ءدال قازىر جۇمىر جەردە سايىن اعا جوق دەگەنگە سەنە الار ەمەسپىن, سەنبەيمىن دە! ءبىر ادام ماڭگىلىك جاساسا, وسى سايىن اعا جاسايتىن شىعار دەپ جۇرەتىنبىز, مەن باستاعان شاكىرتتەرى – بەيسەن, امانگەلدى, نۇرعازى, الىبەك, تاعى باسقا تولىپ جاتقان ۇل-قىزدار...
كىسىلىگى قانداي ەدى سايىن اعانىڭ؟! ۇلكەنگە كىشى, كىشىگە ودان دا كىشى بولا الۋى تۇتاس ءبىر مەكتەپ ەدى-اۋ. «قاراپايىمدىلىقتىڭ اكادەميگى» دەۋىم سايىن اعانىڭ سول ۇلى قاسيەتىنە بەرگەن باعام ەدى. جان شۋاعى قانداي قۋاتتى, قانداي مول ەدى! الدىنا بارعان جانعا توككەن مەيىرىمىنەن كوز تۇگىل وي جەتپەيتىن سوناۋ الىستاعى سولتۇستىك مۇزدى مۇحيتتىڭ مۇزدارى ەرىپ جاتۋشى ەدى-اۋ؟!
سپورت جۋرناليستيكاسىنداعى ءومىرى تۇتاس ءبىر وقۋلىق ەدى. سوناۋ 1959 جىلى قازاق ەلىنىڭ تاريحىندا اشىلعان تۇڭعىش «سپورت» گازەتىنىڭ العاشقى سانىن ءوز قولىمەن شىعارىپ, الاقانىندا ۇستاپ تۇردى, دەگەننەن ارتىق قانداي تاريحي ادام بولۋى كەرەك ءبىزدىڭ قوعامعا؟! جانە سول گازەتتەن ەش جاققا تابان اۋدارماي 50 جىلداي (!) قىزمەت ىستەۋىنىڭ ءوزى ەرلىك ەمەي نەمەنە؟! جانە سپورتتى ءبىلۋى, ءتۇسىنۋى, سەزىنۋى, تالداۋى, قورىتىندىلاۋى عاجاپ ەدى عوي. ءوز باسىم 15 جىل بىرگە قىزمەت ىستەگەندە سايىن اعادان سۇراپ العان اقپاراتتارىم اتان تۇيەگە جۇك بولار ەدى بۇگىن. الدىمىزدان تالاي جاس جۋرناليستەر ءوتتى, سولاردىڭ سپورتتىڭ ءبىر قۇپياسىن سۇراپ الۋ ءۇشىن سايىن اعانىڭ الدىنا بارىپ كەزەكتە تۇرعانىن تالاي كوردىم. جانە سۇراعىنا جاۋاپ الماعان بىرەۋى بولعان ەمەس – سايىن اعا ەشكىمنىڭ شەلەگىن بوس قايتارمايتىن. سپورت جۋرناليستيكاسىنداعى عاجاپ ومىربايانىمەن اتاقتى سپورت جازۋشىسى سەيداحمەت بەردىقۇلوۆتىڭ «مۇڭايىپ ويانعان قالا» پوۆەسىنە «ۇزىنتۇرا سايىن» دەگەن اتپەن كەيىپكەر بولعان بۇل جاننىڭ ەسىمى قازاق سپورت جۋرناليستيكاسىندا ماڭگى وشپەستەي بوپ قالعانىنا ەشكىمنىڭ داۋى جوق.
بويى ەكى مەترگە تاياۋ, اق ءجۇزدى, سۇلۋ ءمۇسىندى, سپورت جارىسى بولعان جەردىڭ كورولى سايىن اعا جاس كەزىندە تالاي سۇلۋلاردى تەلمىرتكەن-اق شىعار. ءوزى جاقسى قارتايدى. ولە-ولگەنشە تۇتاس پلانەتاعا جىلۋ بەرەردەي مەيىرىمدى كۇلكىسىنەن ايىرىلعان جوق. «مەنىڭ نەسىپجانىم», «مەنىڭ بەيسەنجانىم», «مەنىڭ امانجانىم» دەگەن كەزدە جانىندا تۇرساق تا, الىستا جۇرسەك تە, مۇنداي شەكسىز مەيىرىمنەن كۇن كوزى تىكە تۇسكەن بالمۇزداقتاي ەرىپ تۇراتىنبىز. ءوزىنىڭ دوستارى ءجۇسىپ اعا حيسىموۆپەن, سۇلتانعالي اعا قاراتاەۆپەن, اناتولي اعا پياتيبراتوۆپەن ءازىل-قالجىڭدارىن جالاۋ ەتىپ, بىرگە جۇرگەن كەزدەرى قانداي عاجاپ ساباق ەدى بىزدەرگە!
ەندى بۇگىن سول ءجۇزىن شاڭ باسۋعا قيمايتىن اعامىزدى, ۇستازىمىزدى قارا جەر باسقان جاندار ىشىندە جوق دەگەنگە قالاي سەنەمىن, قالاي كونەمىن! جالعان! جالعان!.. دۇنيە جالعان! ال سايىن اعا سۇلەيمەن ۇلى تۇرسىنوۆ ماڭگى! مەن ءۇشىن ماڭگى, وزگە دە شاكىرتتەرى ءۇشىن ماڭگى! ول جاندى جارىق دۇنيە سىيعىزباسا, مەن ءوز جۇرەگىمنەن ورىن بەردىم! قالعان شاكىرتتەرى دە سولاي ەتەرىنە ەش كۇمانىم جوق! حوش, قاراپايىمدىلىقتىڭ اكادەميگى, سپورت جۋرناليستيكاسىنىڭ الاتاۋى, ۇلى ۇستاز سايىن اعا تۇرسىنوۆ!
نەسىپ جۇنىسباەۆ,
ارداگەر جۋرناليست
استانا