باسەكەلى بايگە شىمىلدىعىن ورتالىق كەڭەس توراعاسىنىڭ ورىنباسارى, گەنەرال بەكبولات مۇقىشەۆ قۇتتىقتاۋ سوزبەن اشتى.
بۇدان 30 جىل بۇرىن, ياعني 1987 جىلى ءساۋىر ايىندا قازاقستان رەسپۋبليكاسىنىڭ ارداگەرلەر ۇيىمى قۇرىلعان بولاتىن. وسى ۋاقىت ارالىعىندا ارداگەرلەر ۇيىمى حالىقپەن بىرگە, ەلباسىمەن بىرگە تالاي «تار جول تايعاق كەشۋلەر» مەن كوپتەگەن مەرەكەلى-مەرەيلى جارقىن كۇندەردى ارتقا تاستادى. سالتاناتتى مەرەيتويىمىزدى رەسپۋبليكالىق دەڭگەيدە شيرەك عاسىردان استام ۋاقىت ىشىندە ارداگەرلەر ۇيىمىنىڭ اتقارعان ەڭبەگىن قورىتىندىلاپ, ەل الدىندا جانە وزىمىزگە ەسەپ بەرىپ, ەرتەڭگى كۇندەرگە جوسپارلار قۇرۋ ماقساتىندا اتاپ ءوتىپ جاتىرمىز. مەرەكە قارساڭىندا رەسپۋبليكا كولەمىندە ءار وبلىس, ءار اۋدان ورتالىقتارىندا دويبىدان, شاحماتتان, توعىزقۇمالاقتان, بيلياردتان سپورتتىق-مادەني سايىستار وتكىزىپ, قورىتىندىسى رەتىندە استانادا بيلياردتان رەسپۋبليكالىق بىرىنشىلىك ءوتكىزۋدى ءبىراۋىزدان قۇپتاپ, شەشىم قابىلداعان بولاتىنبىز», دەدى ول.
ويىن بارىسىندا, ءبىز تارتىستى باسەكەنىڭ شاشباۋىن كوتەرىپ, جاناشىر بولىپ جۇرگەن ءبىراز كورەرمەندى سوزگە تارتقان ەدىك.
سايىستىڭ ۇيىمداستىرۋشىسى قر ءىىم قۇرمەتتى ارداگەرى, رەسپۋبليكالىق ارداگەرلەر ۇيىمى ورتالىق كەڭەسىنىڭ جاۋاپتى حاتشىسى كوپبولسىن بەكماعانبەتوۆ بىلاي دەدى:
– بۇل سايىس اقساقالدارىمىزدىڭ سالاماتتى ءومىر ءسۇرۋدەگى تاجىريبەسىن جاستارعا ۇلگى-ونەگە رەتىندە ناسيحاتتاۋ مەن قارتتاردى سپورتقا تارتۋ ماقساتىندا ۇيىمداستىرىلىپ وتىر. جارىسقا ماڭعىستاۋ, قىزىلوردا, باتىس قازاقستان وبلىستارىنان كەلۋگە ءتيىستى جەڭىمپاز سپورتشى-ارداگەرلەر كەلە المادى. ورتالىق كەڭەس اتىنان تاريحشى, جازۋشى قويشىعارا سالعارا قوسىلىپ, 14 بيلياردشى دوداعا ءتۇستى.
جەتى جۇپ بايگەگە تۇسكەن جارىس ناتيجەسىندە اقمولا وبلىسىنىڭ بيليارد شەبەرى مارات دوسقوجين (73 جاستا) I دارەجەلى ديپلومنىڭ جانە قوماقتى جۇلدە – ءتۇرلى-ءتۇستى تەلەديداردىڭ يەگەرى اتاندى. سونداي-اق, م. دوسقوجين ءبىر كەزدەسۋدە ەڭ كوپ شار سوققانعا بەلگىلەنگەن جۇلدە – ۋكراين شەبەرلەرىنىڭ قولىنان شىققان, قۇنى 70 مىڭ تەڭگەلىك بيليارد كيىن جەڭىپ الدى. ەكىنشى ورىندى استانالىق بورانباي جارىلقاعانوۆ (70 جاستا) جەڭىپ السا, قولا جۇلدەنى وڭتۇستىك قازاقستاننان كەلگەن ابدۋگاي بەكجانوۆ پەن شىعىس قازاقستان وبلىسىنىڭ جارما اۋدانىنان كەلگەن تولەۋبەك قاسەنوۆ (70 جاس) يەلەندى.
استاناداعى ۇلى وتان سوعىسى مۇگەدەكتەرىنە ارنالعان ورتالىق كلينيكالىق گوسپيتالدىڭ ديرەكتورى ءادىلحان ابدۋلين مەكەمە اتىنان تاعايىنداعان ارنايى جۇلدە – «كورەرمەن كوزايىمى» سىيلىعى الماتىلىق توقتار ەسىموۆكە (70 جاستا) بۇيىردى. ارنايى جۇلدە يەگەرلەرى قاتارىندا جولدى كوكتەمگى قار سۋى شايىپ, اپاتتى جاعداي ورىن الىپ جاتقانىنا قاراماي قاراعاندىدان جەتكەن وڭعار اياپبەرگەنوۆ, الماتىلىق قابيبوللا سەيىتوۆ جانە قوستانايلىق اناتولي كۋدرياۆتسەۆ (72 جاس) سىندى اقساقالدار تانىلدى. ونەگەلى ونەرىمەن كوزگە ءتۇسكەن جامبىلدىق ارداگەر باعدات داۋىلباەۆ, پاراساتتىلىعى جانە مادەنيەتتىلىگىمەن كوزگە تۇسكەن پاۆلودارلىق ەرسايىن شۇعاباەۆ جانە اقتوبەلىك ۆيكتور گوربەنكو جاستارعا بار جاعىنان دا ۇلگى-ونەگە بولارلىق اقساقالدار رەتىندە ماراپاتتالدى.
سالتاناتتى ءراسىم بارىسىندا سايىستىڭ جوعارى دەڭگەيدە وتۋىنە جاناشىرلىق تانىتقان س.مۇقانوۆ, و.اياپبەرگەنوۆ, ق.سەيىتوۆ جانە شقو جارما اۋداندىق كەڭەسىنىڭ ءتوراعاسى نۇرلىبەك ەسبولوۆ سىندى اقساقالدار ورتالىق كەڭەس باسشىلارىنا, ۇيىمداستىرۋ جۇمىستارىنا باس بولىپ جۇرگەن كوپبولسىن بەكماعانبەتوۆكە ءبىراۋىزدان ريزاشىلىقتارىن ءبىلدىرىپ, العىس ايتتى.
تىلەكگۇل ەسداۋلەت
استانا