قىمباتتى نۇرسۇلتان ءابىش ۇلى!
كەشە عانا جاريالانعان ءسىزدىڭ «بولاشاققا باعدار: رۋحاني جاڭعىرۋ» اتتى تاقىرىپپەن جاريالاعان ماقالاڭىزبەن تانىسىپ, الماتى قالاسىنىڭ زيالى قاۋىمىنىڭ ءبىر توبى بۇگىن ارنايى باس قوستىق. ءبىز مۇنى ماقالا ەمەس, باعدارلامالىق ماڭىزدى قۇجات رەتىندە قابىلداپ وتىرمىز. كوپتەن بەرى اڭساپ جۇرگەن ارماندارىمىز, ەلىمىزدىڭ ىشكى قاجەتتىلىگىنە اينالعان جاڭا قادامدار جان-جاقتى ءارى سەرپىلىس تۋعىزىپ, شىن مانىندە بارشامىزدى قۋانىشقا بولەدى.
قۇجاتتىڭ باستى ەرەكشەلىگى – مۇندا قازاق دەگەن حالىقتى ماڭگىلىك تاۋەلسىز مەملەكەتكە اينالدىرۋدىڭ ناقتى باعىتتارى, سول جولداعى ماقسات-مىندەتتەرى اتاپ كورسەتىلىپتى. باعداردىڭ ءون بويىنان ەلدى العا تالپىندىرۋ, جىگەرلەندىرۋ, قايراۋ, جەتىلدىرۋ نيەتى ايقىن اڭعارىلادى. تاريحي تاجىريبە مەن ۇلتتىق داستۇرلەرىمىزدى كوزدىڭ قاراشىعىنداي ساقتاي وتىرىپ, باسقا ەلدەردىڭ دە وزىق ۇلگىسىن قابىلداي ءبىلۋ – تابىستىڭ كىلتى ەكەنى قاراپايىم تىلمەن, قامقور نيەتپەن تاماشا تۇسىندىرىلگەن. ءبىر سوزبەن ايتقاندا, كەيبىر كەرتارتپا ادەتتەردەن ارىلىپ, حالقىمىزدىڭ سان عاسىرلاردان بەرى جيناقتالىپ, جۇيەلەنگەن سالت-ساناسىن, ءمانىن جويمايتىن اسا قۇندى قاسيەتتەرى مەن ءداستۇرىن ساقتاي وتىرىپ دامۋعا, ۇلتتىق موديفيكاتسيادان وتۋگە ۇندەيدى.
تۇتاس العاندا, ەلىمىزدى كەزەكتى بيىك بەلەسكە باستاپ وتىرعان ءسىز, نۇرسۇلتان ءابىش ۇلى, حالىققا ويان, سەرپىل, شىڭدالا ءتۇس, قايراتتان دەپ, حالقىڭىزدىڭ ساناسىن, مىنەزىن وزگەرتۋگە, قايىرلى نارسەلەرگە ۇمتىلۋعا شاقىرىپ وتىرسىز. «سەنىڭ مىنەزىڭ – سەنىڭ تاعدىرىڭ» دەيتىن دانالىق ءسوز راس بولسا, بۇل باعدار, ءسوز جوق, قازاق حالقىنىڭ باقىتىن باياندى ەتۋگە ىقپالىن تيگىزەرى داۋسىز.
باعداردا سانانى جاڭعىرتۋعا بايلانىستى بىرنەشە ناقتى مىندەتتەر قويىلعان. لاتىن الىپبيىنە كوشۋ, زامان تالابىنان قالماي, اعىلشىن ءتىلىن ۇيرەنۋ, كۇنكورىس ءۇشىن ەكونوميكالىق جاعدايلار قالىپتاستىرىپ وتىرعان جاڭا كاسىپتەردى يگەرۋ, ءبىلىم ساپاسىن ارتتىرۋ ءۇشىن الەمنىڭ ۇزدىك 100 وقۋلىعىن قازاق تىلىنە اۋدارىپ, جاستارىمىزعا ۇسىنۋ سياقتى ءماندى دە ماڭىزدى ماقساتتار العا تارتىلىپتى. سونىمەن قاتار, «تۋعان جەر», «تۋعان ەل» باعدارلامالارىن قۇرۋ جايلى يدەيا, ءاربىر اۋىل-ايماقتى قادىرلەپ-قاستەرلەۋگە شاقىرۋ, ەلىمىزدىڭ قاسيەتتى جەرلەرىنىڭ مادەني-گەوگرافيالىق بەلدەۋىن قۇرۋ, مادەني قازىنالارىمىزدى الەم جۇرتشىلىعىنىڭ نازارىنا ۇسىنۋدىڭ جاڭا تاسىلدەرىن قاراستىرۋ باستاماسى ءبىزدى قاناتتاندىردى. وتانداستارىمىزدىڭ, جاستاردىڭ پاتريوتتىق سەزىمىن قالىپتاستىراتىن مۇنداي شارالاردىڭ, سونداي-اق, باعداردا كوتەرىلگەن وزەكتى ماسەلەلەردىڭ بارشاسىنىڭ ءىس جۇزىنە اسۋىنا ءبىز, اعا بۋىن وكىلدەرى, بارىنشا كۇش سالۋعا دايىن ەكەنىمىزدى وزىڭىزگە جەتكىزەمىز.
الماتى قالاسىنىڭ زيالى قاۋىم وكىلدەرى اتىنان:
ءاسانالى ءاشىموۆ, ومىرزاق ايتباەۆ, ءسابيت ورازباەۆ, بەكسۇلتان نۇرجەكەەۆ, ەسمۇقان وباەۆ, دانداي ىسقاقوۆ, دوس كوشىم, تالعات ماماشەۆ, كادىربەك سەگىزباەۆ, ءسۇلتانالى بالعاباەۆ, ەردەن قاجىبەك, سماعۇل ەلۋباەۆ, ەسەنعالي راۋشانوۆ, ابدەش تولەۋباەۆ, ومىربەك بايتۇرسىنوۆ, مارات توقاشباەۆ, اشىربەك كوپىشەۆ, جاناربەك ءاشىمجان, الىبەك اسقاروۆ جانە باسقالار (بارلىعى 71 ادام).
الماتى قالاسى, «دوستىق» ءۇيى,
2017 جىلعى 13 ءساۋىر