اتاجۇرتىنان كەتۋگە ءماجبۇر بولىپ, ونداعان جىلداردان سوڭ اۋعانستاننان تۋعان جەرىنە قايتا ورالعان قانداستارىمىز تۋرالى فيلم ش.ايمانوۆ اتىنداعى «قازاقفيلم» اق «قادام» كينوكومپانياسىنىڭ قاتىسۋىمەن مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن. فيلمدە دۋلىعا اقمولدا, ەسىم سەگىزباەۆ, ەرجان ءتۇسىپوۆ, شىنار اسقاروۆا, بايان قاجىنابيەۆا سياقتى تانىمال اكتەرلەر وينايدى.
بيىل كينوفەستيۆالدىڭ «شىعىس شىرايى» سەكتسياسىنا 12 ەلدەن 15 تولىقمەتراجدى كارتينا ۇسىنىلعان. ايتا كەتەيىك, فادجر كينوفەستيۆالىنىڭ «شىعىس شىرايى» باعدارلاماسىنىڭ قازىلار القاسىنىڭ قۇرامىندا قازاقستاندىق تانىمال رەجيسسەر دارەجان ءومىرباەۆ تا بار.
رەجيسسەر ءسابيت قۇرمانبەكوۆ فيلم جايلى ءوز ويىن بىلدىرە كەلە, كوركەم تۋىندىداعى ورالمان بەينەسى تۋرالى: «بۇل فەستيۆالدەن جەڭىس كۇتپەيمىن. ويتكەنى, ماعان جەڭىس ەمەس, سول جاقتاعى قانداستارىمىزدىڭ وسى ءفيلمدى كورگەنى ماڭىزدى. ءفيلمىم ارقىلى جالپىادامزاتتىق تاقىرىپتى كوتەرگىم كەلدى».
س.قۇرمانبەكوۆتىڭ ايتۋىنشا, كينوتۋىندى حح عاسىردىڭ 30-جىلدارى قىزىل اسكەر جەندەتتەرىنىڭ زورلىق-زومبىلىعىنان قاشىپ, اۋعانستانعا قونىس اۋدارۋعا ءماجبۇر بولعان قازاق وتباسى تۋرالى. باس كەيىپكەر بازارباي قارتتىڭ قىزى مەن ۇلى سول جاقتا دۇنيەگە كەلەدى. بالالارى ەسەيىپ, وتباسىن قۇرادى. ۇلى ساپارقۇل جەرگىلىكتى پۋشتۋن ۇلتىنان كەلىنشەك الادى. ال قىزى اۋعان جىگىتىنە تۇرمىسقا شىعادى. ساپارقۇل سوعىس كەزىندە مودجاحەتتەر جاعىندا سوعىسادى. جىلدار وتەدى. بازاربايدىڭ وتباسى قازاقستانعا كوشۋگە رۇقسات بەرەتىن كۆوتا الادى. بارلىعى جولعا جينالادى. تاۋلى قىشلاقتان شىققان وتباسىنى ۇزاق جول كۇتەدى...
ايگۇل احانبايقىزى,
«ەگەمەن قازاقستان»
الماتى