«قۇرمەتتى باقىتجان ءابدىر ۇلى! بۇگىنگى كۇنى قازاقستاننىڭ بىرنەشە ءوڭىرى سۋ قۇرساۋىندا قالىپ وتىر. رەسمي اقپاراتقا ءسايكەس, ەلىمىزدىڭ ورتالىق جانە سولتۇستىك وڭىرلەرىندە سۋ تاسقىنى 11 ساۋىردەن باستاپ بەلەڭ الدى. اقمولا, اقتوبە, قاراعاندى, قوستاناي, پاۆلودار, سولتۇستىك قازاقستان وبلىستارىنىڭ ءبىرقاتار ەلدى مەكەندەرى مەن جولدارىن كوكتەمگى قارعىن سۋ شايىپ كەتە جازدادى.
كەيبىر وتانداستارىمىز ءۇيىنەن, بار جيعان-تەرگەنىنەن ايىرىلسا, بەس مىڭنان استام ءۇي قوجالىقتارى قۇلاۋ الدىندا تۇر. جەرگىلىكتى اتقارۋشى بيلىك پەن قۇزىرلى مەملەكەتتىك ورگاندار جىل باسىنان باستاپ دەپۋتاتتار الدىندا تاسقىن سۋدىڭ الدىن الۋ شارالارىنا قىرۋار قارجى ءبولۋدى سۇرايدى. الايدا, جىل سايىن وسىنداي جاعداي قايتالانىپ, قاپتاعان قارعىن سۋ ءبىز ءۇشىن ءۇيرەنشىكتى توتەنشە جاعدايعا اينالدى. توتەنشە جاعداي باستالعاننان بەرى اقمولا وبلىسىنا قاراستى اتباسار قالاسىندا 454 ءۇي سۋعا كەتىپ, 1379 ادام كوشىرىلگەن, سولتۇستىك قازاقستان وبلىسىندا 400-دەن استام ءۇي سۋ استىندا قالۋ قاتەرىندە, اقتوبە وبلىسىندا 500-دەن استام تۇرعىن ءۇي سۋ استىندا قالعان.
ال قۇزىرلى مەملەكەتتىك ورگاندار بولسا, وسىنداي جاعداي اقمولا, اقتوبە, قاراعاندى, قوستاناي, جامبىل وبلىستارىنداعى سۋ قويمالارىنا تاسقىن ءجانە ەرىگەن قار سۋى تولاسسىز اعىپ كەلۋىنە بايلانىستى اعىزاتىن سۋدىڭ مولشەرىن ءسال قوسۋ قاجەت بولۋى سەبەبىنەن ەلدى مەكەندەر مەن اۆتوجولداردى سۋ باستى دەپ قولدارىن قۋسىرىپ وتىر. ەندىگى ءبىزدىڭ ساۋالىمىز. نەلىكتەن وسى كۇنگە دەيىن قۇزىرلى ورگانداردىڭ جاۋاپتى قىزمەتكەرلەرى ءوزىنىڭ كاسىبي شەڭبەرىنىڭ تارلىعىن تابيعي كاتاكليزمدەرىمەن جاسىرىپ كەلەدى؟ ولاردىڭ جاۋاپ بەرەتىن كۇنى كەلە مە؟
ادىلەتتىك ءۇشىن اتاپ كەتۋىمىز دە كەرەك, بۇگىنگى تاڭدا توتەنشە جاعدايلار كوميتەتىنىڭ ازاماتتارى ءوز بورىشىن ادال ورىنداپ كەلەدى. بىراق زارداپ شەككەن تۇرعىنداردىڭ ميلليونداعان شىعىنىن كىم وتەيدى؟ ەل امان, جۇرت تىنىشتا مۇنداي جاعدايعا جەرگىلىكتى بيلىكتەگى ازاماتتار قالاي جول بەرگەن؟
سوندىقتان, وتانداستارىمىزدى تولعاندىراتىن ەكى ماسەلە تۋىنداپ وتىر. بىرىنشىدەن, قيىن جاعدايعا دۋشار بولعان جەرلەستەرىمىزگە ۇكىمەت تاراپىنان قانداي جاردەم كورسەتىلەدى؟ ەكىنشىدەن, مۇنداي جاعداي قايتا ورىن الماس ءۇشىن ۇكىمەت قانداي شارالار قولعا الماقشى؟
قۇرمەتتى باقىتجان ءابدىر ۇلى, جوعارىدا باياندالعاندى ءجانە قوزعالعان ماسەلەلەردىڭ ماڭىزدىلىعىن ەسكەرە وتىرىپ, وسى ساۋال بويىنشا ءتيىستى شارالار قابىلداۋىڭىزدى سۇرايمىز».