قازاقستاندىق ديپلومات گرەك ساياساتكەرىن قازاق-گرەك قاتىناستارىنىڭ تاريحى مەن مەملەكەتىمىزدىڭ جەتىستىكتەرى ءجونىندە, سونىمەن قاتار, ەكى ەل اراسىنداعى ديپلوماتيالىق قاتىناستاردىڭ 25 جىلدىعىنا وراي جوسپارلانعان ساياسي جانە ءمادەني ءىس-شارالار جوسپارلارىمەن حاباردار ەتتى. سونداي-اق, ەلشى قازاقستاندا گرەك دياسپوراسى مەن گرەكيادا كوپتەپ تۇراتىن بۇرىنعى وتانداستارىمىزدىڭ بار ەكەنىن ايتا وتىرىپ, ەكى مەملەكەت اراسىندا ءمادەني ىنتىماقتاستىقتى جانداندىرۋدىڭ ماڭىزدىلىعىنا توقتالدى.
تاراپتار 2017-2018 جىلدارعا ارنالعان ءىس-شارالار جوسپارىنا قاتىستى پىكىر دە الماستى. جوسپارلانعان ءىس-شارالار اراسىندا ەلىمىزدىڭ اتاقتى ءپيانيسى, قازاقستاننىڭ حالىق ءارتىسى, قازاق ۇلتتىق كونسەرۆاتورياسىنىڭ رەكتورى ءجانيا اۋباكىروۆانىڭ افيناداعى جەكە كونتسەرتىن, گرەكيادا قازاق كينو تۋىندىلارىن كورسەتۋ مەن كوركەمونەر كورمەلەرىن وتكىزۋ بار. ءوز تاراپىنان مينيستر قازاقستانمەن مادەنيەت سالاسىندا مازمۇندى بايلانىستار ورناتۋدىڭ ماڭىزدىلىعىن اتاپ, كوزدەلگەن ءىس-شارالارعا بارىنشا قولعابىس كورسەتۋگە ءازىر ەكەنىن جەتكىزدى.