارۋدىڭ زامانۋي قوندىرعىسى, بيلەتتى ەلەكتروندى ساتۋ جۇيەسى, ينتەرنەتكە شىعۋ مۇمكىندىگى جاسالادى.
جولاۋشىلاردى توتەنشە جاعدايلاردان قورعاۋ ماقساتىندا لاڭكەستىك وقيعالاردىڭ الدىن الۋدىڭ كەشەندى مۇمكىندىگى جاسالادى. ونىڭ جولاۋشىلاردى تەكسەرىپ كىرگىزۋ قۇرىلعىسى, بەينەباقىلاۋ جۇيەسى ورناتىلادى. عيماراتتىڭ ءىشى سىرتىندا قوزعالىس ءتارتىبى تاۋلىك بويى باقىلانادى.
جاڭا ۆوكزال اشىلعان كەزدە 1300 ادام جۇمىسپەن قامتىلادى.
15 مامىردا جالپى قۇرىلىس جۇمىستارى اياقتالىپ, 1-ماۋسىمدا ۆوكزال كەشەنى ينفراقۇرىلىمىنىڭ – ينجەنەرلىك كوممۋنيكاتسيالىق جانە پويىز قوزعالىسىن ينتەللەكتۋالدىق باسقارۋ جۇيەسى, جولاۋشىلارعا قىزمەت كورسەتۋى تەستىلىك سىناقتان وتكىزىلەدى.
«نۇرلى جول» ۆوكزالىنا العاشقى پويىزدار 1-ماۋسىمنان كىرىپ, شىعا باستايدى.