ءوڭىر باسشىسى ءۇندىستان جەڭىل ونەركاسىبى مينيسترلىگىنىڭ بىرلەسكەن حاتشىسى گۋپتا سۋبراتا مىرزاعا ءوڭىردىڭ ەكونوميكالىق دامۋ بارىسى مەن ينۆەستيتسيالىق تارتىمدىلىعىن باياندادى, دەپ حابارلايدى وبلىس اكىمدىگىنىڭ رەسمي سايتى.
«قازاقستانداعى توقىما ونەركاسىبى دامۋىنىڭ ماڭىزدى الەۋەتى وڭتۇستىك قازاقستان وبلىسىندا. ءبىزدىڭ وڭىردە ماقتا شارۋاشىلىعى جاقسى دامىعان. وبلىسىمىزدا «وڭتۇستىك» ارنايى ەكونوميكالىق ايماعى قۇرىلىپ, وندا تىگىن تسەحتارى مەن فابريكالارىمىز جۇمىس ىستەپ جاتىر. ەندىگى ماسەلە - جەڭىل ونەركاسىپتى دامىتۋدا ءۇندىستان مەملەكەتىمەن تىعىز قارىم-قاتىناس ورناتىپ, ورتاق جوبالاردى بىرلەسىپ ىسكە اسىرۋ. بۇل رەتتە وڭىردە شەتەلدىك ينۆەستورلارعا بارلىق قولداۋلار جاسالانادى. ونەركاسىپكە قاجەتتى جەر تەلىمى بەرىلىپ, بارلىق ينفارقۇرىلىمدىق قاجەتتىلىكتەرمەن قامتاماسىز ەتەتىن بولامىز», - دەدى جانسەيىت قانسەيىت ۇلى.
بۇگىنگى تاڭدا وبلىسىمىزداعى جەڭىل ونەركاسىپتە كاسىپورىنداردىڭ 80 پايىزدان استامى شاعىن جانە ورتا بيزنەس سۋبەكتىلەرى بولىپ تابىلادى. وڭىردە جىل سايىن 400 - 450 مىڭ توننا ءشيتتى ماقتا جينالادى, تابيعي شيكىزاتتان جاسالعان ونىمگە سۇرانىس تا مول. وسى جانە وزگە دە مۇمكىندىكتەرگە قانىققان قوناقتار جەڭىل ونەركاسىپ سالاسىندا ەڭبەك ەتىپ جۇرگەن ءوڭىر كاسىپكەرلەرىن 30 ماۋسىم كۇنى ءۇندىستاندا وتكەلى وتىرعان ءىرى جەرمەڭكەگە قاتىسۋعا شاقىردى.
«جۇمىسشى توبىنىڭ نەگىزگى ماقساتى – قازاقستان مەن ءۇندىستان مەملەكەتتەرى اراسىنداعى جەڭىل ونەركاسىپ سالاسىنداعى قارىم-قاتىناس پەن ساۋدا-ەكونوميكالىق بايلانىستاردى نىعايتۋ بولىپ تابىلادى. بۇگىنگى تاڭدا ءۇندىستاندا جەڭىل ونەركاسىپتىڭ جىلدىق ساۋدا اينالىمى 140 ملرد اقش دوللارىن قۇراپ وتىر. ءۇندىستان توقىما, ماقتا, ماتا ونىمدەرىن وندىرەتىن 1000-عا جۋىق كومپانيانىڭ فابريكالارى جۇمىس ىستەيدى. وڭتۇستىك قازاقستان وبلىسىنا جاساعان بۇل ساپارىمىز جەمىستى جانە ناتيجەلى بولادى دەپ سەنەمىن»,- دەدى ء ۇندىستان جەڭىل ونەركاسىبى مينيسترلىگىنىڭ بىرلەسكەن حاتشىسى گۋپتا سۋبراتا.
ايتا كەتەيىك, قازاق-ءۇندى جۇمىسشى توبى 2008 جىلى قۇرىلعان بولاتىن.الداعى جىلى ون جىلدىعىن اتاپ وتكەلى وتىرعان توپتىڭ وڭتۇستىكتەگى ساپارى 2 كۇنگە جوسپارلانىپ وتىر.