قازىرگى تاڭدا كورشى مەملەكەتتەردىڭ ازاماتتارى, سونىمەن قاتار, ماقتاارال, سارىاعاش جانە شاردارا اۋداندارىنىڭ 12 ەلدى مەكەنىنىڭ تۇرعىندارى ا-15 «جىزاق – جەتىساي – سارىاعاش ء–جىبەك جولى» اۆتوجولى ارقىلى قاتىنايدى.
اتالعان اۆتوجولمەن قونىسباەۆ كەدەندىك وتكىزۋ بەكەتى ارقىلى وتەتىن وزبەكستان, اۋعانستان, يران, بىرىككەن اراب امىرلىكتەرى, تۇركيا جانە ت.ب. ەلدەردىڭ حالىقارالىق ترانزيتتىك جۇك كولىكتەرى دە قاتىنايدى. ماسەلەن, 2016 جىلى وسى جول ارقىلى 42 000-نان استام ترانزيتتىك جۇك كولىگى وتكەن. ونىڭ ۇستىنە, ماقتاارال اۋدانىندا جىلىنا 1 ملن توننادان استام اۋىلشارۋاشىلىق ونىمدەرىن ەكسپورتقا اكەتۋ, وعان سىرتتان قۇرىلىس جانە باسقا دا ماتەريالداردى اكەلۋ ءۇشىن كەلەتىن اۋىر جۇك كولىكتەرى دە جولعا نورمادان ارتىق سالماق تۇسىرۋدە.
«جىزاق – جەتىساي – سارىاعاش – جىبەك جولى» اۆتوجولى ءۇشىنشى ساناتتاعى جول بولىپ تابىلادى. ونىڭ وتكىزۋ قارقىندىلىعى ناقتى قالىپتاسقان جاعدايدان كوپ تومەن بولىپ وتىر. ماسەلەن, قولدانىستاعى قازاقستان رەسپۋبليكاسىنىڭ 3.03-09-2006 نورماتيۆتەر جانە قاعيدالار جيىنتىعىنا سايكەس ءۇشىنشى ساناتتاعى جولمەن تاۋلىگىنە 3 000 كولىككە دەيىن ءوتۋى قاجەت. الايدا, قازىرگى تاڭدا اتالعان جولمەن ءبىر تاۋلىكتە وتەتىن كولىك سانى 27 000 كولىكتى قۇراپ, نورمادان 9 ەسە اسىپ وتىر. سونىڭ سالدارىنان 2015-2016 جىلدارى وسى جولدا 343 جول-كولىك وقيعاسى تىركەلىپ, 505 ادام جاراقات الىپ, 77-ءسى قايتىس بولعان.
وسىعان بايلانىستى ۇزىندىعى 56 شاقىرىم بولاتىن ءبىرىنشى ساناتتى اينالما جول سالۋ جانە كۇنىنە 120 جۇك كولىگى وتەتىن قونىسباەۆ كەدەن بەكەتىنە دەيىنگى 68 شاقىرىم جولدى جاڭارتۋ قاجەتتىگى تۋىنداپ وتىر. بۇل اينالما جولدىڭ جاڭا قۇرىلىسى تەحنيكالىق-ەكونوميكالىق نەگىزدەمەسىن وبلىستىق بيۋدجەت ەسەبىنەن دايىنداۋعا ءازىر ەكەندىگى تۋرالى وڭتۇستىك قازاقستان وبلىسى اكىمدىگى تاراپىنان 2017 جىلعى 2 اقپاندا ۇكىمەت باسشىسىنا №24/859 حات جولدانعان. الايدا, ماسەلە ءالى شەشىلمەي وتىر, ال ۋاقىتتىڭ سوزىلۋى اتالعان جولدىڭ تاسىمالداۋ-پايدالانۋ ساپاسىنىڭ ناشارلاۋىنا الىپ كەلەتىنى ءارى كولىك قوزعالىسىنىڭ قاۋىپسىزدىگىن قامتاماسىز ەتۋگە كەرى اسەرىن تيگىزەتىنى ءسوزسىز.
وسى ورايدا ەلباسى ن.نازارباەۆتىڭ قازاقستان حالقىنا بيىلعى جولداۋىندا ترانزيتتىك تاسىمالداۋدان تۇسەتىن تابىستى 5,5 ەسەگە كوبەيتۋ تاپسىرماسىنا سايكەس, اتالعان جولدى بولاشاقتا شەتەلدىك ترانزيتتىك كولىكتەر ءۇشىن اقىلى ەتۋ ماسەلەسىن دە قاراستىرعان دۇرىس.
اسىلبەك سماعۇلوۆ,
ءماجىلىس دەپۋتاتى