استانانىڭ م.گوركي اتىنداعى مەملەكەتتىك ورىس دراما تەاترىندا ليتۆالىق رەجيسسەر اگنيۋس يانكياۆيچيۋستىڭ جەتەكشىلىگىمەن «اننا كارەنينا» ساحنالاندى. درامالىق مونتاجدا رەجيسسەردىڭ وبرازدىق شەشىمدى ويلاستىرۋدا ازاماتتىق كوزقاراسى الدىڭعى ورىنعا شىققان.
«بارلىق باقىتتى وتباسىلار ءبىر-بىرىنە ۇقسايدى. ال, باقىتسىزدارىنىڭ تاريحى ارقيلى» دەپ باستالاتىن سويلەم روماننىڭ بۇكىل جۇگىن ارقالاپ تۇرعانداي. ەكسپوزيتسياداعى ەكەۋدىڭ ايتىسى سپەكتاكلدىڭ اتموسفەراسىن بىردەن اڭعارتادى. كەيىپكەرلەر اراسىنداعى قارىم-قاتىناس, وقيعا وزگەرىسى جۇبايلىق ۇرىس-كەرىس بارىسىندا ايگىلەنە تۇسەدى. رەجيسسەر ا.يانكياۆيچيۋس: «2013 جىلى م.گوركي تەاترىنىڭ باسشىلىعى وسى تاقىرىپتى ساحنالاۋعا ۇسىنىس ايتقاندا, كەلىسپەگەن ەدىم. بيىل ەكىجاقتى كەلىسىمشارت نەگىزىندە زاماناۋي وزگە شىعارمالارىمدى بەرىپ ەدىم, ءارتۇرلى ەتيكالىق كوزقاراس تۇرعىسىنان قابىلدانبادى. ەسەسىنە «اننا كارەنينانى» تاعى ۇسىندى. العاشقىدا نە ىستەۋگە بولادى دەپ ويلادىم. سەبەبى بۇل تاقىرىپتى ساحنالاماق تۇگىلى, قويىپ كورسەم دەگەن ماقساتىم دا بولماعان ەدى. ويتكەنى رومان – وتە ادەبي, تەاتر جانرىنا بەيىمدەلە قويمايتىن كۇردەلى شىعارما. دەگەنمەن كەيدە اۆانتيۋرانى ۇناتاتىنىم بار, ۇسىنىستى وسى سەبەپتى قابىلدادىم»,– دەيدى.
تۇرمىستاعى سىلقىم ايەل اننا كارەنينانىڭ بەكەتتە جاس وفيتسەر ۆرونسكيمەن كەزدەيسوق ۇشىراسۋىنىڭ سوڭى نەمەن تىنارىن سول كەزدە ەشكىم بىلمەگەن-تۇعىن. قويىلىمنان جالىنداعان ماحاببات جولىنداعى كۇرەس پەن جانپيدالىق ىزدەسەڭىز, جاڭىلىسقان بولار ەدىڭىز. جانۇشىرا باقىت ىزدەگەن باقىتسىز ايەلدىڭ جاندالباسالاۋى لاتۆيالىق رەجيسسەردىڭ كوركەم شىعارما تابيعاتىن وزگە قىرىنان تانىتقان پوەتيكالىق شەشىمى دەپ ايتار ەدىك.
– ءوز جۇمىسىم تۋرالى ايتا قويۋعا بەيىلدى ەمەسپىن. ادەتتە اننا كارەنينا تۋرالى ايقاندا ماحاببات تاريحى, ليريكا, سەزىم تۋرالى ءسوز قوزعاپ جاتادى. قۇداي ساقتاسىن, بىراق مەن بۇل شىعارمانىڭ بويىنان مۇنداي ەشتەڭە كورىپ تۇرعانىم جوق, – دەيدى رەجيسسەر.
سپەكتاكلدىڭ كوركەمدىك, يدەيالىق مازمۇنىن اشۋدا اننا كارەنينا, جۇبايى الەكسەي كارەنين مەن كوڭىلدەسى الەكسەي ۆرونسكي ۇشتىگىنىڭ ماڭىزى زور. ءاجىمدى جۇزىنە قاسىرەت ءىزى ۇيالاعان الەكساندر رولىندەگى رومان چەحونادسكي ساحنانى ارپالىس مايدانىنا اينالدىرا الدى. ساحنالىق بەينەنىڭ جان-دۇنيەسىن ءتۇسىنىپ, پسيحوفيزيكاسىن سەزىنە بىلگەن ەكىنشى جان بولسا, ول – سۆەتلانا فورتۋنا (اننا كارەنينا). كوز جاسىمەن دە, شات كۇلكىسىمەن دە كورەرمەن ويىنا قوزعاۋ سالا بىلگەن اكتريسانىڭ سۋرەتكەرلىك تۇلعالىعى ايشىقتالا تۇسكەندەي.
ىشكى ساراي جانە شىناي زاۋىقپەن ويناپ شىققان جۇلدىزدى اكتەر ترۋپپاسىندا بۇلاردان بولەك ماكسيم ياششەنكو (الەكسەي ۆرونسكي), الەكساندر كورجەنكو (ستيۆا وبلونسكي), نينا دروبوتوۆا (ليديا يۆانوۆنا), سەرگەي ماشتاكوۆ, وكسانا بويكو مەن سانجار راحيموۆ بار.
وقيعا باستان-اياق اننانىڭ جاتىن بولمەسىندەگى قوس توسەك ماڭايىندا ءوربيدى. كۇڭگىرت ساحناداعى كەۋدەلەرى كەك پەن ىزاعا, وكپە مەن رەنىشكە تولى كەيىپكەرلەردىڭ القىنىسى بىرسارىندىلىعىمەن سپەكتاكلدىڭ تەمپوريتمىن ءتۇسىرىپ جىبەرگەندەي.
قويىلىم تۋرالى قانداي دا ءبىر ساۋەگەيلىك تانىتۋدان اۋلاقپىز, تەك جازۋشىنىڭ شىعارماشىلىعىن قادىر تۇتاتىن, رۋحاني «ءپىر» سانايتىن وقىرمان قاۋىم بەي-جاي قالماسا كەرەك.
ايا ءومىرتاي,
«ەگەمەن قازاقستان»