ساراپشىلار بۇل جاڭالىقتى ەلدىڭ باعىت-باعدارىنىڭ وركەنيەتتى تۇردە وزگەرۋى دەپ باعالاۋدا. دەگەنمەن, بۇل ساياسي تۇرعىدا استانا رەسەيگە ارقاسىن بەرەدى دەگەندى بىلدىرمەيدى.
ماقالادا مەملەكەت باسشىسى ۇكىمەتكە لاتىن ءالىپبيىن قولدانۋ بويىنشا ازىرلىك جۇمىستارىن باستاۋدى تاپسىردى. «ەگەمەن قازاقستان» گازەتىندە نۇرسۇلتان نازارباەۆ اعىمداعى جىلدىڭ سوڭىنا دەيىن جاڭا قازاق ءالىپبيى مەن جازۋ نورمالارى جاسالاتىنىن, ال 2025 جىلعا قاراي ەل تولىقتاي لاتىن الىپبيىنە كوشەتىنىن مالىمدەدى. مەملەكەت باسشىسى كيريلليتسا 1940 جىلى ساياسي كوزقاراستار بويىنشا ەنگىزىلگەنىن, وعان دەيىن قازاقتار اراب ءالىپبيىن پايدالانعانىن ەسكە سالدى. پرەزيدەنتتىڭ پايىمداۋىنشا, جاڭا الىپبيگە ءوتۋ قيىندىق تۋعىزباۋعا ءتيىس, سەبەبى, قازىرگى جاس بۋىن اعىلشىن ءتىلىن مەكتەپ قابىرعاسىنان باستاپ وقيدى, ولارعا لاتىن ءالىپبيىن قابىلداۋ قيىنعا سوقپايدى.
ۇسىنىلىپ وتىرعان جاڭاشىلدىق تەحنيكالىق ماماندىقتاردى اعىلشىن ءتىلىندە وقۋدى جەڭىلدەتىپ, تەحنولوگيالىق جاڭارۋ باعدارلاماسىن جۇزەگە اسىرۋعا ىقپال ەتەدى, كوپتەگەن پاندەردى باستاۋىش سىنىپتان باستاپ, شەكسپيردىڭ تىلىندە وتۋگە ءمۇمكىندىك بەرەدى. بۇگىنگى تاڭدا تۇركياداعى, سونداي-اق باتىس ەۋروپاداعى دياسپورالار لاتىن ءالىپبيىنىڭ قازاقشا نۇسقاسىن قولداناتىنىن ايتا كەتۋ كەرەك. لاتىن ءالىپبيىن ەنگىزۋ ماسەلەسى قازاقستاندا 2007 جىلدان بەرى تالقىلانىپ كەلەدى, الايدا كۇنى بۇگىنگە دەيىن وعان قاتىستى شەشىم شىقپاعان ەدى.
لاتىندى پايدالانۋ ارقىلى استانا باتىس ەلدەرىنە بەت بۇرادى, تۇركياعا بۇرىنعىدان دا جاقىنداسا تۇسەدى. وعان تاڭعالۋدىڭ ءجونى جوق, سەبەبى, ءتىلى مەن ءمادەنيەتى جاعىنان قازاقستان سلاۆيان الەمىنەن گورى تۇركى الەمىنە جاقىن. بۇل ورايدا, كەڭەس وداعى ىدىراعاننان كەيىنگى ارالىقتا ازەربايجان, تۇرىكمەنستان جانە ءوزبەكستان سياقتى, قازاقستان دا ءوزىنىڭ گەوساياسي باسىمدىقتارىنا قاراي جاڭا وركەنيەت كوپىرلەرىن سالۋدا.
ءتىل مەن مادەنيەت سالاسىنا قاتىستى مۇنداي وزگەرىستەردىڭ وزىندىك باعاسى بولاتىنى بەلگىلى. ساراپشىلاردىڭ پايىمداۋىنشا, بۇل سالاداعى ماسەلەلەردى شەشۋدە تۇراقتىلىققا تالپىنىس باستى تەتىك بولۋعا ءتيىس.