شەشۋشى باسەكەدە ديماش شاڭ ۆەنجەمەن بىرگە مايكل دجەكسوننىڭ «The Way You Make Me Feel», «Erth song» جانە «Billie Jean» اندەرىن شىرقادى. سونداي-اق, كورەرمەندەر ديماشتىڭ بارابان اسپابىنداعى ونەرىنە ءتانتى بولدى.
اقتىق باسەكەدە توعىز جۇپ ونەر كورسەتتى. دۋ ليشا (Teresa Carpio) جانە پەن دجياحۋەي جارتىلاي فينالدا سوڭعى ورىندا بولعاندىعى سەبەپتى ءبىر جۇپ بولىپ ونەر كورسەتىپ, قالعان سەگىز جۇپپەن باسەكەگە تۇسپەيتىن بولدى.
ايتا كەتەيىك, «Singer 2017» رەاليتي-شوۋى كورەيا رەسپۋبليكاسى MBC تەلەارناسى «I am singer» انشىلەر جارىسى رەاليتي-شوۋىنىڭ قىتايلىق نۇسقاسى. ءان بايقاۋى قىتايدىڭ حۋنان تەلەارناسىنان 2013 جىلدان باستاپ ەفيردە كورسەتىلە باستادى. جوباعا قىتاي ەستراداسىنىڭ جارىق جۇلدىزدارى, سونداي-اق كورەيا, ماكاو, گونكونگ, سينگاپۋردان قىتايعا اتى ءمالىم انشىلەر شاقىرىلاتىندىقتان, تەلەجوبا ەلدە ەرەكشە تانىمال.
«I am singer» تەلە-شوۋىنىڭ بەسىنشى ماۋسىمى 2017 جىلى قىتاي ۇكىمەتىنىڭ كورەي ويىن-ساۋىق مادەنيەتىنە شەكتەۋ قويۋىنىڭ سالدارىنان «Singer 2017» بولىپ وزگەرتىلىپ, مازمۇنى جانە بايقاۋ شارتتارى جاڭارتىلدى.
ديماش بايقاۋداعى ەڭ العاشقى قىتاي مادەنيەتىنە جاقىن ەمەس ۇلت وكىلى. ايتسە دە, ديماشتىڭ ەرەكشە تالانتى بۇل جوبا ارقىلى كۇللى الەمگە تانىلدى. وتانداسىمىز بايقاۋدىڭ ون كەزەڭنەن تۇراتىن ىرىكتەۋ باسەكەسىندە ءۇش رەت ءبىرىنشى ورىن الدى.