كينوستسەناري م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ساحنالانعان "جاۋجۇرەك" پەساسىنىڭ جەلىسى بويىنشا جازىلعان.
قازىرگى تاڭدا ءتۇسىرىلىم توبى تولىقتاي جاساقتالعان. دايىندىق كەزەڭىندە تۇرعان ءتۇسىرىلىم فيلمگە قاجەتتى كيىمدەردى تىگىپ, رەكۆيزيتتەر ازىرلەپ, دەكوراتسيالار تۇرعىزىپ جاتىر. ءفيلمنىڭ تۇسىرىلىمدەرى الماتى وبلىسى جانە سولتۇستىك قازاقستان وبلىسىندا وتەدى.
ءفيلمنىڭ رەجيسسەرى نۇرگەلدى سادىعۇلوۆ. ونىڭ ايتۋىنشا بۇل جوبانى جۇزەگە اسىرۋدى كوپتەن بەرى ارمانداعان. "مەن بالۋان شولاق تۇلعاسىنا 1998 جىلى ت.جۇرگەنوۆ اتىنداعى ونەر اكادەمياسىندا وقىپ جۇرگەنىمدە قاتتى قىزىقتىم. سول كەزدەن باستاپ وسى كىسى جايلى فيلم تۇسىرگىم كەلدى. بالۋان شولاقتىڭ بويىندا اقىندىق, سەرىلىك, انشىلىك جانە الىپ قارا كۇش تە بار. ونىڭ ەلىنە, جەرىنە, وتانعا دەگەن ماحابباتى ارقايسىمىزعا ۇلگى بولارلىق. مەنىڭ ويىمشا بۇگىنگىنىڭ جاستارى بالۋان شولاقتاي ەردى ءبىلۋى ءتيىس", - دەدى ءفيلمنىڭ رەجيسسەرى نۇرگەلدى سادىعۇلوۆ.
ءفيلمنىڭ ستسەناريى بىرنەشە جىل بويى جازىلعان جانە قايتا وڭدەلگەن. ءتۇسىرىلىم توبى ءفيلمنىڭ ساپالى شىعۋى ماقساتىندا كەڭەسشىلەردى تارتقان. ولاردىڭ قاتارىندا: كوركەمدىك جەتەكشىسى س.نارىمبەتوۆ, كوركەمدىك كەڭەسشىلەرى ە.تولەۋتاي, ب.ىستىباەۆ, ب.بەدەلحاندار بار.
فيلمگە تانىمال اكتەرلەرمەن قاتار ەكرانعا العاش شىعىپ جاتقان اكتەرلەر دە تۇسەتىن بولادى. ءفيلمنىڭ رەجيسسەرى ازىرگە فيلمگە تۇسەتىن اكتەرلەردىڭ ەسىمدەرىن اتاۋدان باس تارتىپ, قىسقا قايىردى: "اكتەرلەر ىرىكتەلدى. الايدا باس كەيىپكەردى ءازىر ايتا المايمىن. سەبەبى ەكى اكتەردىڭ اراسىندا تاڭداۋ ۇستىندەمىن".