"كەيبىر قۇرىلىس كومپانيالارى سالىنعان ۇيلەردىڭ جانىنان قۇرىلىس قوقىستارىن دا شىعارمايدى. قالا تولعان قوقىس. مۇنداي بۇرىن ءتىپتى ادىلبەك رىسكەلدى ۇلى كەزىندە دە بولعان ەمەس" دەدى پرەزيدەنت ەكسپو كورمەسىنە دايىندىق ماسەلەلەرىن پىسىقتاۋعا ارنالعان وتىرىستا.
استانا اكىمى اسەت يسەكەشەۆ قىستان سوڭ, وسىنداي قوقىستار كوپتەپ انىقتالىپ جاتاتىندىعىن راستادى.
"قازىر زاڭنامانى وزگەرتۋ جونىندە ۇسىنىسپەن شىعىپ جاتىرمىز. سەبەبى بۇل بۇگىندە ەش زاڭمەن رەتتەلمەيدى" دەپ جاۋاپ بەردى ءا. يسەكەشەۆ.
"ول (قۇرىلىس كومپانياسى - رەد.) مىندەتتى قوقىس جيناۋعا. تۇرعىن ءۇي سالدى ما, ماڭايىنا جولدار سالىپ, اعاش وتىرعىزۋى كەرەك. ال ولار ونىمەن اينالىسپاق تۇگىلى, قوقىستى دا جينامايدى. سەبەبى, ءبىز تالاپ ەتپەيمىز. ايىپپۇل سالىپ, سوتتاۋ كەرەك" دەدى پرەزيدەنت.
سونىمەن قاتار, مەملەكەت باسشىسى جاڭادان سالىنىپ جاتقان ۇيلەردىڭ سىرت كەلبەتىن وزگەرتۋدى تاپسىردى.
«ءبىزدىڭ كەيبىر ۇيلەرىمىزدىڭ قاسبەتىنە قاراڭىزدار. پرەزيدەنتتىڭ كوز الدىندا تۇرعان ۇيلەردىڭ قاسبەتى, ادام جۇرەتىن جولداردا تاقتايشالار ءتۇسىپ قالعان, بۇزىلىپ, جۇپىنى تارتقان. ءۇي يەلەرى بۇنى رەتكە كەلتىرمەيدى, سەبەبى ەشكىم تالاپ ەتىپ جاتقان جوق. بىزدە قىس ۇزاق, قىستا قالادا جاسىل-جەلەك بولمايدى, ەلوردانى تەك ادەمى نىساندار كوركەيتىپ تۇرادى. مەنىڭشە كوك, سارى, اق تۇستەر ءبىزدىڭ قالامىزعا جاقسى جاراسادى. وسىنى بىرەۋ قاداعالاپ وتىرۋى ءتيىس. وڭتۇستىككورەيالىقتار بيىك-بيىك ۇيلەر سالىپ جاتىر. سۇپ-سۇر سۋىق عيمارات. تۇرعىن ءۇي ەمەس, ىشكى ىستەر مينيسترلىگىنە ارنالعان مەكەمەلەر سياقتى. تىم قۇرىعاندا اق ۇيلەر بولۋى كەرەك. نە قيىندىق بار مۇندا؟! قازىر بار ما ول قۇرىلىس كومپانياسى, وڭتۇستىككورەيالىق ينۆەستوردى تۇرعىزىڭىزدارشى. ءبىز سىزدەردى شاقىرتتىق, جاقسى ۇيلەر سالىپ جاتىرسىزدار, سول ءۇشىن العىس ايتامىز, بىراق نەگە سول ۇيلەردىڭ قاسبەتى باسقا تۇرعىن ۇيلەرگە قاراعاندا تىم ناشار؟», - دەپ سۇرادى ەلباسى HighWhill تۇرعىن ءۇي كەشەنىن مەڭزەپ. «قۇرمەتتى پرەزيدەنت مىرزا, ءسىز ايتقان سىنىڭىزدى ەسكەرە وتىرىپ, ءبىز بارلىق وزگەرىستەردى ەنگىزۋگە دايىنبىز» دەدى ءوز كەزەگىندە وڭتۇستىككورەيالىق ينۆەستور.
پرەزيدەنتتىڭ سوزىنشە, بۇل جۇمىستى و باستا قاداعالاپ وتىرعاندا, مۇنداي پروبلەمالار تۋىنداماس ەدى. «مەن اقوردادان كۇندە بارلىعىن كورىپ تۇراتىنىمدى ەسكەر. ەكسپو قارساڭىندا جاعدايدى تۇزەتەسىڭدەر دەپ ويلايمىن. جالپى جاقسى سالىپ جاتىرسىزدار, بۇنى تۇزەتۋگە بولادى» دەپ اتاپ ءوتتى ەلباسى.