زامانىمىزدىڭ زاڭعار سكريپكاشىلارى ۆيكتور ترەتياكوۆ, ەدۋارد گراچ, زاحار برون اقبيكە العيدىڭ كاسىبي شەبەرلىگىنە وتە جوعارى باعا بەرە كەلىپ, جاس سكريپكاشىنىڭ وزىنە ءتان تەحنيكاسىن, مۋزىكانى ەرەكشە قابىلەتپەن سەزىنۋىن, ءار شىعارمانىڭ ءمانىن فيلوسوفيالىق تۇرعىدا تەرەڭ ءتۇسىنۋىن ومىردە كوپ تاجىريبە جيناقتاعان كانىگى ماماندار عانا قول جەتكىزە الاتىن جەڭىسكە بالادى.
ءبىر عاجابى, اقبيكە العي دا مۋزىكانتتار وتباسىندا دۇنيەگە كەلگەن. سكريپكادا ويناۋدى بەس جاسىندا ۇيرەنگەن. قازىرگى تاڭدا قازاقستاننىڭ ەڭبەك سىڭىرگەن قايراتكەرى رايسا مۇساقوجاەۆانىڭ شاكىرتى.
ەلىمىزدىڭ جانە شەت ەلدىڭ بەلگىلى ونەر الاڭدارىندا تالانتىنا تالايدى ءتانتى ەتكەن اقبيكەنىڭ ءوزىن اڭگىمەگە تارتقانىمىزدا:
– كامەرالىق زالدىڭ ساحناسىندا مەن العاش رەت ونەر كورسەتكەلى وتىرمىن. سوندىقتان, ازداپ قوبالجۋ بار, بىراق كورەرمەنمەن جۇزدەسەتىن ساتكە اسىعۋلىمىن. «استانا وپەرا» تەاترى ساحناسىنا شىعۋ كوپ ادامعا ارمان. سوعان قول جەتكىزگەنىمە قۋانامىن. تىڭدارماننىڭ ي.س.باح, ۆ.ا.موتسارت, ك.دەبيۋسسي سىندى تانىمال كومپوزيتورلاردىڭ ايگىلى شىعارمالارىمەن قاۋىشقانىن قالايمىن. مۋزىكا – جان-جۇرەگىڭنىڭ كۇيى عانا ەمەس, بۇل – مەنىڭ ءومىرىمنىڭ ءمانى. مەنىڭ باستى ماقساتىم – ناعىز مۋزىكانت بولۋ, – دەدى.
ونىڭ ايتۋىنا قاراعاندا, كەش باعدارلاماسىنا ن.پاگانينيدىڭ, ي.س.باحتىڭ, ۆ.ا.موتسارتتىڭ, پ.ي.چايكوۆسكيدىڭ, ف.مەندەلسوننىڭ ەڭ ۇزدىك سكريپكالىق تۋىندىلارى كەزدەيسوق تاڭدالماعان ەكەن. ويتكەنى, سكريپكاشىنىڭ شەبەرلىگى, كاسىبي دەڭگەيى كوبىنە ولاردىڭ شىعارمالارى ارقىلى ايقىندالىپ جاتادى. وسىلايشا, تىڭدارمان نازارىنا ي.س.باحتىڭ №1 جەكە سكريپكاعا ارنالعان سوناتاسى, ي.فرولوۆتىڭ عاجايىپ تۋىندىسى, گ.گەرشۆيننىڭ «پورگي مەن بەسس» وپەراسىنان الىنعان تاقىرىپتاردىڭ كونتسەرتتىك فانتازياسى, ف.كرەيسلەردىڭ جەكە سكريپكاعا ارنالعان رەچيتاتيۆ جانە سكەرتسو-كاپريس تۋىندىسى جانە مۇنان باسقا دا بىرقاتار دۇنيەلەر ۇسىنىلماق.
اقبيكە العيدىڭ الداعى كۇندەرگە قۇرعان جوسپارلارى وتە كوپ. سونىڭ ءبىرى – ول جازدا جاسوسپىرىمدەردىڭ حالىقارالىق پ.ي.چايكوۆسكي اتىنداعى بايقاۋىنا قاتىسپاق, ەسكە سالا كەتەتىن جايت, بۇعان دەيىن ونەر يەسى وسى سايىستىڭ, رەسەيدە وتكەن جاسوسپىرىمدەردىڭ حالىقارالىق پ.ي.چايكوۆسكي اتىنداعى VIII بايقاۋىنىڭ ديپلومانتى اتانعان بولاتىن. سوندىقتان, ماۋسىمدا ەلوردادا ءوتۋى جوسپارلانعان ح حالىقارالىق چايكوۆسكي اتىنداعى كونكۋرسقا قاتىسۋ تالانتتى قىزىمىزدى ونەردىڭ تاعى ءبىر تاۋداي بيىگىنەن تانىتادى دەپ سەنەمىز. فورتەپيانو, سكريپكا جانە ۆيولونچەل ماماندىعى بويىنشا وتەتىن چايكوۆسكي اتىنداعى سايىس – قاناتى جاڭادان قاتايىپ كەلە جاتقان ورەندەر ءۇشىن ەڭ جوعارى جەتىستىك بولىپ سانالادى. ويتكەنى, بۇل حالىقارالىق شارا بولعاندىقتان, ءارتۇرلى مەملەكەتتەردە ءوتۋى شارت. قاتىسۋشىلار سانىمەن, جوعارى كاسىبي دەڭگەيىمەن, ورىنداۋشىلىق شەبەرلىگىمەن, كۇردەلى باعدارلامالارعا قۇرىلۋىمەن, حالىقارالىق دارەجەدەگى تانىمال تۇلعالاردىڭ ساراپشىلىق ەتۋىمەن ەرەكشەلەنەتىن ونەر بايگەسىنە قاتىسۋ, جەڭىمپاز اتانۋ – جاستارعا ارمان. بيىل دا قازىلار القاسى قۇرامىنا قازاقستان, رەسەي, اقش, جاپونيا, كورەي, قىتاي, فرانتسيا جانە شۆەيتساريانىڭ ەڭ اتاقتى مۋزىكانتتارى ەنىپ وتىر.
كونكۋرستىڭ ءبىرىنشى جانە ەكىنشى كەزەڭدەرى قازاق ۇلتتىق ونەر ۋنيۆەرسيتەتىندە, ءۇشىنشىسى «استانا وپەرا» تەاترىندا وتەدى دەپ كۇتىلۋدە. «ەكسپو-2017» كورمەسىنىڭ ەڭ ايتۋلى مادەني جوباسى رەتىندە باعالانعان حالىقارالىق كونكۋرستىڭ بارىنەن بۇرىن بىزگە قىمبات بولاتىن سەبەبى, مۇندا قازاقتىڭ سكريپكاشى قىزى ونەر كورسەتەدى.
قارشىعا كۇلەن