كونفەرەنتسيانىڭ كۇن ءتارتىبىنە پارتيانىڭ وبلىستىق فيليالىنىڭ توراعاسىن سايلاۋ جانە ەلباسىنىڭ «ەگەمەن قازاقستان» گازەتىندە جاريالانعان «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن تالقىلاپ, قولداۋ تۋرالى ماسەلەلەر ەنگىزىلدى. كۇن ءتارتىبىندەگى ءبىرىنشى ماسەلە بويىنشا دەلەگاتتاردىڭ ءبىراۋىزدان داۋىس بەرۋىمەن وبلىس اكىمى مالىك مىرزالين «نۇر وتان» پارتياسى اقمولا وبلىستىق فيليالىنىڭ توراعاسى بولىپ سايلاندى.
بۇدان كەيىن مالىك مىرزالين قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنا كەڭىنەن توقتالىپ, ونىڭ مازمۇنى, وزەكتىلىگى مەن تاريحي ءمان-ماڭىزى تۋرالى جان-جاقتى ءسوز سويلەدى.
– بۇل ماقالادا قاراستىرىلعان باسەكەگە قابىلەتتىلىك ماسەلەسى وتە ورىندى جانە كوكەيكەستى بولىپ تابىلادى. وسى ورايدا, مەملەكەت باسشىسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەل حالقىنا ارناعان بيىلعى جولداۋىندا الەمنىڭ وزىق وتىز ەلىنىڭ قاتارىنا قوسىلۋ مىندەتىن قويعانى بەلگىلى. ماقالادا قوزعالعان كەلەلى ماسەلەلەر مەن ىرگەلى مىندەتتەردى وسى جاڭعىرۋىمىزدىڭ جولىنداعى باستى باعىت-باعدار دەپ تۇسىنگەن ءجون. لاتىن الىپبيىنە كوشۋ – زامان تالابى. ارينە, ول ءۇشىن ەڭ الدىمەن, بولاشاق ۇرپاقتى وسى الىپبيمەن وقىتاتىن مامانداردى دايارلاپ الۋىمىز كەرەك. بۇگىنگى جاس ۇرپاق العىر دا ىنتالى بولىپ ءوسىپ كەلەدى. قازىر بالاباقشالاردىڭ وزىندە بۇلدىرشىندەر ءۇش ءتىلدى ۇيرەنىپ جاتىر. سوندىقتان, بىزگە لاتىن ءالىپبيىن مەڭگەرۋ قيىنعا سوقپايدى. وسىنىڭ ناتيجەسىندە ينتەرنەت جەلىلەرىندەگى باسقا ەلدەردىڭ باعدارلامالارى مەن جاڭالىقتارىن وقىپ, ءوز قاجەتىمىزگە ەركىن پايدالانا الاتىن بولامىز. وسىلاي وزگە وزىق ەلدەرمەن يىق تىرەستىرۋگە مۇمكىنشىلىگىمىز ارتا تۇسەدى, – دەدى ايماق باسشىسى ءوز سوزىندە.
سونداي-اق, كونفەرەنتسيادا «نۇر وتان» پارتياسىنىڭ جاقسى اۋداندىق فيليالى توراعاسىنىڭ ءبىرىنشى ورىنباسارى كاميلا مۇعالوۆا, اقمولا وبلىسى بويىنشا «ازاماتتىق اليانسى قاۋىمداستىعى» بىرلەستىگىنىڭ ءتورايىمى يرينا تەرەنتەۆا, وبلىستىق «ارقا اجارى» گازەتىنىڭ باس رەداكتورى قايىرباي تورەعوجا ءسوز سويلەپ, ەلباسىنىڭ باعدارلامالىق ماقالاسىنا بايلانىستى ءوز وي-پىكىرلەرىن ءبىلدىردى.
ىرىسالدى شامشيەۆا
اقمولا وبلىسى